అల్లూరి జిల్లా అరకులోయ ఆస్పత్రిలో సెల్ ఫోన్ చోరీ

అల్లూరి సీతారామరాజు జిల్లా అరకులోయ ప్రభుత్వ ఆస్పత్రిలో సెల్ ఫోన్ దొంగతనం కలకలం రేపింది. ఆస్పత్రిలోకి అర్థరాత్రి సమయంలో ఓ ఆగంతకుడు చొరబడ్డాడు. ఆస్పత్రిలోని రోగులు అందరూ మంచి గాఢ నిద్రలో ఉన్న సమయంలో లోనికి ప్రవేశించాడు. ఓ వార్డులోకి చొరబడిన దుండగుడు.. అందులోని రోగుల మొబైల్ ఫోన్ ఎత్తుకెళ్లాడు. అయితే ఈ వ్యవహారం మొత్తం ఆసుపత్రిలోని సీసీ కెమెరాల్లో రికార్డైంది. దీంతో ఇతగాడి యవ్వారం బయటకు వచ్చింది. మరోవైపు పుటేజీ ఆధారంగా దొంగను గుర్తించే పనిలో పోలీసులు ఉన్నారు. అయితే ఈ వీడియో సోషల్ మీడియాలో వైరలైంది. దీంతో స్థానికులు మండిపడుతున్నారు. ఆస్పత్రిలో భద్రతా ఏర్పాట్లపై ఆగ్రహం వ్యక్తం చేస్తున్నారు. ఆగంతకుడు రాత్రివేళ ఆస్పత్రిలోకి చొరబడి సెల్ ఫోన్ చోరీ చేశాడంటే.. అది భద్రతా సిబ్బంది వైఫల్యమేనని మండిపడుతున్నారు.

మరోవైపు రద్దీ ప్రాంతాల్లో సెల్ ఫోన్లు చోరి చేసి వాటిని విదేశాలకు తరలించే ముఠాలు ఇటీవలి కాలంలో తెలుగు రాష్ట్రాల్లో సంచరిస్తున్నాయని పోలీసులు చెప్తున్నారు. ఇటీవల హైదరాబాద్‌‍లో జరిగిన ఘటనతో ఈ వ్యవహారం, ఇలాంటి దందా తెరపైకి వచ్చింది. డీసీపీ స్థాయి అధికారిపైనే ఇలాంటి దొంగల ముఠా దాడి చేయటంతో ఈ వ్యవహారం వెలుగులోకి వచ్చింది. సినిమా థియేటర్లు, బస్టాండులు, రైల్వేస్టేషన్ల వంటి రద్దీ ప్రాంతాల్లో.. మొబైల్ ఫోన్స్ చోరీ చేయడం.. ఆ తర్వాత మోడల్ ఆధారంగా వాటిని విదేశాలకు తరలిస్తున్నట్లు తెలిసింది. చోరీ చేసిన ఫోన్ల ఐఎంఈఐ నంబర్లను మార్చేసి సూడాన్ వంటి దేశాలకు ఎగుమతి చేస్తున్నట్లు సమాచారం. ఆఫ్రికాలోని దక్షిణ సూడాన్ వంటి దేశాలలో ఈ తరహా ఫోన్లను సెకండ్ హ్యాండ్ ఫోన్ల కింద అమ్ముతున్నట్లు పోలీసులు గుర్తించారు. అంతర్యుద్ధం కారణంగా అక్కడ ఇలాంటి ఫోన్లకు డిమాండ్ ఉన్నట్లు తెలుస్తోంది.

  మరోవైపు పోగొట్టుకున్న, చోరీకి గురైన సెల్ ఫోన్లను రికవరీ చేసేందుకు ఏపీ పోలీసులు CEIR (Central Equipment Identity Register) పోర్టల్‌తో పాటుగా ఒక ప్రత్యేక చాట్‌బాట్ సేవలను ఉపయోగిస్తున్నారు. వీటి సాయంతో.. ప్రజలు పోలీస్ స్టేషన్‌కు వెళ్లాల్సిన పని లేకుండానే ఇంట్లో కూర్చొని ఫిర్యాదు చేయవచ్చు. ఒకవేళ ఫోన్ పోగొట్టుకుంటే పోలీసుల అధికారిక వెబ్ సైట్ సందర్శించాలి. అక్కడ మీరు పోగొట్టుకున్న మొబైల్ ఫోన్ వివరాలను నమోదు చేయాల్సి ఉంటుంది. అలాగే బ్లాక్ చేయడానికి అభ్యర్థన పంపాలి. ఆ తర్వాత వీలైనంత త్వరగా సమీప పోలీస్ స్టేషన్‌లో ఫిర్యాదు చేయాలని పోలీసులు సూచిస్తున్నారు. దీంతో ఫోన్ రికవరీ చేయడానికి అవకాశాలు ఎక్కువగా ఉంటాయన్నారు.