సీనియర్లకు ఏకంగా 8.10 శాతం వడ్డీ.. రూ.5 లక్షలు జమ చేస్తే ఎంతొస్తుందంటే

 రిజర్వ్ బ్యాంక్ ఆఫ్ ఇండియా ఈ ఏడాది వరుసగా మూడు సార్లు పాలసీ రేట్లను తగ్గించిన సంగతి తెలిసిందే. దీంతో బ్యాంకులు సైతం డిపాజిట్లపై వడ్డీ రేట్లను భారీగా తగ్గించేశాయి. ఫిక్స్‌డ్ డిపాజిట్లపై తక్కువ వడ్డీ రేట్లు ఇస్తుండడంతో ఇన్వెస్టర్లు అధిక వడ్డీ వచ్చే మార్గాల కోసం చూస్తున్నారు. అయితే, స్థిరమైన రాబడి కోరుకునే సీనియర్ సిటిజన్లు బ్యాంకు డిపాజిట్లనే ఎంచుకుంటుంటారు. అయితే, తక్కువ వడ్డీ రేట్లతో రాబడి కోల్పోవాల్సి వస్తుంది. కానీ, ఇప్పటికీ వాళ్లు అధిక వడ్డీ పొందవచ్చు. కొన్ని బ్యాంకులు 60 సంవత్సరాలు దాటిన సీనియర్ సిటిజన్లకు గరిష్ఠంగా 8.10 శాతం వరకు వడ్డీ రేట్లు ఆఫర్ చేస్తున్నాయి. రూ.3 కోట్ల లోపు ఉండే రిటైల్ టర్మ్ డిపాజిట్లపై 5 సంవత్సరాల మెచ్యూరిటీ పీరియడ్‌పై గరిష్ఠ వడ్డీ రేట్లు ఆఫర్ చేస్తున్నాయి.

సూర్యోదయ స్మాల్ ఫైనాన్స్ బ్యాంక్

చిన్న బ్యాంకుల్లో మంచి ఆదరణ పొందుతవున్న సూర్యోదయ స్మాల్ ఫైనాన్స్ బ్యాంక్ ప్రస్తుతం 5 ఏళ్ల టర్మ్ డిపాజిట్లపై సీనియర్ సిటిజన్లకు 8.10 శాతం వడ్డీ ఆఫర్ చేస్తోంది. ఇందులో 60 ఏళ్లు దాటిన ఒక వ్యక్తి రూ.5 లక్షలు జమ చేస్తే మెచ్యూరిటీ తర్వాత అసలు, వడ్డీ మొత్తం కలిపి రూ. 7,00,000 వరకు లభిస్తాయి.

జన స్మాల్ ఫైనాన్స్ బ్యాంక్

ఈ స్మాల్ ఫైనాన్స్ బ్యాంక్ లో సీనియర్ సిటిజన్లకు 5 ఏళ్ల టెన్యూర్ ఎఫ్‌డీల ద్వారా 8 శాతం వడ్డీ లభిస్తోంది. ఇందులో రూ.5 లక్షలు జమ చేసినట్లయితే 5 ఏళ్ల తర్వాత చేతికి అసలు, వడ్డీ మొత్తం రూ. 6,97,000 వరకు వస్తాయి.

ఉత్కర్ష్ స్మాల్ ఫైనాన్స్ బ్యాంక్

ఈ ఎస్‌ఎఫ్‌బీ లో సీనియర్ సిటిజన్లకు ఇప్పుడు 4 సంవత్సరాల టెన్యూర్ ఎఫ్‌డీలపై గరిష్టంగా 7.70 శాతం మేర వడ్డీ ఆఫర్ చేస్తోంది. ఇందులో గనక రూ.5 లక్షలు జమ చేసి 5 ఏళ్లు ఆగితే అప్పుడు చేతికి అసలు, వడ్డీ మొత్తం రూ. 6,89,800 వరకు అందుతాయి.

అయితే చాలా మంది స్మాల్ ఫైనాన్స్ బ్యాంకుల్లో ఇన్వెస్ట్ చేసేందుకు వెనకుడుగు వేస్తుంటారు. ఎస్‌బీఐ వంటి పెద్ద బ్యాంకుల్లో వడ్డీ తక్కువున్నా వాటి వైపే మొగ్గుచూపుతారు. అయితే, చిన్న బ్యాంకులు సైతం ఆర్‌బీఐ పరిధిలోనే ఉంటాయి. వాటికి సైతం రూ.5 లక్షల వరకు డిపాజిట్ ఇన్సూరెన్స్ క్రెడిట్ గ్యారెంటీ కార్పొరేషన్ ద్వారా బీమా కవరేజీ ఉంటుంది. అంటే బ్యాంక్ దివాలా తీసిన మీ రూ.5 లక్షలకు ఎలాంటి నష్టం ఉండదు.