డబ్బు, కార్లు, డైమండ్లు తీసుకుని పెళ్లి చేసుకోవాలని,,,,వ్యాపారిపై మహిళా డీఎస్పీ వేధింపులు

ఛత్తీస్‌గఢ్‌లో మహిళా డీఎస్పీపై సంచలన ఆరోపణలు వెలుగులోకి వచ్చాయి. పెళ్లైన ఓ బిజినెస్‌మెన్‌ నుంచి భారీగా డబ్బులు, బంగారం, కార్లు వసూలు చేసినట్లు బాధితుడు ఆరోపించారు. గత కొన్నేళ్లుగా రూ.2 కోట్లకు పైగా డబ్బు, ఖరీదైన కార్లు, డైమండ్ రింగ్, బంగారు ఆభరణాలను.. ఆ మహిళా డీఎస్పీ.. తన నుంచి తీసుకుందని.. తిరిగి అడిగితే తనను పెళ్లి చేసుకోవాలని ఒత్తిడి చేస్తోందని ఫిర్యాదు చేశాడు. తనకు పెళ్లి అయినప్పటికీ.. భార్యకు విడాకులు ఇచ్చి.. పెళ్లి చేసుకోవాలని బెదిరింపులకు దిగుతోందని ఓ వ్యాపారవేత్త చేసిన ఆరోపణలు ఇప్పుడు పెను సంచలనం సృష్టిస్తున్నాయి. అయితే తనపై వచ్చిన ఆరోపణలను ఆ మహిళా డీఎస్పీ కొట్టిపారేశారు.

దంతేవాడ డీఎస్పీ కల్పనా వర్మపై రాయ్‌పూర్‌కు చెందిన బిజినెస్‌మెన్ దీపక్ టాండన్.. సంచలన ఆరోపణలు చేశారు. మోసం, బ్లాక్‌మెయిలింగ్, లంచం వంటి ఆరోపణలు చేయడం తీవ్ర సంచలనంగా మారింది. కల్పనా వర్మ తన నుంచి గత కొన్నేళ్ల నుంచి రూ.2 కోట్ల నగదు, ఖరీదైన కార్లు, విలువైన ఆభరణాలు, డైమండ్ రింగ్‌ను వసూలు చేసిందని దీపక్ టాండన్ ఆరోపణలు గుప్పించారు. 2021లో డీఎస్పీ కల్పనా వర్మతో పరిచయం ఏర్పడిందని.. ఆ తర్వాత అది రిలేషన్‌షిప్‌గా మారిందని దీపక్ టాండన్ ఫిర్యాదులో పేర్కొన్నారు.

ఈ క్రమంలో డీఎస్పీ కల్పన వర్మ తనను మోసం చేసి.. రూ.2 కోట్లకు పైగా నగదుతో పాటు.. రూ.12 లక్షల విలువైన డైమండ్ రింగ్, రూ.5 లక్షల విలువైన బంగారు గొలుసు, రూ.1 లక్ష విలువైన బ్రాస్‌లెట్ సహా అనేక విలువైన బహుమతులు తీసుకుందని దీపక్ టాండన్ ఆరోపించాడు. అంతేకాకుండా.. రాయ్‌పూర్‌లోని వీఐపీ రోడ్‌లో తన పేరు మీద ఉన్న హోటల్‌ను ఆమె సోదరుడి పేరు మీదకు మార్చిందని తెలిపాడు. ఆ తర్వాత దాన్ని ఆమె పేరు మీదకు మార్చుకున్నారని ఇందుకు రూ.30 లక్షలు ఖర్చు చేసినట్లు పేర్కొన్నాడు. వీటితోపాటు తన పేరు మీద ఉన్న రూ.22 లక్షల కారును కూడా స్వాధీనం చేసుకున్నారని దీపక్ టాండన్ భార్య బర్ఖా ఆరోపించారు.

ఇక.. తనను తన భార్యకు విడాకులు ఇచ్చి ఆమెను పెళ్లి చేసుకోవాలని డీఎస్పీ కల్పన వర్మ ఒత్తిడి చేశారని దీపక్ టాండన్, ఆయన భార్య బర్ఖా జంట ఆరోపించింది. దీనిపై ఖమ్హర్‌దిహ్ పోలీస్ స్టేషన్‌లో వారిద్దరూ ఫిర్యాదు నమోదు చేశారు. డీఎస్పీ కల్పన వర్మ తరచూ అర్థరాత్రి దీపక్‌ టాండన్‌కు ఫోన్ చేసేవారని.. దీనిపై బర్ఖా అభ్యంతరం చెప్పిన తర్వాత వారి ఇంట్లో గొడవలు పెరిగాయని ఆరోపించారు. వీరు ఫిర్యాదుతోపాటు వారి మధ్య జరిగిన వాట్సాప్ చాట్‌లు, సీసీటీవీ ఫుటేజీ, ఇతర సాక్ష్యాలను కూడా పోలీసులకు సమర్పించారు. ఇక ఆమెపై చేసిన ఫిర్యాదును వెనక్కి తీసుకోవాలని కల్పనా వర్మ చెప్పిందని లేకపోతే తప్పుడు కేసులు పెట్టి జైలుకు పంపుతానని బెదిరించినట్లు దీపక్ టాండన్ పేర్కొన్నారు.

డీఎస్పీ కల్పనా వర్మ స్పందన

ఇక దీపక్ టాండన్, ఆయన భార్య బర్ఖా చేసిన ఆరోపణలు నిరాధారమైనవని.. డీఎస్పీ కల్పనా వర్మ వాటిని ఖండించారు. తనను అప్రతిష్టపాలు చేయడానికి చేసిన కుట్రలో భాగంగా వారు ఈ ఆరోపణలు చేస్తున్నారని డీఎస్పీ పేర్కొ్న్నారు. ప్రస్తుతం దీపక్ టాండన్ చేసిన ఫిర్యాదుపై పోలీసు ఉన్నతాధికారులు దర్యాప్తు జరుపుతున్నారు.