ఎంత శాలరీ ఉంటే.. రూ.50 లక్షల హోమ్ లోన్

సొంత ఇల్లు అనేది ప్రతి ఒక్కరి జీవిత లక్ష్యం. అయితే, ఇల్లు కట్టుకోవడం అంటే పెద్ద మొత్తంలో డబ్బులు అవసరమవుతాయి. ఇక హైదరాబాద్ వంటి నగరాల్లో అయితే, కనీసం రూ. 50 లక్షలు అయినా కావాలి. ప్రస్తుతం చాలా మంది బ్యాంకుల్లో లోన్ తీసుకుంటున్నారు. అలా రూ. 50 లక్షల హోమ్ లోన్ తీసుకునేందుకు అర్హతలు ఏమిటి? ఉద్యోగులు అయితే నెలవారీ జీతం ఎంత ఉంటే రూ. 50 లక్షలు ఇస్తారు? ఈ నగదుపై నెలవారీ ఈఎంఐ ఎంత పడుతుంది? అనే లెక్కలు ఈ కథనం ద్వారా తెలుసుకుందాం.

రిజర్వ్ బ్యాంక్ ఆఫ్ ఇండియా గత ఏడాదిలో రెపో రేటును ఏకంగా 1.25 శాతం తగ్గించింది. దీంతో బ్యాంకులు గృహ రుణ వడ్డీ రేట్లు భారీగానే తగ్గించాయి. ప్రస్తుతం బ్యాంక్ ఆఫ్ బరోడా వంటి కొన్ని బ్యాంకుల్లో కనిష్ఠ వడ్డీ రేటు 7.20 శాతంగా ఉంది. అయితే, కనిష్ఠ వడ్డీ రేటు వద్ద లోన్ రావాలంటే బ్యాంకుల నిబంధనలు అన్ని కచ్చితంగా పాటించాల్సి ఉంటుంది. మంచి క్రెడిట్ స్కోర్ ఉండి, మంచి శాలరీ వచ్చే వారికి అయితే కనిష్ఠ వడ్డీ రేటుతో లోన్ ఇచ్చే అవకాశం ఉంటుంది.

 బ్యాంక్ ఆఫ్ బరోడా ప్రస్తుతం 7.20 శాతం కనిష్ఠ వడ్డీ రేటుతో గృహ రుణాలను అందిస్తోంది. మంచి క్రెడిట్ స్కోర్ ఉన్న వ్యక్తికి ఈ బ్యాంక్ రూ. 50 లక్షల హోమ్ లోన్ కనిష్ఠ వడ్డీ రేటు 7.20 శాతంతో ఇచ్చింది అనుకుందాం. రూ. 50 లక్షల హోమ్ లోన్ పొందడానికి, నెలవారీ జీతం రూ. 68,000 ఆపైన ఉండాలి. అప్పుడే లోన్ ఇచ్చే అవకాశం ఉంటుంది. 30 ఏళ్ల లోన్ టెన్యూర్ ఎంచుకున్నాం అనుకుందాం. అప్పుడు నెలవారీ EMI దాదాపు రూ. 34,000 అవుతుంది.

ఇక 25 సంవత్సరాల టెన్యూర్ ఎంచుకుంటే రూ. 50 లక్షల హోమ్ లోన్ పై నెలవారీ EMI సుమారు రూ. 36,000 అవుతుంది. ఏదైనా బ్యాంకు నుంచి లోన్ తీసుకోవాలంటే మంచి క్రెడిట్ స్కోరు ఉండాలి. బ్యాంకులు ముందుగా అడిగే ప్రశ్న మీ క్రెడిట్ స్కోర్ ఎంత? అనే అడుగుతారు. క్రెడిట్ స్కోరు బాగా లేకపోతే రుణం ఇవ్వడానికి బ్యాంకులు నిరాకరించవచ్చు. అలాగే మీ పాత క్రెడిట్ ఖాతాలను సైతం తనిఖీ చేస్తారు. అందుకే క్రెడిట్ స్కోర్‌ మెరుగ్గా ఉంచుకోవడం చాలా ముఖ్యం. బ్యాంకులు వివిధ అంశాలను పరిగణనలోకి తీసుకుని లోన్ మంజూరు చేస్తాయి. అలాగే వివిధ రకాల ఛార్జీలను వసూలు చేస్తాయి. అన్ని వివరాలు తనిఖీ చేసి లోన్ కోసం అప్లై చేయాలి.