ఢిల్లీ పేలుడు సూత్రధారి తొలి చిత్రం విడుదల

దేశ రాజధాని ఢిల్లీని ఒక్కసారిగా ఉలిక్కిపడేలా చేసిన ఎర్రకోట సమీపంలో జరిగిన భారీ కారు పేలుడు ఘటనలో కీలక పరిణామం చోటుచేసుకుంది. ఈ ఘాతుకానికి ప్రధాన సూత్రధారిగా భావిస్తున్న వ్యక్తి, డాక్టర్ ఉమర్ మొహమ్మద్ తొలి ఫొటోను దర్యాప్తు సంస్థలు విడుదల చేశాయి. అయితే అతను ఈ పేలుడులో మరణించాడా లేక పరారీలో ఉన్నాడా అనే విషయంపై ఇంకా స్పష్టత రాలేదు.

సోమవారం సాయంత్రం రద్దీగా ఉండే ప్రాంతంలో జరిగిన ఈ పేలుడులో మొత్తంగా 13 మంది ప్రాణాలు కోల్పోయారు. 20 మందికి పైగా తీవ్ర గాయాల పాలయ్యారు. క్షతగాత్రులను వెంటనే సమీపంలోని లోక్ నాయక్ జై ప్రకాష్ నారాయణ్ ఆసుపత్రికి తరలించారు. పేలుడు జరిగిన రోజు ఎర్రకోట మూసివేసి ఉంచడంతో.. పెద్ద ఎత్తున ప్రాణనష్టం తప్పిందని అధికారులు తెలిపారు.

పోలీసుల ప్రాథమిక దర్యాప్తు ప్రకారం.. ఈ అత్యంత తీవ్రమైన పేలుడు ఎర్రకోట మెట్రో స్టేషన్ సమీపంలో నెమ్మదిగా కదులుతున్న హ్యుందాయ్ ఐ20 కారులో జరిగింది. పేలుడు సమయంలో కారులో ముగ్గురు వ్యక్తులు ఉన్నట్లు పోలీసులు ధ్రువీకరించారు. ఒక సీనియర్ పోలీసు అధికారి మాట్లాడుతూ.. కదులుతున్న ఐ20 కారులో పేలుడు జరిగిందని చెప్పారు. అయితే పేలుడులో గాయపడిన వారి శరీరాలపై సాధారణంగా కనిపించే పెల్లెట్ గాయాలు లేకపోవడం అసాధారణంగా ఉందన్నారు. ఇది ఆత్మాహుతి దాడి అయి ఉంటుందా అనే కోణంలోనూ విచారణ చేస్తున్నామని తెలిపారు.

ఫోరెన్సిక్ అధికారుల ప్రాథమిక విశ్లేషణ ప్రకారం.. ఈ పేలుడులో అమ్మోనియం నైట్రేట్, ఫ్యూయెల్ ఆయిల్, ఇతర పేలుడు పదార్థాల మిశ్రమం ఉన్నట్లు గుర్తించారు. ఈ ఘటన జరగడానికి కొన్ని గంటల ముందు జమ్మూ కాశ్మీర్, హర్యానా, ఉత్తర ప్రదేశ్ పోలీసు బృందాలు ఫరీదాబాద్‌లోని ఓ కాశ్మీరీ వైద్యుడి అద్దె ఇంటి నుంచి సుమారు 360 కిలోల అనుమానాస్పద అమ్మోనియం నైట్రేట్‌ను, భారీ ఆయుధాలను స్వాధీనం చేసుకున్నాయి.

ఢిల్లీలో జరిగిన పేలుడుకు, ఫరీదాబాద్‌లో స్వాధీనం చేసుకున్న పేలుడు పదార్థాలకు ఏదైనా సంబంధం ఉందా అనే కోణంలోనూ దర్యాప్తు సంస్థలు లోతుగా విచారిస్తున్నాయి. డాక్టర్ ఉమర్ మొహమ్మద్ ఫొటో విడుదల కావడంతో దర్యాప్తు కొత్త మలుపు తిరిగింది. దేశవ్యాప్తంగా కలకలం సృష్టించిన ఈ కేసులో.. ప్రధాన సూత్రధారి పాత్రను, పేలుడుకు గల ఖచ్చితమైన కారణాన్ని, ఈ కుట్ర వెనుక ఉన్న ఇతర వ్యక్తులను గుర్తించేందుకు దర్యాప్తు సంస్థలు తీవ్రంగా ప్రయత్నిస్తున్నాయి.