ఆ రూట్లో కొత్తగా వందే భారత్ రైలు, 2 గంటల ప్రయాణ సమయం తగ్గింపు

దేశంలో రైలు ప్రయాణికులకు మరింత వేగమైన, సౌకర్యవంతమైన రైలు ప్రయాణాన్ని అందించేందుకు కేంద్ర ప్రభుత్వం సెమీ హైస్పీడ్ రైళ్లను ప్రవేశపెట్టింది. వందే భారత్ ఎక్స్‌ప్రెస్‌ పేరుతో 2019లో రైల్వే శాఖ తీసుకొచ్చిన ఈ సెమీ హైస్పీడ్ రైళ్లపై రైలు ప్రయాణికులు బాగా ఆసక్తి చూపిస్తున్నారు. ఈ క్రమంలోనే విడతల వారీగా దేశంలోని చాలా ప్రాంతాలకు ఈ వందే భారత్ ఎక్స్‌ప్రెస్ రైళ్లను ప్రవేశపెడుతున్నారు. ఇప్పటివరకు దేశంలోని వివిధ మార్గాల్లో 160 వందే భారత్ రైళ్లు పరుగులు పెడుతుండగా.. తాజాగా మరో నాలుగు కొత్త వందే భారత్ ఎక్స్‌ప్రెస్ రైళ్లు పట్టాలెక్కాయి.

ఉత్తర్‌ప్రదేశ్‌లోని వారణాసి నుంచి ప్రధానమంత్రి నరేంద్ర మోదీ శనివారం నాలుగు వందే భారత్ ఎక్స్‌ప్రెస్ రైళ్లను జెండా ఊపి ప్రారంభించారు. ఈ వందే భారత్ రైళ్ల రాకతో.. కీలక స్టేషన్ల మధ్య ప్రయాణ సమయం గణనీయంగా తగ్గనుందని రైల్వే వర్గాలు వెల్లడించాయి. బెంగళూరు-ఎర్నాకుళం.. బనారస్-ఖజురహో.. లక్నో-సహరాన్‌పూర్.. ఫిరోజ్‌పూర్-ఢిల్లీ మార్గాల్లో ఈ కొత్త వందే భారత్ రైళ్లు ప్రయాణించనున్నాయి.

బెంగళూరు-ఎర్నాకుళం వందే భారత్ ఎక్స్‌ప్రెస్.. 583 కిలోమీటర్లు ప్రయాణించనుంది. ఇందుకు 8.40 గంటల సమయం పట్టనుంది. అయితే సాధారణ రైళ్లతో పోల్చితే ఈ వందే భారత్ రైలులో ప్రయాణిస్తే.. 2.20 గంటల సమయం ఆదా అవుతుంది. ఇక బనారస్-ఖజురహో వందే భారత్ రైలు.. 443 కిలోమీటర్ల దూరాన్ని 7.40 గంటల్లో ప్రయాణించనుంది. ప్రస్తుతం ఆ మార్గంలో ప్రయాణిస్తున్న రైళ్లతో పోల్చితే ఈ వందే భారత్ రైలు.. 2.40 గంటల సమయం తగ్గనుంది.

లక్నో-సహరాన్‌పూర్ మధ్య ప్రయాణించనున్న వందే భారత్ ఎక్స్‌ప్రెస్ రైలు.. 518 కిలోమీటర్ల దూరాన్ని 7.45 గంటల్లో చేరుకోనుంది. ఈ వందే భారత్ రైలు.. మిగిలిన రైళ్లతో పోల్చితే దాదాపు 1 గంట సమయాన్ని ఆదా చేయనుంది. ఫిరోజ్‌పూర్-ఢిల్లీ వందే భారత్ రైలు.. 486 కిలోమీటర్ల దూరాన్ని 6.40 గంటలు ప్రయాణించనుంది. ఇక ఈ మార్గంలో అత్యంత వేగవంతమైన రైలు ఇదే కావడం గమనార్హం.

బెంగళూరు-ఎర్నాకుళం వందే భారత్ రైలు.. కేరళ, తమిళనాడు, కర్ణాటక రాష్ట్రాలను కలుపుతూ నడిచే మొదటి ఇంటర్‌-స్టేట్ సెమీ-హై-స్పీడ్ ప్రీమియం సర్వీస్ కావడం విశేషం. ఇక బనారస్-ఖజురహో వందే భారత్ ఎక్స్‌ప్రెస్ రైలు.. వారణాసి, ప్రయాగ్‌రాజ్, చిత్రకూట్‌తో సహా ప్రముఖ సాంస్కృతిక, మతపరమైన ప్రాంతాలను కలుపుతూ ప్రయాణిస్తుంది. లక్నో-సహరాన్‌పూర్ వందే భారత్ ఎక్స్‌ప్రెస్.. ప్రయాణించే ఈ మార్గం రూర్కీ మీదుగా హరిద్వార్‌కు కూడా మెరుగైన ప్రయాణాన్ని అందిస్తుంది. ఫిరోజ్‌పూర్-ఢిల్లీ వందే భారత్ రైలు.. ఢిల్లీని పంజాబ్‌లోని ఫిరోజ్‌పూర్, భటిండా, పాటియాల వంటి ముఖ్య నగరాలతో కలుపుతుంది.