చీరలకు పుట్టిల్లైన భారత్‌లో ఇదేం చెత్త ట్రెండ్..శంతను నాయుడు విమర్శలు

ప్రస్తుతం సామాజిక మాధ్యమాల్లో జెమినీ ఆర్టిఫిషియల్ ఇంటెలిజెన్స్ (ఏఐ) చీర్ ట్రెండ్ సంచలనం సృష్టిస్తోంది. గూగుల్ జెమినీ నానో బనానా ఇమేజ్ ఎడిటింగ్ టూల్ ఆధారంగా 90ల నాటి గ్లామర్‌కు ఆధునిక సాంకేతికతను జోడిస్తోన్న ఈ ట్రెండ్ వైరల్ అవుతోంది. ఈ టూల్‌లో యూజర్లు తమ ఫోటోను అప్‌లోడ్ చేసి, 1990ల శైలిలో సొగసైన చీరలు, జ్ఞాపకాల నేపథ్యాలతో తమకు నచ్చినట్టు మార్చుకుంటున్నారు. దేశంలో ఎక్కడ చూసినా నానో బానానా మాటే వినిపిస్తోంది. చీరల్లో ఉన్న ఫొటోలను నానో బనానా టూల్‌తో ఎడిట్ చేసి సోషల్ మీడియాలో పంచుకుంటున్నారు. తాజాగా, ఈ ట్రెండ్‌పై దివంగత రతన్ టాటా స్నేహితుడు, తెలుగు యువకుడు శంతను నాయుడు తనదైన శైలిలో సెటైర్లు వేశారు. ప్రస్తుతం ఇది నెట్టింట వైరల్ అవుతోంది.

‘మీరంతా ఉన్నది భారత్‌లో.. అమెరికాలో కాదు? ఈ దేశం చీరలకు పుట్టినిల్లు... మీ బీరువాల్లో చూసుకుంటే కనీసం 15 చీరలు కనిపిస్తాయి.. వాటిని కుట్టుకుని ఫొటోలు దిగి సోషల్ మీడియాలో పంచుకోవచ్చు కదా... ఈ మాత్రం కూడా చేయలేనంత బద్ధకస్తులుగా తయారయ్యారా? మీ కబోర్డుల్లో దుస్తులను కాదని ఏఐతో ఫొటోలు చేసుకుని ఆనందపడుతున్నారా?’ అని రతన్ టాటా సన్నిహితుడు శంతను నాయుడు విమర్శలు గుప్పించారు. పాశ్చాత్య దేశాల్లో వివాహా సమయంలో ధరించే తెల్లటి గౌన్లు వేసుకున్నట్టు ఫొటోలు ఎడిట్ చేసి షేర్ చేసినా అంతగా తప్పుబట్టాల్సి ఉండేది కాదని వ్యాఖ్యానించారు. ఇటువంటి కంటే ఇంట్లో అమ్మ చీర కట్టుకుని ఫొటోలు దిగితే మరింత అందంగా కనిపిస్తారని ఆయన అభిప్రాయపడ్డారు.

ఇన్‌స్టాగ్రామ్‌లో శంతను నాయుడు పోస్ట్ చేసిన వీడియోపై నెటిజన్లు స్పందిస్తూ.. ఆయన అభిప్రాయంతో ఏకీభవించారు. తమ మనసులో ఏముందో శంతను అదే చెప్పారని కామెంట్ పెడుతున్నారు. గూగుల్ ఏఐ జెమినీ నానో బనానా ఇమేజ్ ఎడిటింగ్ టూల్ ట్రెండింగ్‌ క్రియేట్ చేస్తోంది. సాధారణ ఫోటోలకు త్రీడీ హంగులు అద్దే ఈ టూల్ ప్రస్తుతం విపరీతంగా ఆకట్టుకుంటోంది. ఈ టూల్ సాయంతో దేశంలో చీరల ఎడిట్స్ పాప్యులర్‌గా మారాయి. తమ ఫొటోలను 90 దశకం నాటి శైలిలో ఎడిట్ చేసి, సోషల్ మీడియాలో షేర్ చేసుకుంటున్నారు.

కాగా, నానో బనానా ఫోటో ఎడిటింగ్ టూల్‌పై తెలంగాణ ఆర్టీసీ ఎండీ, ఐపీఎస్ అధికారి వీసీ సజ్జనార్ హెచ్చరించారు. దీనిని ఆసరాగా తీసుకుని సైబర్‌ నేరగాళ్లు మోసాలకు పాల్పడే అవకాశం ఉందని సజ్జనార్‌ ఎక్స్‌ (ట్విట్టర్) వేదికగా పోస్ట్ పెట్టారు. గత నెలలోనే గూగుల్ ఈ యాప్‌ను అందుబాటులోకి తీసుకొచ్చిన సంగతి తెలిసిందే.