విజయవాడ బైపాస్ ఓపెన్, ట్రాఫిక్ కష్టాలు తీరినట్లే..!

సంక్రాంతి పండుగ కానుకగా విజయవాడ వెస్ట్ బైపాస్‌ అందుబాటులోకి తీసుకువచ్చారు అధికారులు. మంగళగిరి మండలం కాజా నుంచి.. కృష్ణా జిల్లా పెదఅవుటుపల్లి వరకు నిర్మించిన ఈ బైపాస్‌ను.. అధికారులు ఒకవైపు అందుబాటులోకి తెచ్చారు. ఈ రహదారిపై వాహనాలను అనుమతించారు. జాతీయ రహదారుల ప్రాధికార సంస్త (ఎన్‌హెచ్‌ఏఐ) అధికారులు పూజలు నిర్వహించి ఈ బైపాస్‌ను ప్రారంభించారు. మొదటగా ఎన్‌హెచ్‌ఏఐ అధికారుల వాహనాలు.. ఆ తర్వాత ఇతర వాహనాలను పంపించారు. కాగా, మార్చిలోపు మరో వైపు రహదారిని కూడా అందుబాటులోకి తీసుకొస్తామని అధికారులు వెల్లడించారు.

విజయవాడ వెస్ట్ బైపాస్ ప్రారంభం కావడం వల్ల.. గుంటూరు వైపు నుంచి వచ్చే వాహనాలు నేరుగా గొల్లపూడి, చిన్నఅవుటపల్లి మీదుగా ఏలూరు వైపు వెళ్లడానికి వీలు అవుతుంది. ఈ తాత్కాలిక ఏర్పాటుతో, సంక్రాంతి సమయంలో ట్రాఫిక్ సమస్యలు తగ్గుతాయని అధికారులు భావిస్తున్నారు. కాగా, గుంటూరు నుంచి ఏలూరు వెళ్లే వాహనాలు ఇకపై విజయవాడ మీదుగా వెళ్లాల్సిన అవసరం ఉండదు. విజయవాడ పశ్చిమ బైపాస్‌లో.. గొల్లపూడి వైపు నుంచి వచ్చే వాహనాలకు మాత్రం ప్రస్తుతం కాజా వరకు వచ్చేందుకు అవకాశం లేదని అధికారులు చెప్పా. ఈ మార్గంలో కొన్ని చోట్ల పనులు జరుగుతున్నాయని చెప్పారు. పూర్తిస్థాయి బైపాస్‌ను అందుబాటులోకి తీసుకువచ్చిన తర్వాత.. వెంకటపాలెం వద్ద టోల్‌ వసూలు చేస్తామని అధికారులు తెలిపారు.

మరోవైపు, విజయవాడ పశ్చిమ బైపాస్‌లో గొల్లపూడి వైపు నుంచి వచ్చే వాహనాలను ఈ నెలాఖరు నాటికి హాయ్‌ల్యాండ్‌ రోడ్డు వరకు అనుమతించేలా అధికారులు ప్రణాళికలు సిద్ధం చేస్తున్నారు. అందులో భాగంగా బైపాస్‌లో రెండో వైపు కూడా పనులు శరవేగంగా జరుగుతున్నాయి. వెస్ట్‌ బైపాస్‌ నుంచి హాయ్‌ల్యాండ్‌ రోడ్‌లో దిగే వాహనాలు.. చెన్నై - కోల్‌కతా హైవే సర్వీస్‌ రోడ్డులోకి వెళ్తాయి. ఇలా చేయడం వల్ల వాహనదారులు మరింత సులభంగా తమ గమ్యస్థానాలకు చేరుకుంటారు.

విజయవాడ పశ్చిమ బైపాస్‌లో భాగంగా కాజ నుంచి గొల్లపూడి వరకు 17.88 కిలోమీటర్ల రహదారిని నిర్మిస్తున్నారన్న సంగతి తెలిసిందే. అంతేకాకుండా గొల్లపూడి నుంచి చిన్నఅవుటపల్లి వరకు 30 కిలోమీటర్ల ఆరు వరుసల రహదారిని కూడా నిర్మిస్తున్నారు. గొల్లపూడి నుంచి చిన్నఅవుటపల్లి మధ్య రోడ్డు నిర్మాణం ఇప్పటికే పూర్తయింది. గతేడాది నవంబర్ నుంచే ఈ మార్గంలో వాహనాలు రాకపోకలు సాగించేందుకు అధికారులు అనుమతి ఇచ్చారు. తాజాగా కాజ నుంచి గొల్లపూడి మధ్య కూడా ఒకవైపు వాహనాల రాకపోకలకు అధికారులు అనుమతి ఇచ్చారు.