టీటీడీ కళాశాలల్లో చదివే విద్యార్థులకు.. 1080 మందికి ఛాన్స్

తిరుమల తిరుపతి దేవస్థానం విద్యార్థులకు శుభవార్త వినిపించింది. తిరుమల తిరుపతి దేవస్థానం (టీటీడీ) పరిధిలో స్కూళ్లు, కాలేజీలు పనిచేస్తున్న సంగతి తెలిసిందే. ఈ నేపథ్యంలో టీటీడీ కాలేజీలలోని విద్యార్థులకు అదనంగా1080 మందికి హాస్టల్ సౌకర్యం కల్పించాలని నిర్ణయించింది. టీటీడీ ఈవో అనిల్ కుమార్ సింఘాల్ .. ఎస్వీ విద్యాదానం ట్రస్టుపై సోమవారం సమీక్ష నిర్వహించారు. టిటిడి పరిపాలనా భవనంలో అధికారులతో సమావేశం నిర్వహించారు.ఈ సందర్బంగా టీటీడీ కాలేజీలు, స్కూళ్లల్లో ఆధునిక వసతి సౌకర్యాలు, అదనపు తరగతి గదులు, అదనపు వసతి, మినీ సమావేశ మందిరం వంటి మౌళిక సదుపాయాల కల్పనపై చర్చించారు. ఈ సదుపాయాలను కల్పించేందుకు చర్యలు చేపట్టాలని అధికారులను టీటీడీ ఈవో అనిల్ కుమార్ సింఘాల్ ఆదేశించారు.

టీటీడీ పాఠశాలలు, కళాశాలల్లో మౌళిక సదుపాయాలపై టిటిడి పాలక మండలి ఏర్పాటు చేసిన సబ్ కమిటీ.. 22 ప్రతిపాదనలు చేసిందని.. ఈ సిఫార్సులను అమలు చేసేందుకు చర్యలు చేపట్టాలని అధికారులకు స్పష్టం చేశారు. ఇందుకోసం ఇప్పటికే విడుదలైన నిధులు కాకుండా.. ఇంకా నిధులు కావాల్సి ఉంటే టీటీడీ పాలకమండలికి తెలియజేయాలన్నారు. మౌలిక సదుపాయాలను మెరుగుపరిస్తే టీటీడీ కాలేజీలలోని విద్యార్థులకు అదనంగా 1080 మందికి హాస్టల్ సౌకర్యం కల్పించవచ్చని టీటీడీ ఈవో తెలిపారు.

టీటీడీ విద్యాసంస్థలలో తరగతి గదులు, వాష్ రూములు, వంటగదులు, వేడి నీటి సౌకర్యాలు, డిజిటలైజేషన్ ప్రక్రియ, కంప్యూటర్లు, ప్రింటర్లు, సీసీ కెమెరాలు, ఇంట్రాక్టివ్ ప్యానల్ బోర్డులు, నెట్ వర్కింగ్ మెటిరియల్, మొబైల్ మెడికల్ యూనిట్ వంటి అంశాలపై అనిల్ కుమార్ సింఘాల్ సమీక్ష నిర్వహించారు. సదరు అంశాల గురించి టీటీడీ జేఈవో వీరబ్రహ్మం , టీటీడీ సీఈ సత్యనారాయణ ప్రత్యేకంగా పర్యవేక్షించాలని.. అనంతరం నివేదిక సమర్పించాలని టీటీడీ ఈవో అనిల్ కుమార్ సింఘాల్ ఆదేశించారు.

ఫిబ్రవరిలో తిరుమల శ్రీవారి ఆలయంలో పలు విశేష పర్వదినాలు నిర్వహించనున్నారు. ఫిబ్రవరి ఒకటో తేదీన రామకృష్ణ తీర్థ ముక్కోటి. మాఘ పౌర్ణమి గరుడ సేవలు నిర్వహిస్తారు. మూడో తేదీన తిరుమొళి శైయాళ్వార్ వర్ష తిరు నక్షత్రం, ఆరో తేదీన కూరత్తాళ్వార్ వర్ష తిరు నక్షత్రం, ఫిబ్రవరి 26వ తేదీన శ్రీవారి తెప్పోత్సవాలు ప్రారంభం, ఫిబ్రవరి 28వ తేదీన కుళశేఖరాళ్వార్ వర్ష తిరు నక్షత్రం రానున్నాయి.