హైహీల్స్ వేసుకోవాలంటే సర్కారు అనుమతి తీసుకోవాల్సిందే

 చెప్పులు వేసుకుని గుడిలోకి, ఇంట్లోకి రానివ్వకుండా చాలా మందే ఆంక్షలు పెడుతుంటారు. మనం కూడా అందుకు తగ్గట్లుగానే ఎక్కడికైనా వెళ్తే చెప్పులు బయటే విడిచి వెళ్తాం. ఇదంతా మనకు తెలిసిందే. కానీ మనం ఇప్పుడు చూడబోయే ఓ నగరంలో మాత్రం హైహీల్స్ వేసుకోవడానికి అనుమతి లేదు. అలా అని ఏ గుడిలోనో, బడిలోనే అనుకుంటే మీరు పప్పులో కాలేసినట్లే. అక్కడేమైనా దేవుడో, ప్రముఖులు ఉన్నారని భావించినా అది కూడా తప్పే అవుతుంది. ఎందుకంటే అక్కడ అలాంటివేమీ లేవు. ఏ ఒక్క ఇంట్లోనే, ఆవరణలోనే కాకుండా.. నగర వ్యాప్తంగా ఈ హైహీల్స్ ధరించడానికి అనుమతి లేదు. అందుకు గల కారణం ఏంటో మనం ఇప్పుడు తెలుసుకుందాం.

యూఎస్ఏలోని కాలిఫోర్నియాలో ఉన్న "కమెల్ బై ది సీ" అనే చిన్న నగరం ఉంది. ఇక్కడి బీచ్, చారిత్రక కట్టడాలు, ప్రకృతి అందాలు పర్యాటకుల్ని బాగా ఆకట్టుకుంటాయి. అందుకే ఇక్కడికి దేశ, విదేశాల నుంచి పెద్ద ఎత్తున పర్యటకులు వెళ్తుంటారు. కొన్ని రోజుల పాటు అక్కడే ఉండి మరీ ఫుల్లుగా ఎంజాయ్ చేస్తుంటారు. ఇదిలా ఉండగా.. ఇక్కడి ప్రాంతంలో సైప్రెస్ పైన్ చెట్లు ఎక్కువగా కనిపిస్తాయి. అయితే ఇవి భారీగా పెరగడంతో వాటి వేర్లు కూడా నగరం మొత్తం వ్యాపించాయి. దీని వల్ల రోడ్ల పక్కకు పాదచారుల కోసం వేసిన పేవ్‌మెంట్లు కూడా పాడవుతున్నాయి.

అయితే అనేక సార్లు మరమ్మత్తులు చేసినా ఇదే తంతు. దీంతో పాదచారులు తీవ్ర ఇబ్బందులు ఎదుర్కుంటున్నారు. ఇఖ హైహీల్స్ వేసుకున్న వారి పరిస్థితి అయితే ప్రత్యేకంగా చెప్పాల్సిన అవసరం లేదు. అడుగు అడుగునా కింద పడిపోతూ.. అనేక దెబ్బలు తగిలించుకుంటున్నారు. అయితే ఈ విషయాన్ని గుర్తించిన అక్కడి ప్రభత్వం ఓ వింత నిర్ణయం తీసుకుంది. ముఖ్యంగా 1963వ ఏటనే అప్పటి నగర అటార్నీ హైహీల్స్ వేసుకోవడంపై నిషేధం విధిస్తూ నిర్ణయం తీసుకున్నారు. ఒకవేళ వాటిని కచ్చితంగా వేసుకోవాలని భావిస్తే మాత్రం సర్కారు నుంచి అనుమతి తీసుకోవాల్సి ఉంటుందనే నిబంధనను విధించారు.

ఒకవేళ ఎవరైనా అనుమతి తీసుకుని.. రోడ్డుపై నడుస్తూ పడిపోతే అందుకు ప్రభుత్వం ఎలాంటి బాధ్యత వహించదు. బాధితులే పూర్తి బాధ్యత వహించాల్సి ఉంటుంది. అలాగే బాధితులు ఎవరైనా సరే సర్కారును ఈ సమస్యపై నిందించలేరు. కోర్టుకు కూడా వెళ్లలేరు. దావా వేయలేరు. ఇదంతా మనకు ఎందుకులే అక్కడ ఉన్నవాళ్లకు తెలిస్తే చాలనిపిస్తోందా.. అందరికీ తెలియాల్సిందే. ఎందుకంటే అక్కడకు అనేక దేశాల నుంచి పర్యటకులు వస్తుంటారు. అలాంటి వారంతా ఈ విషయం ముందుగానే తెలుసుకోవాలి. పొరపాటున అక్కడ హైహీల్స్ వేసుకుని ఇబ్బందులు పాలవకూడదు.