వైవిధ్యభరితం.. సంక్రాంతి సంబరం: భారతావని అంతటా వెల్లివిరుస్తున్న ప్రకృతి ఆరాధన

భారతీయ సంస్కృతిలో మకర సంక్రాంతి పండుగకు ఒక ప్రత్యేకమైన స్థానం ఉంది. సూర్యుడు మకర రాశిలోకి ప్రవేశించే ఈ శుభ ఘడియలను దేశవ్యాప్తంగా ప్రజలు ఎంతో భక్తిశ్రద్ధలతో జరుపుకుంటారు. ప్రాంతాన్ని బట్టి ఆచార వ్యవహారాలు మారినా, ఈ పండుగ వెనుక ఉన్న ప్రధాన ఉద్దేశం మాత్రం ప్రకృతిని పూజించడం మరియు పంటను ఇంటికి తెచ్చిన రైతు ఆనందాన్ని పంచుకోవడం. దేశం నలుమూలల భిన్నత్వంలో ఏకత్వాన్ని చాటుతూ ఈ సంక్రాంతి వేడుకలు ఒక గొప్ప సామాజిక ఉత్సవంగా నిలుస్తాయి.
దక్షిణ భారతావణిలో ఈ పండుగ సందడి మరింత ఎక్కువగా కనిపిస్తుంది. తెలుగు రాష్ట్రాల్లో సంక్రాంతి అంటే కోడి పందేలు, పొట్టేళ్ల పోటీలతో గ్రామాలు కోలాహలంగా మారుతాయి. తమిళనాడులో దీనిని 'పొంగల్' పేరుతో ఘనంగా నిర్వహిస్తూ ప్రకృతికి కృతజ్ఞతలు తెలుపుతారు. కేరళలో ప్రసిద్ధ శబరిమల ఆలయంలో మకరజ్యోతి దర్శనం చేసుకోవడం ఒక ఆధ్యాత్మిక వేడుకగా భావిస్తారు. ఇలా దక్షిణ భారతమంతా ఆచారాలతో పాటు వినోద కార్యక్రమాలతో పండుగ వాతావరణం నెలకొంటుంది.
ఉత్తర మరియు తూర్పు రాష్ట్రాల్లో కూడా ఈ పండుగను విభిన్న శైలిలో జరుపుకుంటారు. పంజాబ్‌లో 'మాంగి' పేరుతో, అస్సాంలో 'బిహు'గా పిలుస్తూ ప్రజలు నృత్య గీతాలతో సందడి చేస్తారు. ఉత్తరప్రదేశ్‌లో 'కిచెరి'గా, ఒడిశాలో 'మకర చౌలా'గా ఈ పర్వదినం ప్రసిద్ధి చెందింది. గుజరాత్‌లో ఈ సమయంలో 'సిదా' పేరిట సోదరీమణులకు ప్రత్యేక బహుమతులు అందజేస్తూ ఆత్మీయతను చాటుకుంటారు. ఇలా ప్రతి రాష్ట్రం తమదైన శైలిలో ఈ సంక్రాంతికి ఒక కొత్త రూపాన్ని ఇస్తాయి.
పేర్లు వేరైనా, ప్రాంతాలు వేరైనా ఈ పండుగ ఇచ్చే సందేశం మాత్రం ఒక్కటే. దానధర్మాలు చేయడం, బంధుమిత్రులతో కలిసి విందులు ఆరగించడం, పాత విభేదాలను మర్చిపోయి కొత్త బంధాలను కలుపుకోవడం ఈ పండుగలోని అసలైన పరమార్థం. గాలిపటాల సందడి నుండి సంప్రదాయ వంటకాల వరకు, ప్రతి అంశం మనుషుల మధ్య అనుబంధాన్ని పెంచుతుంది. మొత్తానికి భారతావనిని ఒకే తాటిపైకి తెచ్చే అద్భుతమైన పర్వదినం ఈ మకర సంక్రాంతి.