అత్యాధునిక క్షిపణితో ఉక్రెయిన్‌పై రష్యా దాడి

దాదాపు నాలుగేళ్లుగా కొనసాగుతోన్న రష్యా-ఉక్రెయిన్‌ యుద్ధం ముగింపునకు శాంతి చర్చలు కొనసాగుతుండగానే ఇరుదేశాలూ పరస్పర దాడులు చేసుకుంటున్నాయి. ఇటీవల మాస్కోలోని రష్యా అధ్యక్షుడి నివాసంపై డ్రోన్లతో ఉక్రెయిన్‌ దాడులు చేసినట్టు మాస్కో ఆరోపించింది. తాజాగా, ఉక్రెయిన్‌పై అత్యాధునిక క్షిపణితో క్రెమ్లిన్ దాడిచేసింది. ధ్వని కంటే 10 రెట్లు వేగంగా ప్రయాణించే ఒరెష్నిక్‌ బాలిస్టిక్ క్షిపణితో పశ్చిమ లివివ్‌ ప్రాంతంపై గురువారం అర్ధరాత్రి విరుచుకుపడింది. తమ అధ్యక్షుడి ఇంటిపైకి దాడికి ప్రతీకారంగానే ఈ క్షిపణిని ప్రయోగించామని మాస్కో రక్షణ శాఖ ప్రకటించింది. రష్యాపై ఆంక్షల బిల్లుకు డొనాల్డ్ ట్రంప్ ఆమోదం తెలిపిన మర్నాడే ఈ దాడి జరగడం గమనార్హం.

ఈ దాడితో ఉక్రెయిన్ కీలక మౌలిక సదుపాయాలను ధ్వంసం చేసినట్లు తెలిపింది. కానీ, క్షిపణిని కచ్చితంగా ఏ ప్రదేశాన్ని లక్ష్యంగా చేసుకున్నారనే వివరాలను మాత్రం రష్యా వెల్లడించలేదు అయితే, ఉక్రెయిన్‌ భూగర్భ గ్యాస్ నిల్వలపై ఈ దాడి జరిగినట్లు నివేదికలు వెలువడుతున్నాయి. తాజా పరిణామాలపై స్పందించిన ఉక్రెయిన్‌ అధికారులు.. దాడిలో నలుగురు చనిపోగా, మరో 22 మంది గాయపడినట్లు తెలిపారు. ఒరెష్నిక్ క్షిపణి నాటో సరిహద్దుకు సమీపంలో పడిందని, ఇది ఐరోపా భద్రతకు పెనుముప్పు అని ఉక్రెయిన్ విదేశాంగ శాఖ మంత్రి ఆండ్రీ సిబిహా అన్నారు.

ఒరెష్నిక్‌‌తో పాటు 12 బాలిస్టిక్, 22 క్రూయిజ్ సహా మొత్తం 36 క్షిపణులు, 242 డ్రోన్లతో రష్యా దాడికి పాల్పడినట్టు ఉక్రెయిన్ అధ్యక్షుడు వొలొడిమిర్ జెలెన్‌స్కీ ఆరోపించారు. దాడిలో కీవ్‌లోని ఖతార్ ఎంబసీ దెబ్బతిందని చెప్పారు. యుద్ధ ఖైదీల మార్పిడికి విషయంలో ఖతార్ మధ్యవర్తిత్వం వహిస్తోందని జెలెన్‌స్కీ గుర్తుచేశారు. ఈ దాడి జరిగిన కొద్ది గంటల తర్వాత దేశాన్ని అప్రమత్తం చేసిన అధ్యక్షుడు.. రష్యా భారీఎత్తున విధ్వంసానికి పాల్పడే ఉద్దేశంతో ఉందని అన్నారు. అత్యంత శీతల వాతావరణాన్ని తనకు అనుకూలంగా మార్చుకోవాలని రష్యా భావిస్తోందని అన్నారు.

ఇక, రష్యా వద్ద ఉన్న అత్యాధునిక క్షిపణుల్లో ఒరెష్నిక్‌ ఒకటి. రష్యన్‌ భాషలో హేజల్‌నట్‌ చెట్టు అని అర్ధం. సాధారణంగా తాను అభివృద్ధి చేసే క్షిపణులకు రష్యా చెట్ల పేర్లను సూచించడం ఆనవాయితీ. ఈ మధ్యశ్రేణి బాలిస్టిక్ క్షిపణి గంటకు 13 వేల కిలోమీటర్ల వేగంతో ప్రయాణించగలదు. అంటే శబ్ద వేగానికి మించి 10 రెట్లు వేగంగా దూసుకెళ్తుంది. ఐరోపాలోని దేశాలన్నీ ఈ క్షిపణి పరిధిలోకి వస్తాయని రష్యా క్షిపణి దళాల చీఫ్ తెలిపారు. ఇప్పటివరకు దీనిని అడ్డుకునే సత్తా కలిగిన ఆయుధం ఏదీ లేదని పేర్కొన్నారు.

ఈ క్షిపణిని తొలిసారి నవంబరు 2024 ఉక్రెయిన్‌‌కు చెందిన ఓ ఫ్యాక్టరీ మీద ప్రయోగించారు. అప్పటికి అభివృద్ధి దశలోనే ఉన్న ఈ క్షిపణి ఇటీవలే పూర్తిస్థాయిలో సిద్ధం చేశారు. మిత్రదేశమైన బెలారస్‌కు ఈ క్షిపణిని రష్యా తరలించినట్లు ఇటీవల వార్తలు వెలువడ్డాయి. ణు బాంబులతో పాటు పలు వార్‌హెడ్‌లను ఇది మోసుకెళ్లగలదు.