బౌండరీల వర్షం కురిపించిన కర్రన్‌.. ఫ్యామిలీకి గర్వకారణం!

స్వదేశంలో ఆఫ్ఘనిస్తాన్‌తో జరుగుతున్న ఏకైక టెస్ట్ మ్యాచ్‌లో జింబాబ్వే బ్యాటర్ బెన్ కర్రన్ (Ben Curran) అద్భుతమైన సెంచరీతో మెరిశాడు.ఇంగ్లాండ్‌ ఆటగాళ్లు సామ్ కర్రన్, టామ్ కర్రన్లకు సోదరుడైన బెన్, జింబాబ్వే తరఫున టెస్ట్ క్రికెట్‌లో తన తొలి శతకాన్ని నమోదు చేశాడు.ఇంతకుముందు వన్డేల్లో కూడా సెంచరీ చేసిన బెన్‌.. కర్రన్ ఫ్యామిలీలో రెండు ఫార్మాట్లలో సెంచరీ చేసిన మొదటి ఆటగాడిగా రికార్డుల్లోకెక్కాడు.కర్రన్ కుటుంబంలో మొత్తం నలుగురు క్రికెటర్లు ఉన్నారు. వీరిలో తండ్రి కెవిన్ కర్రన్ జింబాబ్వే తరఫున 11 వన్డేలు ఆడాడు. ఆ మ్యాచ్‌లలో 9 వికెట్లు తీసి, రెండు అర్ధసెంచరీలతో కలిపి 287 పరుగులు చేశాడు.సోదరుడు సామ్ కర్రన్ ఇంగ్లాండ్ తరఫున 24 టెస్ట్‌లు, 35 వన్డేలు, 63 టీ20లు ఆడినా ఇప్పటివరకు ఒక సెంచరీ కూడా చేయలేదు. మరో సోదరుడు టామ్ కర్రన్ కూడా ఇంగ్లాండ్ తరఫున 2 టెస్ట్‌లు, 28 వన్డేలు, 30 టీ20లు ఆడినా మూడంకెల స్కోరు తాకలేదు.తండ్రి కెవిన్, సామ్ ఇద్దరూ ఆల్‌రౌండర్లు కాగా, టామ్ స్పెషలిస్టు బౌలర్‌. అందుకే వీరికి టాప్ ఆర్డర్‌లో ఎక్కువ బ్యాటింగ్‌ చేసే అవకాశాలు రాలేదు.అయితే బెన్ కర్రన్ మాత్రం జింబాబ్వేకు స్పెషలిస్టు బ్యాటర్‌గా, ఓపెనర్‌గా బరిలోకి దిగుతాడు. ఆ కారణంగానే వన్డేల్లోనూ, టెస్ట్‌ల్లోనూ శతకాలు సాధించే అవకాశం అతనికి దక్కింది. తండ్రి జన్మస్థలం కావడంతో జింబాబ్వే పౌరసత్వం పొంది, ఆ దేశానికే ప్రాతినిధ్యం వహిస్తున్నాడు.మ్యాచ్ విషయానికి వస్తే – బెన్ కర్రన్ శతకం (121)తో మెరిపించడంతో, జింబాబ్వే తొలి ఇన్నింగ్స్‌లో భారీ స్కోర్ దిశగా దూసుకుపోతోంది. రెండో రోజు టీ విరామ సమయానికి జింబాబ్వే 6 వికెట్ల నష్టానికి 302 పరుగులు చేసింది.బ్రియాన్ బెన్నెట్‌ (6), నిక్ వెల్చ్‌ (49), బ్రెండన్ టేలర్‌ (32), కెప్టెన్ క్రెయిగ్ ఎర్విన్‌ (5), సికందర్ రజా (65) ఔటవగా, ట్సిగా (11), బ్రాడ్ ఈవాన్స్‌ క్రీజ్‌లో ఉన్నారు.ఆఫ్ఘనిస్తాన్ బౌలర్లలో జియా ఉర్ రెహ్మాన్‌ 3 వికెట్లు, ఇస్మత్ ఆలం 2, షరాఫుద్దీన్ ఓ వికెట్ తీశారు. ప్రస్తుతం జింబాబ్వే ఆఫ్ఘనిస్తాన్ తొలి ఇన్నింగ్స్‌పై 175 పరుగుల ఆధిక్యంలో ఉంది.ముందుగా బ్యాటింగ్ చేసిన ఆఫ్ఘనిస్తాన్ జట్టు కేవలం 127 పరుగులకే ఆలౌటైంది. యువ పేసర్ బ్రాడ్ ఈవాన్స్‌ (Brad Evans) చెలరేగి 9.3 ఓవర్లలో కేవలం 22 పరుగులకే 5 వికెట్లు పడగొట్టాడు.అతనికి బ్లెస్సింగ్ ముజరబానీ (11-1-4-3), తనక చివంగ (6-0-29-1) కూడా అద్భుతంగా తోడయ్యారు.ఆఫ్ఘనిస్తాన్ ఇన్నింగ్స్‌లో రహ్మానుల్లా గుర్బాజ్‌ (37) టాప్ స్కోరర్‌గా నిలిచాడు.ఏకైక టెస్ట్ అనంతరం, రెండు జట్లు హరారే వేదికగా మూడు టీ20ల సిరీస్‌ ఆడనున్నాయి — అక్టోబర్‌ 29, 31, నవంబర్‌ 2 తేదీల్లో ఈ మ్యాచ్‌లు జరుగుతాయి.