స్నాక్‌గా 'ఎగ్‌ 65' ఇలా చేసుకొని తినండి

చికెన్ 65, మటన్ 65, ఫిష్ 65... ఇలా రకరకాల 65 విన్నాము. కానీ కొత్తగా ఈ 'ఎగ్ 65' ఏంటి అనుకుంటున్నారా?.. మాంసాహారం తిననివారు, పిల్లలు ఎంతో ఇష్టంగా తినే గుడ్డుతో చేసేదే ఈ 'ఎగ్ 65'. ఇది మంచి రుచిగా ఉండటంతోపాటు... ఆరోగ్యానికి మేలు కూడా చేస్తుంది. సాయంత్రం స్కూలు నుంచి ఇంటికి వచ్చే... మీ పిల్లల కోసం ఓ సారి ట్రై చేయండి మరి. ఎగ్‌టేరియన్స్‌ కోసం ప్రత్యేకించిన ఈ వంటకాన్ని ఎలా తయారు చేయాలో చూద్దాం....!

' ఎగ్‌ 65 ' తయారీకి కావాల్సిన పదార్థాలు: గుడ్లు: 6, అల్లం: 2 ముక్కలు, వెల్లుల్లి: 6 - 10 రెబ్బలు, పచ్చిమిర్చి: 6, కొత్తిమీర: కప్పు, కరివేపాకు: కప్పు, గరం మసాలా: 4 టీ స్పూన్లు (తక్కువ కూడా వేసుకోవచ్చు), కారం పొడి: సరిపడినంత, కశ్మీరీ కారంపొడి (రంగు కోసం): 2 టీ స్పూన్లు, ఉప్పు: సరిపడా, పెరుగు: 2 కప్పులు, చిల్లీ సాస్: కొద్దిగా, జీలకర్ర పొడి: 2 లేదా 3 టీ స్పూన్లు, చక్కెర: 2 టీ స్పూన్లు, కార్న్ఫ్లోర్: 1 లేదా 2 కప్పులు.

తయారీ విధానం:

* మొదటగా గుడ్లు ఉడకబెట్టుకోవాలి. ఉడికిన తర్వాత గుడ్డులో నుంచి పచ్చసొన వేరుచేసి, తెల్లగుడ్డు మాత్రమే తీసుకుని చిన్నచిన్న ముక్కలుగా కట్ చేసుకోవాలి.

* ఈ ముక్కలకు... సన్నగా తరిగిన అల్లం, వెల్లుల్లి, పచ్చిమిర్చి ముక్కలు, కొద్దిగా కారం, గరంమసాలాతోపాటు కొద్ది పరిమాణంలో బ్రెడ్ పౌడర్, కార్న్ ఫ్లోర్ వేసి కలుపుకోవాలి.

* రెండు పగుల గొట్టిన గుడ్ల నుంచి తీసిన తెల్లసొన (ఎగ్ వైట్)ను ఈ మిశ్రమంలో వేసి బాగా కలుపుకోవాలి. తర్వాత ఈ మిశ్రమాన్ని చిన్న చిన్న ఉండలుగా చేసి పెట్టుకోవాలి.

* స్టౌ వెలిగించుకుని బాణలిలో నూనె వేసుకోవాలి. నూనె వేడెక్కిన తర్వాత ఈ ఉండలను నెమ్మదిగా స్పూన్ లేదా చేతితో నూనెలో వేసుకోవాలి. బంగారు రంగు వచ్చేవరకు వేయించుకోవాలి. అన్ని ముక్కలు వేగాక తీసి పక్కన పెట్టుకోవాలి.

* మరో ప్యాన్‌లో కొద్దిగా నూనె వేసి... వేడెక్కగానే అందులో తరిగిన అల్లం, వెల్లుల్లి, పచ్చిమిర్చి ముక్కలు, కరివేపాకు వేసి వేయించుకోవాలి. పచ్చి మిర్చిని రెండుగా చీల్చినవే వేసుకోవాలి.

* కాసేపే వేగాక... ఇందులో కప్పు లేదా సరిపడా పెరుగు వేసుకోవాలి. కాస్తా ఉడకగానే... ఇందులో కాస్తా కశ్మీరీ కారం పొడి, గరం మసాలా, జీలకర్ర పొడితోపాటు కొద్దిగా చిల్లీ సాస్ వేసుకోవాలి. కొద్దిగా చక్కెర వేస్తే రుచికి బాగుంటుంది. తర్వాత తరిగిన కొత్తిమీర వేసుకోవాలి.

* ఇక చివరగా... ముందుగా ఫ్రైచేసి పెట్టుకున్న ఉండలను వేయాలి. మంట కాస్తా పెంచి... ముక్కలకు గ్రేవీ బాగా పట్టేవరకు ప్యాన్‌ను అటు ఇటూ కదపడం చేయాలి. బాగా ఉడికింది అనుకుంటే... వెంటనే స్టౌ ఆర్పేయాలి.