నెల రోజుల పాటు మీ జుట్టుకు నూనె రాయకపోతే ఏమవుతుంది

జుట్టు ప్రతి ఒక్కరి అందంలో కీలకపాత్ర పోషిస్తుంది. ఈ రోజుల్లో జుట్టు బలంగా, పొడుగ్గా, అందంగా ఉండాలని ప్రతి ఒక్కరు కోరుకుంటారు. అయితే మారిన జీవనశైలి, పొలూష్యన్ కారణంగా అనేక జుట్టు సమస్యల్ని ఎదుర్కొంటారు. జుట్టు రాలడం, చుండ్రు, తెల్ల జుట్టు, పొడిబారడం వంటి సమస్యలు ఎదుర్కొంటున్నారు.

అందమైన జుట్టు కావాలంటే దానిని సరిగ్గా చూసుకోవడం చాలా ముఖ్యం. ఇక, ఈ రోజుల్లో జుట్టుకు నూనె రాయడం గురించి చాలా మందికి వేర్వేరు అభిప్రాయాలు ఉన్నాయి. కొంతమంది జుట్టుకు నూనె రాయడం మంచిదని భావిస్తారు. మరికొందరు జుట్టుకు నూనె రాయకూడదంటారు. ఒకవేళ నెల రోజుల పాటు జుట్టుకు నూనె రాయకపోతే ఏమవుతుందో తెలుసా? జుట్టుకు ఆయిల్ అప్లై చేయకపోతే అనేక మార్పులు జరుగుతాయని నిపుణులు అంటున్నారు. ఆ పూర్తి వివరాలు ఇక్కడ తెలుసుకుందాం.

మొదటి మార్పు

మీరు జుట్టుకు నూనె రాయడం నెల రోజులు మానేస్తే దాని సహజ తేమ క్రమంగా తగ్గడం ప్రారంభమవుతుంది. నూనె జుట్టుకు బాహ్య రక్షణ పొరను అందిస్తుంది. తేమను లాక్ చేస్తుంది. నూనె రాయడం మానేసిన ఒక వారం తర్వాత, మీ జుట్టు పొడిగా, నిస్తేజంగా కనిపిస్తుంది. దాని సహజ మెరుపు మాయమవుతుంది. జుట్టు చిట్లడం, సులభంగా చిక్కులు పడటం ప్రారంభమవుతుంది.

రెండో మార్పు

నూనె జట్టుకు మాత్రమే కాదు.. తల అంటే తల చర్మానికి కూడా చాలా అవసరం. నూనె రాయకపోవడం వల్ల తలపై ఉండే సహజ రక్షణ పొర తొలగిపోతుంది. దీని వల్ల చర్మం పొడిబారుతుంది. పొడిబారడం వల్ల దురద, చుండ్రు పెరుగుతాయి. ఒక నెల పాటు తలపై పోషకాలు అందకపోతే.. అది బలహీనంగా మారుతుంది. చర్మ ఇన్ఫెక్షన్ ప్రమాదం పెరుగుతుందని నిపుణులు అంటున్నారు.

మూడో మార్పు

హెయిర్ ఆయిల్ అవసరమైన పోషకాలు, విటమిన్లు, కొవ్వు ఆమ్లాలను అందిస్తుంది. ఈ పోషకాలు అందకపోతే జుట్టు లోపలి నుంచే బలహీనపడటం ప్రారంభమవుతుంది. ఒక నెల తర్వాత జుట్టును దువ్వినప్పుడు మునుపటి కంటే ఎక్కువ విరిగిపోవడాన్ని మీరు గమనించవచ్చు. జుట్టు పెరుగుదల నెమ్మదిస్తుంది. జుట్టు సన్నగా మారుతుంది. చివర్లు కూడా చిట్లిపోతుంటాయి.

ఏ పద్ధతి ఉత్తమం

నెల రోజుల పాటు జుట్టుకు నూనె రాయకపోవడం వల్ల జుట్టు నిస్తేజంగా, పొడిగా, పెళుసుగా మారుతుంది. అంతేకాకుండా నెత్తిమీద దురద, చుండ్రు కూడా పెరుగుతుంది. అందుకే జుట్టు ఆరోగ్యాన్ని కాపాడుకోవడానికి నూనె రాయడాన్ని పూర్తిగా మానేసే బదులు.. సమతుల్య విధానాన్ని అవలంభించడం ఉత్తమం. వారానికి ఒకటి లేదా రెండు సార్లు జుట్టుకు తేలికగా నూనె రాసి 2-3 గంటల తర్వాత శుభ్రం చేసుకోండి. దీంతో జుట్టు బలంగా, మెరుస్తూ ఉంటుంది.

జుట్టుకు నూనె ఎలా రాయాలి?

జుట్టుకు సరిగ్గా నూనె రాయకపోవడం వల్ల దానికి తీవ్రమైన నష్టం జరుగుతుంది. చుండ్రు, బలహీనత, తెగిపోవడం వంటి సమస్యల నుంచి రక్షించుకోవడానికి సరిగ్గా నూనె రాసుకోవడం చాలా ముఖ్యం. చాలా మంది షాంపూతో స్నానం చేసిన తర్వాత జుట్టుకు నూనె రాసుకుంటారు. అయితే, ఇది మంచి పద్ధతి కాదు.

జుట్టుపై నూనెను ఎక్కువ సేపు ఉంచకూడదు. జుట్టుకు నూనె అప్లై చేసిన తర్వాత గంటల వ్యవధిలోనే తలస్నానం చేయండి. జుట్టుకు నూనెను మసాజ్ చేయండి. సర్క్యూలర్ షేపులో రాస్తూ మసాజ్ చేయండి. అంతేకాకుండా నూనె రాసిన తర్వాత వేడి నీటితో తలస్నానం చేయడం మానుకోండి.