జేడీ వాన్స్-ఉషా చిలుకూరి మధ్య గొడవ.. రెస్టారెంట్‌ ఫోటో వైరల్, అసలేం జరిగింది?

అమెరికా ఉపాధ్యక్షుడు జేడీ వాన్స్, ఆయన భార్య భారత మూలాలు ఉన్న ఉషా చిలుకూరి వాన్స్‌ల మధ్య విభేదాలు ఉన్నాయంటూ ఇటీవల వైరల్ అయిన ఒక ఫోటో, పుకార్లపై స్వయంగా జేడీ వాన్స్ తాజాగా స్పందించారు. వారిద్దరూ ఒక రెస్టారెంట్‌లో తీవ్రంగా గొడవ పడుతున్నట్లుగా ఉన్న ఒక ఫోటో వైరల్ కావడం, దానిపై అనేక ఊహాగానాలు వెల్లువెత్తడంతో జేడీ వాన్స్ సోషల్ మీడియా వేదికగా ఒక క్లారిటీ ఇచ్చారు. తన భార్యతో బహిరంగంగా గొడవ పడేందుకు తాను.. ఎప్పుడూ ఒక వైట్ టీ షర్ట్ వేసుకుంటానని సరదాగా వ్యాఖ్యలు చేశారు. అయితే కొన్ని నెలల క్రితం.. జేడీ వాన్స్ ఎరికా కిర్క్ అనే మహిళను హగ్ చేసుకోవడం.. ఆ తర్వాత ఉషా వాన్స్ వెడ్డింగ్ రింగ్ లేకుండానే పలు ఈవెంట్లకు హాజరు కావడం వంటి ఘటనలతో.. వారిద్దరూ విడాకులు తీసుకోబోతున్నారనే వార్తలు వెల్లువెత్తాయి.

అంతేకాకుండా ఉషా చిలుకూరి హిందూ మతం గురించి జేడీ వాన్స్ చేసిన వ్యాఖ్యలు.. అమెరికాలోకి వలసలపై ఆయన చేసిన వ్యాఖ్యలు ఉషా నేపథ్యం భారతీయ నేపథ్యం ఉండటం వంటి విషయాలన్నీ కలిసి మరిన్ని విమర్శలకు దారితీశాయి. ఈ క్రమంలోనే వైరల్ ఫోటోపై జేడీ వాన్స్ స్పందించారు. ఒక రెస్టారెంట్‌కు సంబంధించిన ఫోటో వైరల్ కాగా.. అందులో జేడీ వాన్స్ కోపంగా చూస్తున్నట్లు కనిపిస్తోంది. ఇక అప్పుడు ఉషా చిలుకూరి తల దించుకుని.. తన ముఖంపై చేయి వేసుకుని కూర్చుని ఉన్నట్లుగా ఆ ఫోటోలో కనిపిస్తోంది. దీంతో నెటిజన్లు ఆ ఫోటోను వైరల్ చేస్తూ.. అది వారిద్దరి మధ్య విభేదాలకు సంకేతంగా అభివర్ణించారు.

జేడీ వాన్స్ రియాక్షన్

ఆ రెస్టారెంట్ వైరల్ ఫోటోపై జేడీ వాన్స్ వ్యంగ్యంగా స్పందించారు. తన భార్యతో బహిరంగంగా గొడవ పడటానికి, గట్టిగా అరవడానికి తాను ఎల్లప్పుడూ టీషర్ట్‌ను వేసుకుని వెళ్తాననని తెలిపారు. అయితే కొందరు నెటిజన్లు.. ఆ ఫోటోను ఆర్టిఫిషియల్ ఇంటెలిజెన్స్ (ఏఐ)తో రూపొందించిందని కూడా అభిప్రాయం వ్యక్తం చేశారు.

జేడీ వాన్స్ ఉషా చిలుకూరి మధ్య విబేధాల పుకార్లకు కారణాలు

జేడీ వాన్స్, ఉషా చిలుకూరి వాన్స్ వైవాహిక జీవితంపై గత కొన్ని నెలలుగా పుకార్లు వెల్లువెత్తుతూనే ఉన్నాయి. ఈ ఏడాది అక్టోబర్ నెలలో వైస్ ప్రెసిడెంట్, టర్నింగ్ పాయింట్ యూఎస్ఏ ఫౌండర్ చార్లీ కిర్క్ భార్య అయిన ఎరికా కిర్క్‌ను.. జేడీ వాన్స్ కౌగిలించుకున్న ఫోటో సోషల్ మీడియాలో తెగ వైరల్ అయింది. దీంతో ఆ ఫోటో అప్పట్లో తీవ్ర చర్చకు దారితీసింది.

దీనికితోడు నవంబర్, డిసెంబర్ నెలల్లో అమెరికా ఫస్ట్ లేడీ మెలానియా ట్రంప్‌తో ఉషా వాన్స్ కలిసి రెండు కార్యక్రమాలకు హాజరయ్యారు. అయితే ఆ రెండు సందర్భాల్లో ఉషా వాన్స్ చేతికి ఆమె పెళ్లి ఉంగరం ధరించినట్లు కనిపించలేదు. అయితే ఉషా వాన్స్ ప్రతినిధి మాత్రం ఆ పుకార్లను అప్పుడే కొట్టిపారేశారు. ఉషా వాన్స్ నిత్యం వంటపాత్రలు కడుగుతారని.. పిల్లలకు స్నానాలు చేయిస్తారని.. అందుకే కొన్నిసార్లు ఉంగరాన్ని తీసేస్తారని.. ఆ తర్వాత కొన్నిసార్లు దాన్ని పెట్టుకోవడం మర్చిపోతారని క్లారిటీ ఇచ్చారు. వాటికీ.. జేడీ వాన్స్, ఉషా మధ్య దాంపత్య జీవితానికి ఎలాంటి సంబంధం లేదని ఆమె ప్రతినిధి వివరణ ఇచ్చారు.

జేడీ వాన్స్ చేసిన కొన్ని వ్యాఖ్యలు కూడా ఉషా విషయంలో ఆయన విమర్శలకు గురి కావడానికి కారణమయ్యాయి. మిస్సిస్సిప్పిలోని ఒక టర్నింగ్ పాయింట్ యూఎస్ఏ కార్యక్రమంలో మాట్లాడిన జేడీ వాన్స్.. హిందూ మతాన్ని విశ్వసించే తన భార్య ఉషా చిలుకూరి.. త్వరలోనే క్రిస్టియన్ మతాన్ని స్వీకరిస్తారని తాను ఆశిస్తున్నానని.. ఆమె తరచుగా తనతో చర్చ్‌కు వస్తుందని చెప్పారు. ఈ వ్యాఖ్యలు నెట్టింట తీవ్ర విమర్శలకు కారణమయ్యాయి.

మరోవైపు.. ప్రపంచ దేశాల నుంచి అమెరికాలోకి భారీ వలసలు అమెరికన్ కలలకు ముప్పు అని జేడీ వాన్స్ వ్యాఖ్యానించారు. అయితే ఉషా వాన్స్ అమెరికాలోనే పుట్టినా.. భారతీయ వలసదారుల కుమార్తె కావడం వల్ల జేడీ వాన్స్‌పై చేసిన వ్యాఖ్యలు తీవ్ర విమర్శలకు తావిచ్చాయి. 2014లో వివాహం చేసుకున్న జేడీ వాన్స్, ఉషా దంపతులకు.. ఈవాన్, వివేక్ అనే ఇద్దరు కుమారులు, మిరాబెల్ అనే ఒక కుమార్తె ఉన్నారు.