క్రాక్స్‌లో దూరిన రక్తపింజరి.. పాము కాటుతో టీసీఎస్ ఉద్యోగి మృతి

చెప్పులో దూరిన పాము కాటువేయడంతో ఓ సాఫ్ట్‌వేర్ ఇంజినీర్ మృతిచెందాడు. ఈ విషాదకర ఈ ఘటన బెంగళూరులో చోటుచేసుకుంది. వివరాల్లోకి వెళ్తే.... టీసీఎస్‌ సంస్థలో పనిచేస్తోన్న మంజు ప్రకాశ్‌ (41) బన్నేరుఘట్ట సమీపంలోని రంగనాథ లేఅవుట్లో ఉంటున్నాడు. శనివారం రోజున మధ్యాహ్నం 12 గంటల సమయంలో చెరుకు రసం తీసుకొచ్చేందుకు దుకాణానికి వెళ్లిన ప్రకాశ్... ఇంటి బయట ఉంచిన క్రాక్స్ వేసుకున్నాడు. కానీ, అందులో పాము పిల్ల దూరిన విషయం మంజు ప్రకాశ్ గమనించలేదు. దీంతో చెప్పులు వేసుకున్న వెంటనే పాము బొటనవేలికి కాటువేసింది. కానీ, ఓ రోడ్డు ప్రమాదం కారణంగా ప్రకాశ్‌కు కాలికి స్పర్శజ్ఞానం లేకపోవడంతో పాము కరిచిన విషయం అతడికి తెలియలేదు.

కాటు వేసిన తర్వాత దాదాపు 45 నిమిషాలు ఆ పాము చెప్పులోనే ఉంది. మధ్యాహ్నం 12.45 గంటల ప్రాంతంలో ప్రకాశ్ ఇంటికి తిరిగొచ్చిన తర్వాత అందులో పాము ఉన్న విషయం తెలిసింది. ఆ ఇంటి వద్ద పనిచేయడానికి వచ్చిన ఓ కార్మికుడు చెప్పులో చనిపోయి ఉన్న పామును గుర్తించి ఆ ఫ్యామిలీకి సమాచారం ఇచ్చాడు. అప్పటికే అస్వస్థతకు గురై గదిలోని బెడ్ మీద పడి ఉన్న ప్రకాశ్‌ నోటి నుంచి నురగులు, కాలి నుంచి రక్తం కారుతో అపస్మారక స్థితిలోకి వెళ్లిపోయాడు. వెంటనే కుటుంబసభ్యులు అతడ్ని సమీపంలోని ఓ ప్రయివేట్ ఆసుపత్రికి తరలించారు. కానీ, అప్పటికే పరిస్థితి చేదాటిపోయింది. ప్రకాశ్ చనిపోయినట్టు వైద్యులు నిర్దారించారు.

మంజు ప్రకాశ్‌కు 2016లో జరిగిన ఓ రోడ్డు ప్రమాదం కారణంగా అతడి కాలికి స్పర్శ పూర్తిగా పోయింది. దీంతో పాము తనను కాటువేసిన విషయం కూడా గుర్తించలేకపోయాడు. కాటువేసిన పాము పిల్లను రక్తపింజరిగా గుర్తించారు. ప్రకాశ్ సోదరుడు మాట్లాడుతూ.. ‘చెరుకు రసం తేవడానికి బయటకు వెళ్లొచ్చిన తర్వాత ప్రకాశ్ గదిలోకి వెళ్లి నిద్రపోయాడు.. దాదాపు ఓ గంట తర్వాత మా ఇంటికి వచ్చిన ఓ కార్మికుడు చెప్పులో పాము పిల్ల ఉన్నట్టు గుర్తించి మమ్మల్ని అలర్ట్ చేశాడు. మేము వచ్చి చూడగా ఆ పాము కూడా చనిపోయి ఉంది’ అని అన్నాడు. 2016లో బస్సు ప్రమాదానికి గురైన తన సోదరుడి కాలికి సర్జరీ జరిగిందని, ఈ ఘటన తర్వాత కాలికి స్పర్శ పూర్తిగా పోయిందని తెలిపాడు. బన్నేరుఘట్ట పోలీసులు ఈ ఘటనపై కేసు నమోదుచేసి దర్యాప్తు చేస్తున్నారు. వర్షకాలంలో పాములు వంటి విషకీటకాలు ఇళ్లలోకి వచ్చే ప్రమాదం ఉందని, బయట ల స్టాండ్‌‌లో ఉన్న చెప్పులు, షూ వేసుకునేటప్పుడు జాగ్రత్తగా ఉండాలని చెబుతారు.