భారతీయ విద్యార్థులకు గుడ్‌న్యూస్.. హెచ్1బీ వీసా ఫీజు వారికి మాత్రమే

భారతీయ విద్యార్థులకు ట్రంప్ సర్కార్ గుడ్‌న్యూస్ చెప్పింది. దీంతో అమెరికాలో ఉద్యోగం చేయాలని కలలు కనే వారికి భారీ ఊరట అభించినట్లు అయింది. హెచ్‌1బీ వీసా ఫీజును లక్ష డాలర్లకు పెంచిన విషయం తెలిసిందే. అయితే ఈ ఫీజు ఎవరికి వర్తిస్తుందో అనే విషయంపై చాలా సందేహాలు నెలకొన్నాయి. తాజాగా దానిపై యునైటెడ్ స్టేట్స్ సిటిజెన్‌షిప్ అండ్ ఇమ్మిగ్రేషన్ సర్వీసెస్ (USCIS) క్లారిటీ ఇచ్చింది. హెచ్‌1బీ వీసా కోసం పెంచిన లక్ష డాలర్ల ఫీజు.. దేశం బయట నుంచి వచ్చే అప్లికేషన్లకు మాత్రమే వర్తిస్తుందని స్పష్టం చేసింది. ఇప్పటికే హెచ్1బీ వీసాకు స్పాన్సర్ చేయబడిన అంతర్జాతీయ విద్యార్థులకు ఈ ఫీజు వర్తించదని తెలిపింది.

 USCIS తెలిపిన వివరాల ప్రకారం.. అమెరికాలో ఉన్నత విద్య పూర్తి చేసి.. ఉద్యోగాల కోసం హెచ్‌-1బీ వీసా దరఖాస్తు చేసుకునే అంతర్జాతీయ విద్యార్థుల కోసం కంపెనీలు లక్ష డాలర్లు చెల్లించాల్సిన అవసరం లేదు. ఒకవేళ.. బయట దేశాల నుంచి వచ్చే వారికి కంపెనీలు హెచ్1బీ వీసా స్పాన్సర్ చేయాలనుకుంటే.. ఈ మొత్తం చెల్లించాల్సి ఉంటుందని USCIS క్లారిటీ ఇచ్చింది. అంటే అమెరికాలో ఉద్యోగం చేయాలనుకుంటే.. ముందుగా అక్కడ కొన్నేళ్లు చదువుకోవాల్సి ఉంటుంది.

ఇక ఛేంజ్ ఆఫ్ స్టేటస్‌కు కూడా పెంచిన వీసా ఫీజు వర్తించదని USCIS స్పష్టం చేసింది. అంటే F-1 విద్యార్థి వీసా నుంచి H-1Bకి మారితే లేదా అమెరికాలో ఇంకా ఉండటానికి వీసా ఎక్స్‌టెన్షన్ కోరినా.. లక్ష డాలర్ల ఫీజు వర్తించదు. సెప్టెంబర్ 21న హెచ్‌1బీ వీసాపై ప్రకటన వెలువడిన తర్వాత దాఖలైన దరఖాస్తులకు మాత్రమే ఇది వర్తిస్తుందని వెల్లడించింది. ఈ ఫీజు చెల్లింపుల కోసం ఆన్‌లైన్‌ సేవలు ప్రారంభించినట్లు తెలిపింది. ఇప్పటికే హెచ్1బీ వీసా కలిగిఉన్నవారు అమెరికాకు రావచ్చు, అమెరికా విడిచి వెళ్లొచ్చని USCIS తెలిపింది.

గత నెల హెచ్1బీ వీసాపై ఫీజు పెంపు ప్రకటించాక అనేక ప్రశ్నలు ఉత్పన్నమయ్యాయి. దీనిపై ట్రంప్ సర్కార్ ఎలాంటి స్పష్టత ఇవ్వలేదు. అయితే తాజాగా USCIS చేసిన ప్రకటనలో ఈ ప్రశ్నలకు సమాధానాలిచ్చింది. ఇక F-1 (విద్యార్థి వీసా), L-1 (తాత్కాలిక పని వీసా) లబ్ధిదారులకు ఈ భారీ ఫీజు నుంచి విముక్తి లభించిందని నిపుణులు చెబుతున్నారు. ఇది విదేశీ విద్యార్థుల భవిష్యత్తుకు ఉపశమనం కలిగించే నిర్ణయమని చెప్పారు. ఈ మార్పులు అమెరికాలో ఉన్న ఉద్యోగుకు, విద్యార్థులకు.. ఇమ్మిగ్రేషన్ ఖర్చులను తగ్గించేందుకు సహాయపడతాయని అంటున్నారు.