మాజీ మేయర్ ఇంట్లో 13.5 టన్నుల బంగారం, 23 టన్నుల నగదు

అవినీతికి అంతం ఎక్కడ? అక్రమ సంపాదనకు హద్దులేవి? ఈ ప్రశ్నలకు చైనాలో వెలుగుచూసిన ఒక ఉదంతం సమాధానంగా నిలుస్తోంది. చైనాలోని హైనాన్ ప్రావిన్స్‌కు చెందిన హైకౌ నగర మాజీ మేయర్ జాంగ్ క్యూ నివాసంలో బయటపడిన అక్రమ ఆస్తుల వివరాలు వింటే సామాన్యులకే కాదు ఆర్థిక నిపుణులకు కూడా కళ్లు బైర్లు కమ్మడం ఖాయం. ఒక సామాన్య అధికారి స్థాయి నుంచి ఎదిగిన ఆయన.. ఏకంగా ఒక దేశపు సెంట్రల్ బ్యాంక్ నిల్వల స్థాయిలో బంగారాన్ని, నగదును తన ఇంట్లో పోగుచేశారు. ముఖ్యంగా 13.5 టన్నుల బంగారం, 23 టన్నుల నగదును ఇంట్లోనే జమ చేశారు. ఇతడి బాగోతం బయటపడగా.. ప్రస్తుతం ఇందుకు సంబంధించిన వీడియో నెట్టింట తెగ వైరల్ అవుతోంది.

నిధిని తలపించిన రహస్య గదులు

జనవరి 2026 ప్రారంభంలో ఈ అవినీతి భాగోతంపై దర్యాప్తు సంస్థలు సోదాలు నిర్వహించాయి. ఈ తనిఖీల్లో అధికారులకు కళ్లు చెదిరే రీతిలో సంపద దొరికింది. జాంగ్ క్యూ ఇంట్లో రహస్యంగా దాచిన 13.5 టన్నుల బంగారాన్ని, సుమారు 23 టన్నుల నగదును అధికారులు స్వాధీనం చేసుకున్నారు. చైనాలోనే కాకుండా విదేశాల్లో కూడా ఆయనకు విలాసవంతమైన భవనాలు, అపార్ట్‌మెంట్‌లు ఉన్నట్లు దర్యాప్తులో తేలింది. వీటితో పాటు ప్రపంచంలోని ఖరీదైన లగ్జరీ కార్ల సేకరణ కూడా ఆయన వద్ద ఉన్నట్లు గుర్తించారు.

బిలియన్ డాలర్ల లంచాలు.. భూదందాలు

జాంగ్ క్యూ మేయర్‌గా ఉన్న సమయంలో తన అధికారాన్ని అడ్డగోలుగా వినియోగించినట్లు ఆరోపణలు వచ్చాయి. ప్రభుత్వ భూములకు సంబంధించిన ఒప్పందాలు, భారీ కాంట్రాక్టులను ప్రైవేట్ వ్యక్తులకు కట్టబెట్టడం ద్వారా ఆయన బిలియన్ల డాలర్ల మేర లంచాలు పొందినట్లు నిర్ధారణ అయింది. ముఖ్యంగా ప్రభుత్వ ప్రాజెక్టులలో భారీ అక్రమాలకు పాల్పడి, దేశ సంపదను తన సొంత ఖజానాకు మళ్లించుకున్నారనే ఆరోపణలు రుజువయ్యాయి.

చైనా ప్రభుత్వం అవినీతి పట్ల అత్యంత కఠినంగా వ్యవహరిస్తుందనే విషయం తెలిసిందే. అయితే జాంగ్ క్యూపై వచ్చిన ఆరోపణల తీవ్రతను పరిగణనలోకి తీసుకున్న న్యాయస్థానం.. ఈ స్థాయి అవినీతి ప్రజా విశ్వాసాన్ని దెబ్బతీస్తుందని అభిప్రాయపడింది. ఈ క్రమంలోనే ఆయనకు మరణశిక్ష విధిస్తూ తీర్పు వెలువరించింది. ఆయన వద్ద ఉన్న అక్రమ ఆస్తులు అన్నింటినీ ఇప్పటికే ప్రభుత్వం స్వాధీనం చేసుకుంది. ప్రస్తుతం ఈ కేసు విచారణ ముగిసినప్పటికీ.. ఆయన ఇల్లు ఒక "బంగారు గని" లాగా మారిన దృశ్యాలు అంతర్జాతీయ మీడియాతో పాటు సోషల్ మీడియాలో దావానంలా వ్యాపించాయి. మీరు కూడా ఓసారి ఈ వీడియో చూసి ఏమనిపిస్తుందో కామెంట్ల రూపంలో తెలియజేయండి.