భారత ఇంటెలిజెన్స్ బ్యూరో చీఫ్ పదవీకాలం పొడగింపు

భారత్‌తో ఉద్రిక్తతల వేళ పాకిస్తాన్ కీలక నిర్ణయం తీసుకుంది. పాక్ ఆర్మీ చీఫ్ జనరల్ అసిమ్ మునీర్‌కు ఫీల్డ్ మార్షల్ హోదా కల్పిస్తూ పాక్ మంత్రివర్గం ఆమోదం తెలిపింది. ఇలాంటి సమయంలోనే భారత ఇంటెలిజెన్స్ బ్యూరో చీఫ్ తపన్ కుమార్ డేకా పదవీకాలాన్ని మరోసారి పొడిగించారు. దీంతో ఆయన మరో ఏడాది కాలం పాటు బ్యూరో చీఫ్ పదవిలో కొనసాగనున్నారు. తపన్ కుమార్ డేకా పదవీకాలాన్ని మరో సంవత్సరం పాటు పొడిగించేందుకు కేంద్ర కేబినెట్ నియామకాల కమిటీ తాజాగా ఆమోదం తెలిపింది. అందుకు సంబంధించి ఉత్తర్వులు కూడా జారీ చేసింది.

జూన్ 2026 లేదా తదుపరి ఉత్తర్వులు వచ్చే వరకు తపన్ కుమార్ డేకా ఈ పదవిలో కొనసాగనున్నారు. హిమాచల్ ప్రదేశ్ కేడర్‌కు చెందిన డేకా 1988 బ్యాచ్ ఐపీఎస్ అధికారి. ఆయన గతంలో రెండు దశాబ్దాల పాటు ఐబీ ఆపరేషన్స్ విభాగానికి చీఫ్‌గా కూడా పని చేశారు. 2008 ముంబై 26/11 ఉగ్రదాడి సమయంలో కౌంటర్ ఆపరేషన్‌కు తపన్ కుమార్ డేకానే బాధ్యత వహించారు. 2000లో దేశంలో అనేక ఉగ్రవాద దాడులకు కారణమైన ఇండియన్ ముజాహిదీన్‌పై కార్యకలాపాలకు కూడా నాయకత్వం వహించారు. డేకాకు ఈశాన్య ప్రాంతంతో పాటు తన సొంత రాష్ట్రమైన అస్సాంలోని పరిస్థితులను నేర్పుగా నిర్వహించడంలో అపార అనుభవం ఉంది.

జమ్మూ కశ్మీర్‌లో సంక్షోభాలను పరిష్కరించడంలో తపన్ కుమార్ డేకా ప్రభుత్వం తరఫున ముఖ్య అధికారిగా పని చేస్తున్నారు. అందుకే ఆయన సేవలను మరికొన్ని రోజులు పొడిగిస్తున్నట్లు కేంద్ర కేబినెట్ నియామకాల కమిటీ పేర్కొంది. ముఖ్యంగా ఈయనకు ఉగ్రవాద కార్యకలాపాలకు సంబంధించిన కేసులను సమర్థంగా పరిష్కరిస్తారన్న పేరు ఉంది. ఉగ్రవాద నిరోధక నిపుణుడిగా ఆయనను పిలుస్తుంటారు. పాకిస్థాన్ మూలాలు కలిగిన ఉగ్రవాద నిరోధక కేసులను నిర్వహించడంలో ఆయన నిపుణుడు. పహల్గాం ఉగ్రదాడి తర్వాత భారత్ చేపట్టిన ఆపరేషన్ సిందూర్‌లో ఈయన చాలా కీలకంగా వ్యవహరించారు. నిఘా సమాచారాన్ని సేకరించడంలో తపన్ కుమార్ డేకా అత్యంత ప్రావీణ్యం కలవారు.

తపన్ కుమార్ డేకా జూన్ 2022లో రెండేళ్ల కాలానికి ఇంటెలిజెన్స్ బ్యూరో చీఫ్‌ పదవిలో నియమితులయ్యారు. జూన్ 2024లో ఆయన పదవీకాలం ముగుస్తుందనగా, మరో సంవత్సరం పాటు ఆయన పదవీకాలాన్ని పొడిగించారు. ఇప్పుడు మరోసారి ఆయన పదవీకాలాన్ని పొడిగించింది కేంద్ర సర్కారు. ఆల్ ఇండియా సర్వీసెస్ రూల్స్, 1958లోని FR 56(d), రూల్ 16 (1A) నిబంధనలను సడలించి ఆయనను ఈ పదవిలో కొనసాగిస్తున్నారు. ప్రజా ప్రయోజనార్థం ఇంటెలిజెన్స్ బ్యూరో అలాగే రీసెర్చ్ అండ్ అనాలిసిస్ వింగ్ అధిపతులను, క్యాబినెట్ సెక్రటరీ, హోం సెక్రటరీ, ఇతరుల పదవీ విరమణ వయస్సు 60 సంవత్సరాలు దాటినప్పటికీ ఈ నిబంధనల ద్వారా వారి సేవలను పొడిగించవచ్చు.