అడుగుపెడితే కాల్చిపడేస్తాం.. అమెరికాకు డెన్మార్క్ మాస్ వార్నింగ్

గతవారం వెనుజులా‌పై సైనిక చర్యను చేపట్టి.. ఆ దేశ అధ్యక్షుడు నికోలస్ మదురో, ఆయన భార్యను బందీలుగా తీసుకున్న అమెరికా చూపు ఇప్పుడు ప్రపంచంలోనే అతిపెద్ద దీవి గ్రీన్‌లాండ్‌‌‌పై పడింది. దానిని స్వాధీనం చేసుకోడానికి వెనుకాడబోమని అమెరికా అధ్యక్షుడు డొనాల్డ్ ట్రంప్ చేసిన వ్యాఖ్యలపై డెన్మార్ తీవ్రంగా స్పందించింది. ఆ దీవిలో అడుగుపెడితే కాల్చిపడేస్తామని అమెరికాకు డెన్మార్ స్ట్రాంగ్ వార్నింగ్ ఇచ్చింది. గ్రీన్‌లాండ్ జోలికి వస్తే చూస్తూ ఉరుకోబోమని డెన్మార్క్ రక్షణ మంత్రిత్వ శాఖ హెచ్చరికలు చేసింది.

గ్రీన్‌లాండ్ విషయంలో డొనాల్డ్ ట్రంప్ చేసిన వ్యాఖ్యలపై మీడియా ప్రశ్నకు బదులిస్తూ.. ‘ఒకవేళ గ్రీన్‌లాండ్‌లోకి అమెరికా చొరబడితే సైన్యం ముందు కాల్పులు జరిపి తర్వాత ప్రశ్నలు అడగాలి.. 1952 సైనిక నిబంధన ప్రకారం ఉన్నతాధికారుల ఆదేశాల కోసం ఎదురు చూడకుండానే చొరబాటుదారులపై దాడి చేయొచ్చు. ఆ నిబంధన ఇంకా అమల్లోనే ఉంది’ అని తేల్చిచెప్పింది. డొనాల్డ్ ట్రంప్ నిర్ణయాలతో పొరుగున ఉండే దేశాలు ఆందోళనకు గురవుతున్నాయి. కాగా, డెన్మార్క్ ప్రధానికి ట్రంప్ గత జనవరిలో ఫోన్ చేసి బెదిరింపులకు దిగారు.

వైట్‌హౌస్ ప్రెస్ సెక్రటరీ కరోలిన్ లీవిట్ మాట్లాడుతూ.. ‘అధ్యక్షుడు డొనాల్డ్ ట్రంప్ చాలా స్పష్టంగా చెప్పారు. గ్రీన్‌లాండ్‌ను చేజిక్కించుకోవడం అనేది అమెరికా జాతీయ భద్రతకు సంబంధించిన అంశం. అధ్యక్షుడు, ఆయన బృందం గ్రీన్‌లాండ్‌ను స్వాధీనంపై చర్చలు జరుపుతున్నారు’ అని తెలిపారు. కాగా, అమెరికా విదేశాంగ మంత్రి మార్కో రూబియో సైతం ఇలాంటి వ్యాఖ్యలే చేశారు. తాను వచ్చే వారం డెన్మార్క్, గ్రీన్‌లాండ్ అధికారులతో మాట్లాడటానికి ప్లాన్ చేస్తున్నానని తెలిపారు. గ్రీన్‌లాండ్‌ను కొనుగోలు చేయాలనేది ట్రంప్ అభిమతమని, సైనిక చర్యతో స్వాధీనం చేసుకోవాలని భావించడం లేదని అన్నారు.

అమెరికా ఉపాధ్యక్షుడు జేడీ వాన్స్ మాట్లాడుతూ.. గ్రీన్‌లాండ్‌ భద్రత విషయంలో డెన్మార్క్ సరైన చర్యలు తీసుకోలేదని, ఆర్కిటిక్‌లో అమెరికా ప్రయోజనాలను కాపాడటానికి ట్రంప్ ఎంత దూరమైనా వెళ్లడానికి సిద్ధంగా ఉన్నారని అన్నారు. అయితే, అంతకు ముందు ట్రంప్‌ను హెచ్చరిస్తూ ఐరోపా దేశాధినేతలు ఓ సంయుక్త ప్రకటన విడుదల చేశారు.గ్రీన్‌లాండ్, డెన్మార్క్ ప్రాదేశిక సమగ్రతను గౌరవించాలని పేర్కొన్నారు. అలాగే, డెన్మార్క్ ప్రధాని మెట్టె ఫ్రెడెరిక్సన్ సైతం గ్రీన్‌లాండ్‌పై అమెరికా ఏదైనా దాడికి దిగితే అది నాటో కూటమికి అంతమే అవుతుందని హెచ్చరించారు.