ప్రెస్ సెక్రటరీ లీవిట్ గురించి ట్రంప్ మాటలు.. వైరల్ అవుతున్న వీడియో

అమెరికా అధ్యక్షుడు డొనాల్డ్ ట్రంప్ వైట్ హౌస్ ప్రెస్ సెక్రటరీ కరోలిన్ లీవిట్‌పై చేసిన వ్యాఖ్యలు ప్రస్తుతం అమెరికా రాజకీయాల్లో హాట్ టాపిక్‌గా మారాయి. ఇటీవల న్యూస్‌మాక్స్ ఛానెల్‌కు ఇచ్చిన ఇంటర్వ్యూలో ట్రంప్.. కరోలిన్ లీవిట్‌ను ఇప్పటి వరకు ఏ అధ్యక్షుడికి పని చేయని అత్యుత్తమ ప్రెస్ సెక్రటరీ తనకు పని చేస్తోందని ప్రశంసల వర్షం కురిపించారు. ఆమె అద్భుతమైన అందం, తెలివితేటలతో పాటు ఆమె పెదవులు కదిలే విధానంపై ట్రంప్ చేసిన వ్యాఖ్యలు వివాదాస్పదంగా మారాయి. మరి ఆయన ఏమన్నారో మనం ఇప్పుడు తెలుసుకుందామా..?

న్యూస్‌మాక్స్‌లో రాబ్ ఫిన్నెర్టీకి ఇచ్చిన ఇంటర్వ్యూలో ట్రంప్ మాట్లాడుతూ.. కరోనా లీవిట్ పెదవులు తుపాకీలా కదులుతాయని వ్యాఖ్యానించారు. ఆమె అందం, హుందాతనంతో ప్రజల్లో ఓ స్టార్‌గా మారిపోయారని పేర్కన్నారు. కరోలిన్ మాట్లాడేటప్పుడు ఆమె పెదాల కదలిక చాలా అందంగా ఉంటుందని వివరించారు. అందమైన ముఖం, అందమైన పెదాల కదలిక, చురుకైన బ్రెయిన్ ఆమెను ఒక మెషీన్ గన్‌లా మార్చాలని చెప్పారు. అంతటితో ఆగకుంటా అమెరికాకు అధ్యక్షుడిగా సేవలు అందించిన అందరిలో తనకు మాత్రమే అద్భుతమైన, ఉత్తమ ప్రెస్ సెక్రటరీ ఉందని స్పష్టం చేశారు.

 మెషీన్‌గన్ కామెంట్లపై భిన్నాభిప్రాయాలు..

ఈ వ్యాఖ్యలు ప్రశంసగానే ట్రంప్ ఉద్దేశించినప్పటికీ.. ఆమె శైలిని విచిత్రంగా పోల్చడంపై భిన్నాభిప్రాయాలు వ్యక్తం అవుతున్నాయి. ట్రంప్ తరచుగా తన మాటలతో ఇలాంటి సంచలనం సృష్టిస్తుంటారని విశ్లేషకులు చెబుతున్నారు. ప్రెస్ సెక్రటరీగా కరోలిన్ లీవిట్ వ్యవహారశైలిపై ట్రంప్‌కు ఎంత నమ్మకం ఉందో ఈ వ్యాఖ్యలు స్పష్టం చేస్తున్నాయి. ఇంటర్వ్యూలో ఆమె వేగంగా, స్పష్టంగా సమాధానాలు ఇవ్వడం ట్రంప్‌ను ఆకట్టుకున్నట్లు తెలుస్తోంది. ఈ ఇంటర్వ్యూలో ట్రంప్ మరిన్ని కీలక అంశాలను ప్రస్తావించారు. 2016 అధ్యక్ష ఎన్నికలలో రష్యా జోక్యంపై బరాక్ ఒబామా, హిల్లరీ క్లింటన్‌లు తనపై కల్పిత ఆరోపణలు చేశారని ఆరోపించారు. దీనికి గాను వారికి తీవ్ర పరిణామాలు ఎదురవ్వాలని ట్రంప్ సూచించారు.

రష్యా మాజీ అధ్యక్షుడి వ్యాఖ్యలపైనా ట్రంప్ ఆగ్రహం..

అణ్వాయుధాలపై రష్యా మాజీ అధ్యక్షుడు మద్విదేవ్ చేసిన వ్యాఖ్యలపైనా ట్రంప్ స్పందించారు. అమెరికా అణ్వాయుధ జలాంతర్గాములు రష్యాకు మరింత దగ్గరగా మోహరించినట్లు ధృవీకరించారు. ఫెడరల్ రిజర్వ్ చైర్మన్ జెరోమ్ పావెల్‌ను తొలగించాలనే కోరికగా ఉన్నప్పటికీ.. బహుశా అతనే పదవిలో కొనసాగే అవకాశం ఉందని ట్రంప్ తెలిపారు. అలాగే ఘిస్లైన్ మాక్స్‌వెల్ మరియు సీన్ కోంబ్స్ వంటి వారిని క్షమించే అవకాశం గురించి కూడా ఆయన ప్రస్తావించారు.