జపాన్‌కు తొలి 'లేడీ' లీడర్.. పార్లమెంట్‌ ఓటుతో ప్రధాని పీఠం దక్కించుకున్న సనే తకాయిచి

జపాన్‌ రాజకీయ చరిత్రలో మంగళవారం నూతన అధ్యాయం మొదలైంది. దేశ చరిత్రలోనే మొట్ట మొదటి మహిళా ప్రధానిగా 64 ఏళ్ల సనే తకాయిచి నియమితులయ్యారు. చైనా పట్ల కఠిన వైఖరి, సంప్రదాయవాద భావాలు కలిగిన నాయకురాలిగా పేరున్న తకాయిచి.. చివరి నిమిషంలో సంకీర్ణ ఒప్పందాన్ని కుదుర్చుకోవడం ద్వారా ప్రధాని పదవిని చేపట్టారు.

బ్రిటన్‌ మాజీ ప్రధాని మార్గరెట్ థాచర్‌ను ఆదర్శంగా భావించే తకాయిచి.. అధికార లిబరల్‌ డెమోక్రటిక్‌ పార్టీ అధ్యక్షురాలిగా అక్టోబర్ 4న ఎన్నికయ్యారు. అయితే ఎల్డీపీలో నెలకొన్న అవినీతి కుంభకోణం, తకాయిచి కఠిన సంప్రదాయ భావజాలం కారణంగా.. ఎల్డీపీకి దశాబ్దాలుగా మద్దతుగా ఉన్న మిత్రపక్షం కోమెయిటో పార్టీ ఆరు రోజులకే సంకీర్ణం నుంచి తప్పుకుంది. దీంతో తకాయిచి ప్రభుత్వం ప్రమాదంలో పడింది. అయితే సోమవారం సాయంత్రం జపాన్ ఇన్నోవేషన్ పార్టీతో సంకీర్ణ ఒప్పందం కుదుర్చుకోవడం ద్వారా ఆమె మెజారిటీని దక్కించుకున్నారు. పార్లమెంటులో జరిగిన తొలి రౌండ్‌ ఓటింగ్‌లోనే అనూహ్యంగా ఆమెకు మెజారిటీ దక్కడంతో ప్రధానిగా నియమితులు అయ్యారు. అయితే ఉభయ సభల్లోనూ సంయుక్తంగా మెజారిటీ లేకపోవడం వల్ల ఈ ప్రభుత్వం మైనారిటీ గవర్నమెంట్‌గా కొనసాగనుంది. గత ఐదేళ్లలో జపాన్‌కు ఐదో ప్రధాని కావడం గమనార్హం.

 కొత్త ప్రధానిగా తకాయిచి ముందు అనేక సవాళ్లు ఉన్నాయి. వచ్చే వారం అమెరికా అధ్యక్షుడు డోనాల్డ్ ట్రంప్ పర్యటించనున్నారు. ఇటీవల మిత్ర దేశాలపై కూడా ఎడాపెడా టారిఫ్‌లు విధిస్తున్న ట్రంప్‌.. జపాన్‌ను కూడా విడిచిపెట్టలేదు. మరోవైపు రష్యా ఇంధన దిగుమతులను ఆపాలని, జపాన్‌ తన సైనిక వ్యయాన్ని పెంచాలని ట్రంప్ డిమాండ్‌ చేస్తున్నారు. ఈ నేపథ్యంలో అమెరికాతో దౌత్య సంబంధాలకు అధిక ప్రాధాన్యం ఇస్తానని తకాయిచి తెలిపారు.

చైనాను ప్రబల శత్రువుగా భావిస్తారు తకాయిచి. అయితే ప్రధాని పదవిని దక్కించుకునే క్రమంలో ఆమె చైనా పట్ల తన వైఖరిని కొంతవరకు తగ్గించుకున్నట్లు తెలుస్తోంది. జపాన్‌ సైనికీకరణకు గుర్తుగా భావించే యషుకుని ఆలయాన్ని ఆమె తరుచూ సందర్శిస్తుంటారు. అయితే గత వారం ఆ దేవాలయ సందర్శనకు కూడా దూరంగా ఉన్నారు.

మరోవైపు దేశ ఆర్థిక వ్యవస్థకు కొత్త ఊపునివ్వడం, క్షీణిస్తున్న జనాభాను నియంత్రించడం వంటి కీలక అంతర్గత సవాళ్లు ఆమె ముందున్నాయి. లింగ సమానత్వంలో ప్రపంచంలో 148 దేశాల్లో 118వ స్థానంలో ఉన్న జపాన్‌లో, ప్రధానిగా తకాయిచి రావడం ఒక మైలురాయిగా భావిస్తున్నప్పటికీ, సంప్రదాయవాది కావడంతో మహిళా సమస్యలపై ఆమె వైఖరి కొంత గందరగోళంగా ఉండే అవకాశం ఉంది.

మాజీ ప్రధాని షింజో అబెకు ఆమె ప్రధాన అనుచరురాలిగా తకాయిచి గుర్తింపు పొందారు. ఆయన మంత్రివర్గంలో పనిచేశారు. 2019–20 మధ్య దేశ అంతర్గత వ్యవహారాలు, సమాచార శాఖ మంత్రిగా తకాయిచి బాధ్యతలు నిర్వర్తించారు. ఫుమియో కిషిడా మంత్రివర్గంలో 2022–24 మధ్య ఆర్థిక భద్రత సహాయ మంత్రిగా పనిచేశారు. 2024లో కూడా ఆమె పార్టీ అధ్యక్ష పదవికి పోటీ పడ్డారు. కానీ షిగేరు ఇషిబా చేతిలో ఓడిపోయారు. ముచ్చటగా మూడోసారి పట్టువదలక ప్రయత్నించి విజయం సాధించి ప్రధాని పదవిని చేపట్టారు. ఆమె జపాన్‌ తొలి మహిళా ప్రధానిగానే కాకుండా నారా ప్రావిన్స్‌ నుంచి తొలి ప్రధానిగా కూడా రికార్డు సృష్టించారు.