భార్య దొంగతనం.. తట్టుకోలేని ఆ భర్త ఎంత పని చేశాడంటే?

ఆ వ్యక్తికి ఇప్పటికే 10 వివాహాలు జరిగాయి. ముందు పెళ్లి చేసుకున్న 9 మంది భార్యలు.. అతడి ప్రవర్తన నచ్చక వదిలేసి వెళ్లిపోయారు. కానీ చివరామె మాత్రం అతడిని కలిసి ఉంటోంది. అయితే ఇటీవలే వీరిద్దరూ కలిసి బంధువుల పెళ్లికి వెళ్లారు. అక్కడే సదరు మహిళ దొంగతనానికి పాల్పడింది. బట్టలతో పాటు నిత్యాసవర సరుకులను కొట్టేసి అక్కడి నుంచి పారిపోయింది. విషయం తెలుసుకున్న భర్త సైతం అక్కడి నుంచి వచ్చేసి భార్య కోసం వెతుకులాడాడు. చివరకు ఆమె ఓ అడవిలో విశ్రాంతి తీసుకున్నట్లు గుర్తించి అక్కడకు వెళ్లాడు. దొంగతనం ఎందుకు చేశావంటూ గొడవ పడ్డాడు. ఆపై ఏం జరిగిందో తెలియాలంటే మీరీ కథ చదివేయాల్సిందే.

ఛత్తీస్‌గఢ్‌లోని జాష్‌పూర్ జిల్లా సులేసా గ్రామానికి చెందిన 38 ఏళ్ల ధూలారామ్‌కు ఇప్పటికే 10 సార్లు వివాహం జరిగింది. అయితే మొదటి 9 మంది భార్యలు అతడి తీరు నచ్చక వదిలేసి వెళ్లిపోయారు. దీంతో అతడు 10వ భార్యగా బసంతి బాయిని పెళ్లి చేసుకున్నాడు. వీరిద్దరి మధ్య కాపురం బాగానే సాగుతుండగా.. ఇటీవలే బంధువులు పెళ్లికి ఆహ్వానించారు. దీంతో ఏప్రిల్ 16వ తేదీ రోజు ధూలా రామ్, బసంతి బాయి ఇద్దరూ కలిసి బాగిచా ప్రాంతంలో జరుగుతున్న వివాహానికి హాజరయ్యారు. ఉదయమే వెళ్లగా.. సాయంత్రం వరకు అక్కడే ఉన్నారు. అయితే ఇదే పెళ్లిలో బసంతి బాయి దొంగతనం చేసింది.

ముఖ్యంగా కొత్త బట్టలు, నిత్యాసవర సరుకులు అయిన పప్పులు, బియ్యం, వంట నూనె వంటివి తీసుకుని పరారైంది. అయితే ఇదంతా చూసిన కొందరు అక్కడున్న వారందరికీ విషయం చెప్పారు. ముఖ్యంగా భార్య దొంగతనం చేసిన పారిపోయిన విషయం తెలియని ధూలా రామ్ అక్కడే ఉండగా.. అతడిని కూడా పలువురు ప్రశ్నించారు. దీంతో అవమానం తట్టుకోలేని అతడు వెంటనే అక్కడి నుంచి బయటకు వచ్చేశాడు. ఇక భార్య బసంతి బాయి ఎక్కడ ఉందో తెలుసుకునే ప్రయత్నం చేశాడు. ఈక్రమంలోనే స్థానికంగా ఉన్న ఓ అడవిలో ఆమె నిద్రిస్తున్నట్లు గుర్తించాడు. వెంటనే అక్కడకు చేరుకుని ఆమెతో గొడవకు దిగాడు. బసంతి బాయి కూడా అతడికి గట్టిగానే సమాధానం చెప్పింది.

ఇలా భార్యభర్తలిద్దరి మధ్య తీవ్రంగా గొడవ జరగ్గా.. విపరీతమైన కోపానికి గురైన అతడు.. బసంతి బాయిపై దాడికి పాల్పడ్డాడు. ఇష్టం వచ్చినట్లుగా కొడుతుండగా ఆమె ప్రాణాలు కోల్పోయింది. దీంతో భయపడిపోయిన ధూలారామ్ ఆమెను అక్కడే పడేసి.. పైనుంచి ఎండిన ఆకులు, చెత్తా చెదారం కప్పేసి పారిపోయాడు. అయితే 5 రోజుల తర్వాత అక్కడ నుంచి తీవ్రమైన దుర్వాసన రావడంతో.. స్థానికంగా ఉన్న కొందరు అక్కడికెళ్లి చూశారు. మృతదేహాన్ని గుర్తించగా వెంటనే పోలీసులకు ఫిర్యాదు చేశారు. రంగంలోకి దిగిన పోలీసులు పూర్తిగా కుళ్లిపోయిన మృతదేహాన్ని పోస్టుమార్టం నిమిత్తం ప్రభుత్వాసుపత్రికి పంపించారు.

సంఘటనా స్థలం వద్దే మహిళకు చెందిన ఫోన్ దొరకగా.. ఆమెను బసంతి బాయిగా గుర్తించారు. ఆపై ఆమె భర్త ధూలా రామ్‌ను అదుపులోకి తీసుకున్నారు. తమదైన స్టైల్లో విచారించగా.. అతడు నేరాన్ని ఒప్పుకున్నాడు. దొంగతనం చేసిందనే కోపంతో తానే భార్యను హత్య చేశానిని.. బసంతి బాయి తన 10వ భార్య అని వెల్లడించాడు. దీంతో షాకైన పోలీసులు అతడు గతంలోనూ ఏమైనా నేరాలు చేశాడా అనే కోణంలో విచారిస్తున్నారు.