నెల సంపాదన ఒక్కరోజులో..జాలర్లకు చిక్కిన అరుదైన చేప

సముద్రంలో వేటకు వెళ్లిన మత్స్యకారులకు సంక్రాంతి పండగ రోజు జాక్‌పాట్ తలిగింది. వలకు అరుదైన చేపలు చిక్కడంతో వారి పంట పండింది. అనకాపల్లి జిల్లాలోని ఓ తీరప్రాంత గ్రామంలోని మత్స్యకారులు సముద్రంలో వేటకు వెళ్లారు. చేపల కోసం వల విసరగా.. అందులో మూడు అరుదైన కచిడి చేపలు చిక్కాయి. అనంతరం వాటిని స్థానికంగా వేలం వేశారు. వీటిని కొనుగోలు చేయడానికి స్థానిక వ్యాపారులు పోటీపడ్డారు. వేలంలో మూడు చేపలకు కలిసి రూ. లక్షకు పైగా ధర పలికింది. దీంతో నెల రోజుల పాటు కష్టపడి సంపాదించే డబ్బులను ఒక్కపూటలో ఆర్జించారు మత్స్యకారులు. కాగా, పండుగ పూట గంగమ్మ తల్లి ఇచ్చిన దీవెనకగా దీన్ని అభివర్ణిస్తున్నారు జాలర్లు.

పండుగ పూట జాలర్లకు చిక్కిన ఈ అరుదైన చేపలకు చాలా డిమాండ్ ఉంటుంది. ఆడ చేపలు కంటే మగ కచిడి చేపలు బంగారు వర్ణంలో మెరిసిపోతాయి. అందుకే వీటిని గోల్డెన్‌ ఫిష్‌ అంటారని మత్య్సకారులు చెబుతున్నారు. వలలో పడిన కచిడి చేపల్లో రెండు ఆడవి కాగా.. మరొకటి మగది. వేలానికి ముందు ఈ చేపల పొట్ట కోసి అవి ఆడవో, మగవో నిర్ధరించుకున్నారు మత్స్యకారులు. అనంతరం వేలం వేయగా.. ఈ కచిడి చేపలను దక్కించుకోవడానికి స్థానిక వ్యాపారులు పోటీ పడ్డారు. రెండు ఆడ చేపలకు రూ. 40 వేలకు పైగా ధర పలికింది. కాగా, మగ చేపకు ఒక్కదానికే రూ. 60 వేలకు పైగా రేటు పలకడం గమనార్హం. దీంతో జాలర్లకు దాదాపు రూ. లక్షకు పైగా ఆదాయం వచ్చింది. నెలంతా కష్టపడి పని చేసినా.. ఇన్ని డబ్బులు వచ్చేవి కాదని మత్స్యకారులు అంటున్నారు.

అంత ధర ఎందుకు?

కచిడి చేపల శాస్త్రీయ నామం ప్రొటోనిబియా డయాకాన్తస్. రుచిగా ఉండే ఈ చేపల్లో ఔషధగుణాలు ఉంటాయి. ఔషధాల తయారీలో కచిడి చేప పిత్తాశయం, ఊపిరితిత్తులను వినియోగిస్తారు. అంతేకాకుండా కచిడి చేప నుంచి తీసే పదార్థాలతో.. ఆపరేషన్లు చేసిన తర్వాత కుట్లు వేయడానికి ఉపయోగించే దారాన్ని తయారు చేస్తారు. చేప పొట్టభాగం నుంచి తయారుచేసే ఈ దారం.. సమయం గడిచేకొద్దీ శరీరంలో కలిసిపోతుంది. అంతేకాకుండా ఖరీదైన వైన్‌ తయారీలో కూడా కచిడి చేపను ఉపయోగిస్తారని నిపుణులు చెబుతున్నారు. అయితే ఈ కచిడి చేపలు ఓ చోట నిలకడగా ఉండవని.. సముద్రంలో ఒక చోట నుంచి మరో చోటుకు ప్రయాణిస్తూనే ఉంటాయని అంటున్నారు. అరుదుగా మాత్రమే ఇవి వలలకు చిక్కుతాయని అంటున్నారు. కాగా, ఈ చేప రెక్కలను మరికొన్ని పదార్థాల తయారీ ప్రాసెస్‌లో వినియోగిస్తారని కూడా జాలర్లు అంటున్నారు.