ఇప్పటికే భారతీయ విద్యార్థుల వీసాలు తిరస్కరణ,,,సామూహిక వీసా రద్దుకు కెనడా ప్రయత్నాలు

ఉన్నత విద్య కోసం కెనడా వెళ్లాలని కలలు కంటున్న వేలాది మంది భారతీయ విద్యార్థులకు ఇటీవల భారీ షాక్ ఇచ్చింది ఆ దేశం. దరఖాస్తు చేసుకున్న ప్రతి నలుగురిలో దాదాపు ముగ్గురు.. అంటే 74 శాతం మంది విద్యార్థుల స్టడీ పర్మిట్లను కెనడా ఇమ్మిగ్రేషన్ అధికారులు నిరాకరించిన విషయం తెలిసిందే. అయితే రెండేళ్లలోనే రెట్టింపు కావడం గమనార్హం. కాగా, కెనడా ఇప్పుడు మరో పిడుగు వేయనున్నట్లు తెలుస్తోంది. సామూహికంగా వీసాలను రద్దు చేసేందుకు ప్రయత్నిస్తున్నట్లు వార్తలు వస్తున్నాయి. ఇలా మాస్ వీసా క్యాన్సిలేషన్ అధికారాల కోసం కెనడా ప్రభుత్వం ప్రయత్నిస్తున్నట్లు తెలుస్తోంది. ఇందుకు సంబంధించి అమెరికా సంస్థలతో కలిసి.. ఇమిగ్రేషన్‌, రెఫ్యూజీ, సిటిజన్‌షిప్‌ కెనడా, కెనడా బోర్డర్‌ సర్వీసెస్ ఏజెన్సీలు.. ఇమిగ్రేషన్‌ మంత్రిత్వశాఖకు ఇప్పటికే ఓ ప్రజెంటేషన్‌ ఇచ్చినట్లు అంతర్జాతీయ మీడియా కథనాలు ప్రచురించింది.

 వీసా మోసాలను అరికట్టేందుకు కెనడా ఈ ప్రణాళికలు సిద్ధం చేస్తున్నట్లు సమాచారం. ముఖ్యంగా భారత్‌, బంగ్లాదేశ్‌ నుంచి వీసా మోసాలు పెరుగుతున్నాయన్న అనుమానాల నేపథ్యంలో ఈ నిర్ణయం తీసుకుందని తెలుస్తోంది. ఈ మేరకు ఇచ్చిన ప్రెజెంటేషన్‌లో.. మోసపూరిత విజిటింగ్‌ వీసా దరఖాస్తులను రిజెక్ట్ చేయడం, రద్దు చేయడం కోసం కెనడా సంస్థలు.. అమెరికా భాగస్వామ్యపక్షాలు ఓ వర్కింగ్‌ గ్రూప్‌గా ఏర్పడినట్లు తెలుస్తోంది. ముఖ్యంగా భారత్‌, బంగ్లాదేశ్‌ నుంచి వచ్చే వీసా దరఖాస్తుల విషయంలో కఠినంగా వ్యవహరించే అవకాశం ఉందని అనే అభిప్రాయాలు వ్యక్తమవుతున్నాయి. దీనికి సంబంధించిన బిల్లును పార్లమెంటులోనూ ప్రవేశపెట్టనున్నట్లు సమాచారం. ఇదే జరిగితే.. మహమ్మారి, యుద్ధాలు వంటి అసాధారణ సందర్భాల్లో లేదా నిర్దిష్ట దేశాల వారి వీసాలను సామూహికంగా రద్దు చేయడానికి ఆ దేశ అధికారులకు అనుమతి వస్తుంది.

కెనడా తీరుపై తీవ్ర ఆందోళనలు..

కాగా, కెనడా ఇలా చేస్తుందనే వార్తా నివేదికలతో తీవ్ర అందోళనలు వ్యక్తమవుతున్నాయి. కెనడా ప్రవేశపెట్టబోతున్నట్లు చెబుతున్న బిల్లుపై దాదాపు 300 స్వచ్ఛంద సంస్థలు ఆందోళనలు వ్యక్తం చేస్తున్నయి వార్త కథనాలు పేర్కొన్నాయి. ఈ తరహాలో వీసాలను రద్దు చేయడం.. ‘సామూహిక బహిష్కరణ కార్యక్రమాన్ని’ చేపట్టేందుకు ప్రభుత్వానికి వీలు కల్పిస్తుందని మైగ్రెంట్‌ రైట్స్‌ నెట్‌వర్క్‌ వెల్లడించింది. పెరుగుతున్న పెండింగ్‌ వీసా దరఖాస్తులను తగ్గించేందుకు ప్రభుత్వం ఇలా చేస్తోందని నిపుణులు అంటున్నారు. కెనడా తీరుపై ఆశ్చర్యం వ్యక్తం చేస్తున్నారు.

భారత్‌ను తృష్టిలో పెట్టుకునే కెనడా ఈ మాస్ వీసా క్యాన్సిలేషన్ల హక్కుల కోసం ప్రయత్నిస్తోందనే అభిప్రాయాలు వ్యక్తమవుతున్నాయి. ఇంతకుముందు భారతీయ విద్యార్థుల పట్ల కూడా కెనడా ఇదే వైఖరి అవలంభించింది. భారత విద్యార్థుల తిరస్కరణ రేటు (74 శాతం).. మిగతా అంతర్జాతీయ విద్యార్థుల సగటుతో (40 శాతం) పోలిస్తే చాలా ఎక్కువ కావడం గమనార్హం.