అమెరికా కాలేజీల్లో ,,,17 శాతం మేర తగ్గిన భారతీయ విద్యార్థుల సంఖ్య

అమెరికాలోని యూనివర్సిటీల్లో భారతీయ విద్యార్థుల అడ్మిషన్ల సంఖ్య భారీగా పడిపోయింది. అమెరికా రాష్ట్ర విభాగం ఆధ్వర్యంలో నిర్వహించిన “ఓపెన్ డోర్స్” గ్రాడ్యుయేట్ ప్రోగ్రాముల్లో భారత విద్యార్థుల రిజిస్ట్రేషన్లు 10 శాతానికి పడిపోయిందని వెల్లడించింది. 2024–25 విద్యా సంవత్సరంలో మెుత్తం విదేశీ విద్యార్థుల అడ్మిషన్లు 17 శాతం 2025లో తగ్గినట్లు డేటా వెల్లడించింది. సర్వేలో భాగమైన 825 అమెరికా సంస్థలలో 61 శాతం కంటే ఎక్కువ మంది భారత విద్యార్థుల సంఖ్య తగ్గిందని తెలిపాయి. వీటిలో 96 శాతం సంస్థలు విద్యార్థుల సంఖ్య తగ్గడానికి ప్రధాన కారణంగా వీసా జారీలో జాప్యం, కఠినమైన విధానాలు, అమెరికాకు ప్రయాణ పరిమితులను కారణాలుగా పేర్కొన్నాయి. అయితే ఇప్పటికీ అమెరికా యూనివర్సిటీల్లో అడ్మిషన్లు పొందుతున్న విదేశీయుల జాబితాలో ఇండియన్ స్టూడెంట్స్ సంఖ్య ఎక్కువగానే ఉన్నట్లు తేలింది. కాగా, ట్రంప్ అధ్యక్ష పీఠం ఎక్కినప్పటి నుంచి ఈ ఏడాదిలో ఇప్పటి వరకూ 80 వేల మంది వీసాలను అమెరికా రద్దుచేసినట్టు ఓ నివేదిక వెల్లడించింది.

 మొత్తం గ్రాడ్యుయేట్ విద్యార్థులలో దాదాపు సగం, అలాగే మొత్తం అంతర్జాతీయ విద్యార్థులలో మూడో వంతు భారతీయులే. గత ఏడాది ఇది పెరిగినప్పటికీ.. ప్రస్తుతం ట్రంప్ ప్రభుత్వ నిబంధనలతో ఈ సంఖ్య పడిపోయింది. అలాగే H-1B వీసా దరఖాస్తులపై దుర్వినియోగాల కేసుల్లో అమెరికా కార్మిక శాఖ 170కిపైగా దర్యాప్తు ప్రారంభించింది. దీనికి అదనంగా ఇటీవల వర్క్ వీసా కోసం లక్ష డాలర్ల చెల్లింపు రూల్స్ తీసుకురావటంతో భారతీయ యువతలో అమెరికా కలలు చెదిరిపోతున్నాయి. స్కాలర్‌షిప్‌లతో చదువుకోడానికి ప్రతిష్ఠాత్మక విద్యా సంస్థల్లో సీటు లభించినా.. పలు కారణాలతో కొర్రీలు వేస్తున్నారు.

ఇదే క్రమంలో కన్సర్వేటివ్ రిపబ్లికన్ ప్రతినిధులుH-1B వీసా కార్యక్రమాన్ని పూర్తిగా రద్దు చేయాలన్న ప్రతిపాదనలు తీసుకొచ్చారు. కాంగ్రెస్‌మెంబర్ మార్జరీ టేలర్ గ్రీన్, వైద్య రంగం మినహా అన్ని విభాగాల్లో H-1B వీసాలను నిషేధించే బిల్లు ప్రవేశపెడతానని ప్రకటించారు. ఈ క్రమంలోనే ఈ ఏడాది జనవరి నుంచి ఇప్పటి వరకు దాదాపు 6వేల మంది విదేశీ విద్యార్థుల వీసాలను అమెరికా రాష్ట్ర విభాగం రద్దు చేయటం కూడా డాలర్ డ్రీమ్స్‌కి ఇండియన్స్‌ని దూరం చేస్తోంది. ట్రంప్ రెండోసారి అధికారంలోకి వచ్చినప్పటి నుంచి వలస విధానంపై కఠిన వైఖరి అవలంభిస్తోన్న సంగతి తెలిసిందే. స్టూడెంట్ వీసాలకు సోషల్ మీడియా వెట్టింగ్ లింకు పెట్టారు. సామాజిక మాధ్యమాల వివరాలను వెల్లడించకపోతే.. వీసా నిరాకరించడమే కాదు.. భవిష్యత్తులో వీసాలకు అనర్హులుగా మారుతారని అమెరికా స్పష్టం చేసింది.