సౌదీలో ఘోర ప్రమాదం.. 42 మంది భారతీయులు సజీవ దహనం

పవిత్ర ఉమ్రా యాత్రకు వెళ్లిన భారతీయ భక్తుల జీవితాలను సౌదీ అరేబియాలో జరిగిన ఘోర రోడ్డు ప్రమాదం బలిగొంది. మక్కా నుంచి మదీనాకు వెళ్తున్న ఒక ప్యాసింజర్ బస్సు.. సోమవారం తెల్లవారుజామున డీజిల్ ట్యాంకర్‌ను ఢీకొనడంతో పెద్ద ఎత్తున మంటలు చెలరేగాయి. క్షణాల్లోనే బస్సు మొత్తం మంటలు వ్యాపించగా.. అందులో ఉన్న 42 మంది భారతీయ యాత్రికులు సజీవ దహనం అయ్యారు. ఇందులో ఎక్కువ మంది (16) హైదరాబాద్‌కు చెందిన వాళ్లేనని ప్రాథమిక నివేదికలు తెలియజేస్తున్నాయి.

ఈ హృదయ విదారక ఘటన సోమవారం వేకువజామున 1.30 గంటల సమయంలో ముఫ్రిహత్ అనే ప్రాంతంలో జరిగింది. ఉమ్రా యాత్ర పూర్తి చేసుకుని మక్కా నుంచి మదీనాకు బయలుదేరిన భక్తులు ఈ బస్సులో ఉన్నారు. ప్రమాదం జరిగిన సమయంలో.. ఎక్కువ మంది యాత్రికులు గాఢ నిద్రలో ఉన్నారని సమాచారం. ట్యాంకర్‌ను బస్సు ఢీకొనగానే.. పెద్ద ఎత్తున మంటలు చెలరేగి, బస్సు పూర్తిగా దగ్ధమైపోయింది. అయితే మరణించిన యాత్రికుల్లో అధిక శాతం అంటే 16 మంది తెలంగాణ రాష్ట్ర రాజధాని హైదరాబాద్‌కు చెందినవారు ఉన్నట్లు అక్కడి అధికారులు చెబుతున్నారు. మృతుల్లో సుమారు 20 మంది మహిళలు, 11 మంది చిన్నారులు ఉన్నట్లు తెలుస్తోంది. ఈ విషాదంలో ఎక్కువగా కుటుంబాలకు కుటుంబాలే ప్రాణాలు కోల్పోయారు.

ఘటనా స్థలంలో సహాయక చర్యలు కొనసాగుతున్నాయని, అధికారులు మృతుల సంఖ్యను ధృవీకరించే పనిలో ఉన్నారని సౌదీ వర్గాలు తెలిపాయి. భారత ప్రభుత్వం, ముఖ్యంగా విదేశీ వ్యవహారాల మంత్రిత్వ శాఖ, సౌదీలోని భారత రాయబార కార్యాలయం ఈ ఘటనపై పూర్తి వివరాలను తెలుసుకునేందుకు ప్రయత్నిస్తున్నాయి. మృతులు, గాయపడిన వారి వివరాలను సేకరించి.. వారి కుటుంబాలకు సమాచారం అందించేందుకు తెలంగాణ ప్రభుత్వం కూడా సౌదీ అధికారులతో సమన్వయం చేసుకుంటోంది. మరోవైపు కేసు నమోదు చేసుకున్న పోలీసులు దర్యాప్తు చేస్తున్నారు. ప్రమాదానికి గల కారణాలు ఏంటనే దానిపై విచారణ జరుపుతున్నారు. ఈ ఘటనతో హైదరాబాద్‌లోని మృతుల కుటుంబాల్లో తీవ్ర విషాద ఛాయలు అలుముకున్నాయి. ఉమ్రా యాత్ర పూర్తి చేసి త్వరలో తిరిగి వస్తారని ఎదురు చూస్తున్న వారికి ఈ దుర్వార్త గుండెకోతను మిగిల్చింది.