మహాసముద్రాల అడుగున రష్యా-అమెరికా యుద్ధం

అమెరికా-రష్యా మధ్య మాటల యుద్ధం ఇప్పుడు సముద్ర గర్భంలో సైనిక చర్యలకు దారితీసింది. రష్యా మాజీ అధ్యక్షుడు దిమిత్రీ మద్విదేవ్.. డొనాల్డ్ ట్రంప్ భారత్, రష్యాల ఆర్థిక వ్యవస్థపై చేసిన డెడ్ ఎకానమీ వ్యాఖ్యలకు ప్రతిగా 'డెడ్ హ్యాండ్' గురించి హెచ్చరించారు. దీంతో ఆగ్రహించిన ట్రంప్.. రష్యాకు వ్యతిరేకంగా రెండు అణుజలాంతర్గాములను వ్యూహాత్మక ప్రాంతాలకు తరలించాలని ఆదేశాలు జారీ చేశారు.

ట్రంప్ పరోక్షంగా టారిఫ్‌లు, ఆంక్షలతో హెచ్చరించినప్పటికీ.. రష్యా దానికి లొంగకపోవడంతో ఈ నిర్ణయం తీసుకున్నారు. అయితే ఈ అమెరికా చర్యలకు రష్యా నుంచి గట్టి ప్రతిస్పందన వచ్చింది. క్రెమ్లిన్ ఇంకా అధికారికంగా స్పందించనప్పటికీ.. రష్యా సీనియర్ చట్టసభ్యుడు విక్టర్ వోడోలట్స్కాయ్ ఒక హెచ్చరిక జారీ చేశారు. ప్రపంచ సముద్రాలలో అమెరికా కంటే రష్యాకు ఎక్కువ అణుజలాంతర్గాములు ఉన్నాయని, ట్రంప్ పంపించినవి ఇప్పటికే తమ నియంత్రణలో ఉన్నాయని ఆయన పేర్కొన్నారు. ఈ ఉదంతం అమెరికా, రష్యా నౌకాదళాల మధ్య నెలకొన్న ఉద్రిక్తతలను ప్రపంచానికి మరోసారి గుర్తుచేసింది.

అమెరికా జలాంతర్గాముల బలం..

అమెరికా నౌకాదళం ఓహియో-క్లాస్ బాలిస్టిక్ క్షిపణి జలాంతర్గాములకు (SSBNs) ప్రసిద్ధి చెందింది. ఇవి తమ స్టీల్త్ సామర్థ్యం, అణు వార్‌హెడ్‌లను ఖచ్చితంగా చేరవేసే నైపుణ్యానికి పేరుగాంచాయి. అయితే వీటినే "బూమర్స్" అని కూడా పిలుచుకుంటుండగా.. ప్రస్తుతం 14 అందుబాటులో ఉన్నాయి. అయితే వీటికి 15 ఏళ్ల వరకు ఎలాంటి పెద్ద మరమ్మతులు చేయకుండానే పని చేసే సామర్థ్యం ఉంది. ఇలా ఈ ఒక్కో జలాంతర్గామిలో 20 వరకు సబ్‌మెరైన్-లాంచ్డ్ బాలిస్టిక్ క్షిపణులను (SLBMs) మోసుకెళ్లగలవు.

అమెరికా నౌకాదళంలో వర్జీనియా-క్లాస్, సీవుల్ఫ్-క్లాస్, లాస్ ఏంజిల్స్-క్లాస్ (688 క్లాస్) వంటి అణుశక్తితో పనిచేసే ఫాస్ట్ అటాక్ జలాంతర్గాములు (SSN) కూడా ఉన్నాయి. ఇవి టోమాహాక్, హార్పూన్ క్షిపణులు, MK-48 టార్పెడోలను ఉపయోగించి శత్రు నౌకలను వేటాడతాయి. నిఘా, గూఢచర్య కార్యకలాపాలను నిర్వహించడంలో కూడా ఇవి కీలకంగా పని చేస్తాయి. ప్రస్తుతం 24 వర్జీనియా-క్లాస్ SSNలు సేవలో ఉన్నాయి.

రష్యా జలాంతర్గాముల బలం..

రష్యా ప్రపంచంలోనే అతిపెద్ద సబ్‌మెరైన్ ఫ్లీట్‌లలో ఒకటి. సుమారు 64 జలాంతర్గాములతో రష్యా తన నౌకాదళాన్ని నిర్వహిస్తోంది. వీటిలో 14 బాలిస్టిక్ మిస్సైల్ జలాంతర్గాములు వ్యూహాత్మకంగా చాలా ముఖ్యమైనవి. వీటిలో బోరీ-క్లాస్, డెల్టా IV-క్లాస్ ప్రధానమైనవి. రష్యా నౌకాదళంలో ఎనిమిది బోరీ-క్లాస్ SSBNలు ఉన్నాయి. ఇవి 16 బులావా SLBMలను, టార్పెడోలను ప్రయోగించగలవు. ఈ బోరీ-క్లాస్ జలాంతర్గాములు డెల్టా IV-క్లాస్‌ల స్థానాన్ని భర్తీ చేయనున్నాయి.

రష్యాకు యాసెన్-క్లాస్, అకులా-క్లాస్ వంటి ఫాస్ట్ అటాక్ జలాంతర్గాములు కూడా ఉన్నాయి. యాసెన్-క్లాస్ జలాంతర్గాములు సుదూర లక్ష్యాలపై దాడులు చేసే సామర్థ్యం కలిగి ఉంటాయి. అకులా-క్లాస్ జలాంతర్గాములనే "షార్క్" అని కూడా పిలుచుకుంటుంటారు. అయితే ఈ జలాంతర్గాములు నిశ్శబ్దంగా శత్రువులను హతమార్చడంలో నిపుణుడిగా పని చేస్తాయి. ఇవి అమెరికా లాస్ ఏంజిల్స్-క్లాస్‌కు ఒక ప్రత్యర్థిగా భావిస్తుంటారు.