ఏపీ ప్రజలకు ఈ కొత్త రూల్ తెలుసా.. ఇలా చేయకపోతే ప్రభుత్వ పథకాలు కట్

ఆంధ్రప్రదేశ్‌ ప్రజలకు ముఖ్యమమైన గమనిక.. రాష్ట్రంలో సంక్షేమ పథకాలు పొందుతున్నవారు తప్పనిసరిగా ఈకేవైసీ చేయించుకోవాలని ప్రభుత్వం ఆదేశించింది. ఈకేవైసీ చేస్తే అర్హులైన వారికే పథకాలు అందుతాయని చెబుతున్నారు. దీంతో గ్రామ, వార్డు సచివాలయాల్లో ప్రత్యేకంగా క్యాంప్‌లు నిర్వహిస్తున్నారు. ఈకేవైసీ చేసుకోవడానికి ఆధార్‌ కార్డు తప్పనిసరి. మీ ఆధార్‌తో లింక్ చేసిన మొబైల్ నంబర్‌కు వచ్చే ఓటీపీ (వన్ టైమ్ పాస్‌వర్డ్) ద్వారా ఈకేవైసీని సులభంగా పూర్తి చేయవచ్చు. ప్రభుత్వం దీనికోసం ఒక ప్రత్యేకమైన వెబ్‌సైట్ లింక్‌ను కూడా అందుబాటులోకి తెచ్చింది.

 రాష్ట్రంలో గ్రామ, వార్డు సచివాలయ సిబ్బంది ఈకేవైసీ ప్రక్రియ పూర్తి చేయాలంటే ఆలస్యం జరిగే అవకాశం ఉండటంతో లబ్ధిదారులే స్వయంగా ఈకేవైసీ చేసుకునేలా ప్రభుత్వం అవగాహన కల్పిస్తోంది.. సచివాలయాల వద్ద ప్రత్యేక కార్యక్రమాలు చేపడుతున్నారు. ఈకేవైసీ చేయించుకోవడానికి డెడ్‌లైన్‌ను త్వరలో ప్రభుత్వం ప్రకటించే అవకాశం ఉందని చెబుతున్నారు. కాబట్టి ప్రభుత్వ పథకాలకు అర్హులైన లబ్ధిదారులందరూ వెంటనే ఈకేవైసీ ప్రక్రియను పూర్తి చేసుకోవాలని సూచిస్తున్నారు.

ఇటు స్కూల్, జూనియర్ కాలేజీల విద్యార్థులకు తల్లికి వందనం.. కాలేజీ విద్యార్థులకు ఫీజు రీయింబర్స్‌మెంట్ వంది పథకాలు ద్వారా లబ్ధి పొందుతున్నారు. కాబట్టి వారు కూడా ఈకేవైసీ ప్రక్రియను పూర్తి చేసుకోవాలని సూచిస్తున్నారు అధికారులు. ఈ మేరకు విద్యార్థుల్లో వయసు రెండు కేటగిరీలుగా (5-15, 15-17 విభాగాల్లో) వారీగా బాలాధార్‌ సవరణ కార్యక్రమాన్ని ప్రభుత్వం చేపట్టింది. వీరంతా జనరల్ ఆధార్‌గా మార్చుకోవలని సూచిస్తున్నారు. వీరంతా తప్పనిసరిగా బయోమెట్రిక్ చేయించుకోవాల్సిందే.

విద్యా శాఖ యుడైస్‌ ప్లస్‌లో ఇంకా విద్యార్థుల పేర్లు ఉన్నాయి. వీరందరికీ జనరల్‌ ఆధార్‌ అప్‌గ్రేడ్ చేసుకునే ప్రక్రియను అక్టోబరు 20న ప్రారంభించారు. అయితే మొంథా తుఫాన్ కారణంగా వాయిదా పడగా.. మళ్లీ ప్రారంభించనున్నారు. కేంద్రం అంగన్‌వాడీ కేంద్రంలోని పిల్లలకు కచ్చితంగా ఆధార్‌ నమోదు చేయాలని ఆదేశించిన సంగతి తెలిసిందే. అందుకే ఐసీడీఎస్‌ ప్రాజెక్టుల సీడీపీవోలు, సూపర్‌వైజర్లు వారి పరిధిలోని పిల్లలకు ఆధార్‌ తీసుకునే బాధ్యతలను అప్పగించారు. మొత్తం మీద ఏపీ ప్రభుత్వం పథకాలలో పారదర్శకత కోసం ఇలా ఈకేవైసీ ప్రక్రియను చేపట్టింది.