తమిళనాడులో బ్లింకిట్ రైడర్ చేసిన ఓ పనిపై,,,, నెట్టింట ప్రశంసలు

ఇటీవలి కాలంలో బ్లింకిట్, జొమాటో వంటి డెలివరీ రైడర్ల గురించి పెద్దఎత్తున చర్చ జరుగుతోంది. పది నిమిషాల రైడ్ గురించి డిస్కషన్ జరుగుతోంది. ఆ విషయాన్ని కాసేపు పక్కనబెడితే తమిళనాడులోని ఓ బ్లింకిట్ డెలివరీ బాయ్ ఆర్డర్ తిరస్కరించి.. హీరో అయ్యాడు. రియల్ లైఫ్ హీరో నువ్వేనయ్యా అంటూ ప్రశంసలు అందుకుంటున్నాడు. అదేంటీ ఆర్డర్ క్యాన్సల్ చేస్తే.. అభినందనలు ఏంటని అనుకుంటున్నారా.. ఆ విషయం తెలియాలంటే కాస్త లోతుల్లోకి వెళ్లాల్సిందే.

తమిళనాడులోని ఓ బ్లింకిట్ డెలివరీ రైడర్‌కు అర్ధరాత్రి వేళ ఆర్డర్ వచ్చింది. మూడు ప్యాకెట్ల ఎలుకల మందు ఆర్డర్ వచ్చింది. దీంతో రొటీన్ డ్యూటీలో భాగంగా రైడర్ వాటిని తీసుకుని.. ఆ అడ్రస్‌కు వెళ్లాడు. కాలింగ్ బెల్ నొక్కాడు. అయితే అక్కడి పరిస్థితులు ఎందుకో తేడాగా అనిపించాయి. దీంతో బ్లింకిట్ డెలివరీ బాయ్ ఆ ఆర్డర్ క్యాన్సల్ చేశాడు. తలుపు తీసిన మహిళ ఏడుస్తూ కనిపించడంతో.. మనోడికి అనుమానం కల్గింది. మహిళ ఏడుస్తూ కనిపించడం, బాధలోఉన్నట్లు గుర్తించడంతో.. ఆత్మహత్య చేసుకునే ప్రయత్నంలో ఏమైనా ఉందేమో అనే అనుమానం కలిగింది. దీంతో అతను ఆ ఆర్డర్ క్యాన్సిల్ చేశాడు.

మహిళ ఏడుస్తుండటాన్ని గమనించిన రైడర్.. ఆమెతో మాట్లాడే ప్రయత్నం చేశాడు. అయితే మాటల సందర్భంగా తనకు ఎలాంటి హానికర ఉద్దేశాలు లేవని ఆమె చెప్పింది. అయినప్పటికీ ఎందుకో అనుమానంతో డెలివరీ బాయ్.. ఆర్డర్ క్యాన్సిల్ చేసాడు. వెనక్కి వస్తూ వస్తూ ఆమెకు కొన్ని మంచి మాటలు చెప్పి ఎలుకల మందు తనతో పాటు వెనక్కి తీసుకుని వచ్చేశాడు. ఈ విషయాన్ని వివరిస్తూ ఆ డెలివరీ బాయ్ సోషల్ మీడియాలో చేసిన పోస్టు, వీడియో నెట్టింట వైరల్ అవుతోంది.

" మొత్తం మూడు ప్యాకెట్ల ఎలుకల మందు. వారు ఏ ఉద్దేశంతో వీటిని ఆర్డర్ చేశారో నాకు తెలియదు. అయితే ఆమె ఏడుస్తూ కనిపించడంతో.. ఏదో జరిగిందనే అనుమానం కలిగింది. అందుకే వీటిని ఆర్డర్ చేశారేమోనని అనిపించింది. కస్టమర్ లొకేషన్ చేరుకోగానే.. ఈ ఆర్డర్ ఇవ్వకూడదని నిర్ణయించుకున్నా. ఆమె ఏడుస్తూనే ఉంది. దీంతో ఎలాంటి సమస్యలు ఉన్నా, ఆత్మహత్య పరిష్కారం కాదని ఆమెకు చెప్పా. ఆత్మహత్య కోసమే వీటిని ఆర్డర్ చేశారా అని అడిగా.. అయితే ఆమె అలాంటిదేమీ లేదని సమాధానం చెప్పింది."

"అయితే మీరు అబద్ధం చెప్తున్నారని అన్నా. మీకు ఎలుకల సమస్య ఉంటే, వీటిని సాయంత్రం ఏడు గంటలప్పుడు ఆర్డర్ చేయొచ్చు. లేదా అంతకంటే ముందే చేయొచ్చు.. లేదా మరుసటి రోజు చేయొచ్చు. ఇలాంటి సమయంలో కాదని చెప్పా. ఆ తర్వాత ఆర్డర్ క్యాన్సిల్ చేశా. నేను ఓ మంచి పని చేశానని నాకు అనిపిస్తోంది" అంటూ డెలివరీ బాయ్ షేర్ చేసిన వీడియో వైరల్ అవుతోంది.

ఈ వీడియో సోషల్ మీడియాలో వైరల్ అవుతుండగా.. నెటిజన్లు అతని సమయస్ఫూర్తిని ప్రశంసిస్తున్నారు. డెలివరీ హీరో విత్ ఎమోషనల్ ఇంటెలిజెన్స్ అంటూ కొంతమంది కామెంట్లు పెడుతుండగా.. ఇలాంటి విషయాలు ఏమైనా ఉంటే వెంటనే పోలీసులకు తెలియజేయాలని మరికొందరు సూచిస్తన్నారు.