ఇటు ఎమ్మెల్సీ, అటు మాజీ ఎంపీకి..,,వైసీపీ నేతలకు వరుస షాకులు

వైసీపీ నేత, హిందూపురం మాజీ ఎంపీ గోరంట్ల మాధవ్‌పై నాన్ బెయిలబుల్ వారెంట్ జారీ అయ్యింది. అత్యాచార బాధితురాలి పేరును బయటపెట్టారంటూ గోరంట్ల మాధవ్ మీద విజయవాడ సైబర్ క్రైమ్ పోలీస్ స్టేషన్‌లో కేసు నమోదైంది. అత్యాచారానికి గురైన బాలిక పేరును గోరంట్ల మాధవ్ బయటపెట్టారంటూ ఏపీ మహిళా కమిషన్ మాజీ ఛైర్ పర్సన్ వాసిరెడ్డ పద్మ గతంలో విజయవాడ సైబర్ క్రైమ్ పోలీస్ స్టేషన్‌లో ఫిర్యాదు చేశారు. ఈ ఫిర్యాదు ఆధారంగా విజయవాడ సైబర్ క్రైమ్ పోలీసులు గోరంట్ల మాధవ్ మీద పోక్సో చట్టం కింద కేసు నమోదు చేశారు. ఈ కేసు విచారణ విజయవాడ పోక్సో కోర్టులో శుక్రవారం జరిగింది. ఈ విచారణకు గోరంట్ల మాధవ్ హాజరుకాలేదు. ఈ నేపథ్యంలో విజయవాడ పోక్సో కోర్టు.. గోరంట్ల మాధవ్‌పై నాన్ బెయిలబుల్ వారెంట్ జారీ చేసింది. అనంతరం జనవరి 30వ తేదీకి విచారణను వాయిదా వేసింది.

వైసీపీ ఎమ్మెల్సీకి షాక్..

మరోవైపు వైసీపీ ఎమ్మెల్సీ అనంతబాబుకు హైకోర్టు షాక్ ఇచ్చింది. ఎమ్మెల్సీ అనంతబాబు భార్య అనంత లక్ష్మీ దుర్గకు అరెస్ట్ నుంచి రక్షణ కల్పించేలా మధ్యంతర ఉత్తర్వులు ఇచ్చేందుకు నిరాకరించింది. కారు డ్రైవర్, దళిత యువకుడైన సుబ్రమణ్యం హత్య కేసులో అనంతబాబు ఆరోపణలు ఎదుర్కొంటున్నారు. అయితే ఈ కేసులో కొత్త విషయాలు వెలుగులోకి వచ్చాయని.. శుక్రవారం రోజున అదనపు పబ్లిక్ ప్రాసిక్యూటర్ హైకోర్టుకు తెలియజేశారు.

  ఈ కేసు ఎస్సీ, ఎస్టీ చట్టంతో ముడిపడిన కారణంగా.. బాధిత కుటుంబసభ్యులు, ఫిర్యాదుదారుకు నోటీసులు ఇవ్వాలని కోర్టును కోరారు. వారి వాదనలు వినాల్సిన అవసరం ఉందని ఏపీపీ హైకోర్టుకు తెలిపారు.ఈ నేపథ్యంలో అనంత లక్ష్మీ దుర్గ ముందస్తు బెయిల్ పిటిషన్‌ విచారణలో.. సుబ్రమణ్యం తల్లికి నోటీసులు ఇచ్చింది ఏపీ హైకోర్టు. అనంతరం జనవరి 20 తేదీకి విచారణ వాయిదా వేసింది.

మరోవైపు అనంతలక్ష్మీదుర్గ తరఫున వాదనలు వినిపించిన న్యాయవాది.. ఆమెకు అరెస్ట్‌ నుంచి రక్షణ కల్పించేలా మధ్యంతర ఉత్తర్వులివ్వాలని హైకోర్టును కోరారు. అయితే ఈ అభ్యర్థనను హైకోర్టు తోసిపుచ్చింది. మధ్యంతర ఉత్తర్వులు ఇచ్చేందుకు నిరాకరించింది. అనంతబాబు కారు డ్రైవర్.. సుబ్రహ్మణ్యం హత్య కేసులో తనను అరెస్ట్‌ చేయకుండా.. ముందస్తు బెయిలివ్వాలంటూ అనంతబాబు భార్య అనంత లక్ష్మీదుర్గ హైకోర్టులో పిటిషన్ వేసిన సంగతి తెలిసిందే. ఈ పిటిషన్ విచారించిన ఏపీ హైకోర్టు.. అరెస్ట్ చేయకుండా ముందస్తు ఉత్తర్వులు ఇచ్చేందుకు నిరాకరించింది.