ధాన్యం సేకరణలో కీలక మార్పు.. ఇక ఆ ఇబ్బంది ఉండదు

ఆంధ్రప్రదేశ్‌లో అక్టోబర్ 27 నుంచి ధాన్యం కొనుగోలు ప్రక్రియ ప్రారంభం కానుంది. ఈ విషయాన్ని ఏపీ పౌరసరఫరాల శాఖ మంత్రి నాదెండ్ల మనోహర్ ఇటీవల వెల్లడించారు. ఈ ఖరీఫ్ సీజన్‌లో 51 లక్షల మెట్రిక్ టన్నుల ధాన్యం కొనుగోలు చేయాలని లక్ష్యంగా పెట్టుకున్నారు. అలాగే ఈసారి ధాన్యం కొనుగోలు ప్రక్రియలో ఎలాంటి ఇబ్బందులు జరగకుండా ప్రభుత్వం ప్రత్యేక చర్యలు తీసుకుంటోంది. అందులో భాగంగా రైతులకు ఇబ్బందులు లేకుండా ధాన్యం కొనుగోలు ప్రక్రియ చేపట్టేందుకు ఏపీ ప్రభుత్వం సరళీకృతమైన విధానాలను అనుసరించనుంది. ఈ క్రమంలోనే ఇకపై ఈ కొనుగోలు కేంద్రాల్లోనే రైతుల నుంచి ఈ- కేవైసీ నమోదు చేసుకునేలా ఏర్పాట్లు చేస్తోంది. మరోవైపు ధాన్యం సేకరణ ప్రక్రియలో ఎన్ని సంస్కరణలు చేపట్టినా కూడా అక్రమాలు జరుగుతూనే ఉన్నాయి.

రైతుల నుంచి దళారులు, కమీషన్ ఏజెంట్లు పట్టాదారు పాసుపుస్తకాలు, బ్యాంక్ అకౌంట్ పుస్తకాలు, ఆధార్ వివరాలు సేకరిస్తున్నారు. వాటిని సిబ్బంది సహకారంతో నమోదు చేయించే ఘటనలు జరుగుతున్నాయి. ఆ తర్వాత రైతుల నుంచి ఈ దళారులు తక్కువ ధరకు ధాన్యం కొనుగోలు చేసి.. ప్రభుత్వానికి కనీస మద్దతు ధరకు అమ్మి సొమ్ము చేసుకుంటున్నారు. దీంతో రైతులు నష్టపోతుండగా.. దళారులు భారీగా లబ్ధి పొందుతున్నారు. ఈ నేపథ్యంలోనే ఇలాంటి అక్రమాలకు చెక్ పెట్టేందుకు ప్రభుత్వం ధాన్యం కొనుగోలు కేంద్రాల్లోనే రైతుల ఈ కేవైసీ పూర్తి చేయాలని నిర్ణయించింది. అలాగే గతంలో వ్యవసాయ శాఖ, పౌరసరఫరాల శాఖ వేర్వేరుగా ఈ కేవైసీ వివరాలు రైతుల నుంచి సేకరించేవి. అయితే ఇక మీదట ధాన్యం కొనుగోలు కేంద్రాల్లోనే ఈ ప్రక్రియ పూర్తిచేసేలా రూల్స్ మార్చారు.

మరోవైపు ధాన్యం సేకరణ ప్రక్రియలో భాగంగా ఏపీ ప్రభుత్వం గతేడాది 34 లక్షల మెట్రిక్ టన్నుల ధాన్యం కొనుగోలు చేసింది. ఈ ఖరీఫ్ సీజన్‌లో 51 లక్షలు మెట్రిక్ టన్నుల ధాన్యం కొనుగోలు చేయాలని నిర్ణయించింది. అలాగే ఈ ప్రక్రియలో ఎలాంటి ఇబ్బందులు కలగకుండా.. తేమ శాతం కొలిచే యంత్రాల నుంచి గన్నీ బ్యాగుల వరకూ, అలాగే రవాణా సదుపాయాలు ముందుగానే సిద్ధం చేయనుంది. అక్టోబర్ 27 నుంచి 3013 రైతు సేవా కేంద్రాలు, 2061 పీపీసీ ధాన్యం కొనుగోలు కేంద్రాలలో..10,700 మంది సిబ్బందితో ధాన్యం సేకరణ ప్రక్రియ చేపట్టనుంది.