LPG Import Deal: అమెరికా–భారత్ ఒప్పందం గ్యాస్ రేట్లను ఎలా ప్రభావితం చేస్తుందంటే…

కేంద్ర ప్రభుత్వం ఒక కీలక నిర్ణయం తీసుకుంది. అమెరికా నుంచి ఎల్‌పీజీని దిగుమతి చేసుకునేందుకు భారత్ ఒప్పందాన్ని ఖరారు చేసింది. ఈ మేరకు దేశంలోని ప్రభుత్వ రంగ చమురు సంస్థలు యూఎస్ ఎల్‌పీజీ ఉత్పత్తిదారులతో ఒప్పందం కుదుర్చుకున్నాయని కేంద్ర పెట్రోలియం, సహజ వాయువు శాఖ మంత్రి హర్దీప్ సింగ్ పూరి వెల్లడించారు."భారత ప్రజలకు అందుబాటు ధరల్లో ఎల్‌పీజీ అందించాలన్న లక్ష్యంతో చర్యలను వేగవంతం చేస్తున్నాం. ఎల్‌పీజీ సరఫరా వనరులను విస్తరించడం దిశగా ఇది కీలక అడుగుగా నిలుస్తుంది. పబ్లిక్ సెక్టార్ చమురు సంస్థలు అమెరికాతో ఒక ముఖ్య ఒప్పందాన్ని పూర్తి చేశాయి. ఈ ఒప్పందం ఒక సంవత్సరం పాటు అమల్లో ఉంటుంది. మొత్తం 2.2 MTPA ఎల్‌పీజీని అమెరికా నుంచి దిగుమతి చేసుకోనున్నాం. ఇది ప్రస్తుతం మన వార్షిక దిగుమతుల్లో దాదాపు 10% కి సమానం. యూఎస్ గల్ఫ్ కోస్ట్ నుంచి ఈ సరుకు భారత్‌కు చేరుకోనుంది," అని పూరి ఎక్స్‌ ప్లాట్‌ఫామ్‌లో వివరించారు.అమెరికాతో కుదిరిన ఇది భారత మార్కెట్ కోసం మొదటి నిర్మాణాత్మక, దీర్ఘకాలిక ఎల్‌పీజీ ఒప్పందమని ఆయన తెలిపారు. దీనితో ప్రపంచంలో వేగంగా అభివృద్ధి చెందుతున్న ఎల్‌పీజీ మార్కెట్లలో ఒకటైన భారత దేశానికి కొత్త అవకాశాలు లభిస్తాయని పూరి పేర్కొన్నారు. ప్రజలకు సురక్షితంగా, తక్కువ ధరల్లో ఎల్‌పీజీ అందించడమే ప్రభుత్వ ప్రధాన లక్ష్యమని కూడా స్పష్టం చేశారు. అంతర్జాతీయ మార్కెట్లో ఇంధన ధరలు పెరుగుతున్న నేపథ్యంలో వినియోగదారులపై భారం పడకుండా ప్రభుత్వం నిరంతరం చర్యలు తీసుకుంటుందని ఆయన తెలిపారు.ఈ ఒప్పందం ధరలు ప్రపంచవ్యాప్తంగా గుర్తింపు పొందిన మౌంట్ బెల్వియు బెంచ్‌మార్క్ ఆధారంగా నిర్ణయించబడతాయని మంత్రి వివరించారు. IOCL, BPCL, HPCL బృందాలు అమెరికాలోని ప్రముఖ ఎల్‌పీజీ ప్రొడ్యూసర్లతో ఒప్పందం కుదుర్చుకున్నాయని వెల్లడించారు.అంతర్జాతీయ ఇంధన ధరల పెరుగుదల ఉన్నప్పటికీ, దేశ ప్రజలకు తక్కువ ధరకే ఎల్‌పీజీ అందించేందుకు ప్రభుత్వం కృషి చేస్తోందని పూరి తెలిపారు. ప్రపంచ ఎల్‌పీజీ ధరలు 60% కంటే ఎక్కువగా పెరగినా, ప్రధాని నరేంద్ర మోదీ ఉజ్వల పథకం కింద లబ్ధిదారులు సిలిండర్‌ను రూ. 500-550 మధ్యనే పొందేలా చర్యలు తీసుకున్నారని చెప్పారు. వాస్తవ మార్కెట్ ధర రూ. 1,100 దాటినా, ప్రభుత్వ సబ్సిడీ వల్ల బరువు తగ్గిందని ఆయన పేర్కొన్నారు. అమెరికాతో కుదిరిన ఈ దిగుమతి ఒప్పందం ఈ ప్రయత్నాలకు మరింత బలం ఇస్తుందని అన్నారు.అమెరికా నుంచి ఎల్‌పీజీ దిగుమతి ప్రారంభం కావడంతో ఇండియాలో సిలిండర్ ధరలు తగ్గే అవకాశాలు ఉన్నాయని నిపుణులు అంచనా వేస్తున్నారు. అయితే దీనిపై అధికారిక ప్రకటన మాత్రం ఇంతవరకు వెలువడలేదు.