రూ. లక్షల జీతం వదిలేసి..ప్రధాని మోదీకి ఆహ్వానం పలికిన యువ మహిళా ఐఏఎస్

ఇటీవల సోమవారం రోజున ప్రధానమంత్రి నరేంద్ర మోదీ అరుణాచల్ ప్రదేశ్‌లో పర్యటించారు. ఈ సందర్భంగా ప్రధాని మోదీకి స్థానిక అధికారులు ఘన స్వాగతం పలికారు. వారిలో ఒక యువ ఐఏఎస్ అధికారిణి కూడా ఉన్నారు. ఆమె పేరే విశాఖ యాదవ్ . అయితే రూ.లక్షల జీతం వచ్చే ఉద్యోగాన్ని వదిలేసి.. ఆమె యూపీఎస్సీ పరీక్షలకు ప్రిపేర్ అయి.. ఐఏఎస్‌గా సెలెక్ట్ అయ్యారు. అరుణాచల్ ప్రదేశ్‌లోని పాపమ్ పరే జిల్లా పర్యటనకు ప్రధాని వెళ్లగా.. మహిళా సివిల్ సర్వీస్ అధికారిణి స్వాగతం పలికిన ఫోటోలు ప్రస్తుతం సోషల్ మీడియాలో తెగ వైరల్‌గా మారాయి. దీంతో ఆ అధికారిణి ఎవరూ అని వెతికిన నెటిజన్లకు.. ఆమె సక్సెస్ స్టోరీ వెలుగులోకి వచ్చింది.

ఐఏఎస్ విశాఖ యాదవ్ .. ప్రస్తుతం పాపమ్ పరే జిల్లాకు డిప్యూటీ కమిషనర్‌గా పనిచేస్తున్నారు. ఈ సందర్భంగా ఇటీవల ప్రధాని మోదీకి స్వాగతం పలికే అవకాశం తనకు రావడం పట్ల ఆమె గర్వంగా ఉందని పేర్కొంటూ.. ఆ ఫోటోలను సోషల్ మీడియాలో పంచుకోవడంతో అవి వైరల్ అయ్యాయి. విశాఖ యాదవ్ 1994లో ఢిల్లీలో జన్మించారు. విశాఖ యాదవ్ తండ్రి రాజ్‌ కుమార్ యాదవ్ అసిస్టెంట్ సబ్ ఇన్‌స్పెక్టర్ కాగా.. ఆమె తల్లి గృహిణి.

ఢిల్లీ టెక్నలాజికల్ యూనివర్సిటీ (డీటీయూ) నుంచి ఇంజనీరింగ్ పట్టాను పొందిన విశాఖ యాదవ్.. బెంగళూరులోని సిస్కో కంపెనీలో ఉద్యోగం చేసేవారు. అక్కడ రూ.లక్షల్లో జీతాన్ని అందుకునేవారు. అయినప్పటికీ.. ఐఏఎస్ కావాలనే తన కలను నెరవేర్చుకునేందుకు.. ఆ భారీ వేతనం వచ్చే ఉద్యోగాన్ని కూడా వదిలేసుకున్నారు.

ఇక ఐఏఎస్ కోచింగ్‌కు వెళ్లకుండానే ఆమె యూపీఎస్సీ పరీక్షకు సిద్ధమైన విశాఖ యాదవ్.. మొదటి రెండు ప్రయత్నాల్లో ఫెయిల్ అయ్యారు. అయినప్పటికీ.. పట్టువదలకుండా.. మూడో ప్రయత్నంలో విజయం సాధించారు. ఈ క్రమంలోనే ఆమె తన మూడో ప్రయత్నంలో యూపీఎస్సీ సివిల్ సర్వీసెస్ పరీక్షలో ఆల్ ఇండియా ఆరో ర్యాంకును సాధించారు.

దీంతో ఎట్టకేలకు తన కలను సాకారం చేసుకున్నారు. మొత్తం 2,025 మార్కులకుగాను.. విశాఖ యాదవ్.. 1,046 మార్కులు సాధించారు. భారీ ప్యాకేజీతో కూడిన ఉద్యోగాన్ని వదిలేసి.. కష్టపడి ఐఏఎస్ అయిన విశాఖ యాదవ్ అంకితభావం ఇప్పుడు దేశవ్యాప్తంగా ప్రశంసలు అందుకుంటోంది.