ఎస్బీఐ, హెచ్‌డీఎఫ్‌సీ సహా టాప్ బ్యాంకుల,,,,టూ వీలర్ లోన్లపై వడ్డీ రేట్లు ఇలా

ఇప్పట్లో ద్విచక్రవాహనం లేని ఇల్లు లేదంటే పెద్ద అతిశయోక్తి కాదు. ఇటీవలి కాలంలో కేంద్రం వీటిపై జీఎస్టీ రేట్లను కూడా తగ్గించింది. దీంతో ధరలు తగ్గాయి. మనకు ద్విచక్ర వాహనం సొంతం చేసుకోవాలనే కోరిక ఉంటే చాలు.. లోన్లు ఇచ్చే బ్యాంకులు, నాన్ బ్యాంకింగ్ ఫైనాన్స్ కంపెనీలు, ఇతర రుణ సంస్థలు ఎన్నో ఉన్నాయని చెప్పొచ్చు. ఇక్కడ వాహన కొనుగోలు దారులు బ్యాంక్ మొబైల్ యాప్ లేదా వెబ్‌సైట్ ద్వారా లోన్ అప్లికేషన్ ఫారం పూరించవచ్చు. లేదా బ్యాంక్ బ్రాంచుల్ని సందర్శించి కూడా లోన్ కోసం అప్లై చేసుకోవచ్చు. ఇక్కడ లోన్ తీసుకునే ముందు కొన్ని విషయాల గురించి కచ్చితంగా తెలుసుకోవాలి. వీటిల్లో ముఖ్యంగా వడ్డీ రేట్ల గురించి తెలుసుకోవాల్సి ఉంటుంది. ఇదే మీ ఈఎంఐని నిర్ణయిస్తుంది. వడ్డీ రేటు తక్కువగా ఉంటే ఈఎంఐ తక్కువగా ఉంటుందని చెప్పొచ్చు. అందుకే ఏ బ్యాంకుల్లో వడ్డీ రేట్లు ఎలా ఉన్నాయో ముందుగా పోల్చుకొని చూడాలి.

వడ్డీ రేట్లతో పాటు ప్రాసెసింగ్ ఫీజులు, ఆలస్య చెల్లింపు రుసుములు (లేట్ ఫీ), ప్రీ పేమెంట్ ఛార్జీలు, ప్రీ క్లోజర్ ఛార్జీలు (ముందస్తు చెల్లింపు రుసుములు), రుణ చెల్లింపులు, ఇతర నిబంధనలు ఇలా అన్ని విషయాల్ని లోన్ తీసుకునే ముందుగానే సరిచూసుకోవాల్సి ఉంటుంది. ఇక చాలా బ్యాంకులు, ఆర్థిక సంస్థలు మీ వాహనం విలువలో 80 శాతం నుంచి 90 శాతం వరకు లోన్ ఇస్తున్నాయి.

 ఇంకొన్ని బ్యాంకులు, ఆర్థిక సంస్థలు మాత్రం అదనపు నిబంధనలు, షరతులతో 100 శాతం వరకు కూడా లోన్ ఇస్తుండటం విశేషం. ఇంకా సిబిల్ స్కోరు 750 లేదా అంతకంటే ఎక్కువగా ఉన్నవారికి ఇంకాస్త తక్కువ వడ్డీ రేటుకే లోన్ వేగంగా మంజూరు అవుతుంది. దేశంలోని టాప్ బ్యాంకుల్లో వడ్డీ రేట్లు, ప్రాసెసింగ్ ఫీజులు ఎలా ఉన్నాయో తెలుసుకుందాం.

ఎస్బీఐలో టూ వీలర్ లోన్ వడ్డీ రేట్లు 12.60 శాతంగా ఉన్నాయి. ప్రాసెసింగ్ ఫీజు లోన్ మొత్తంలో 2 శాతం వరకు వసూలు చేస్తుంది. అతిపెద్ద ప్రైవేట్ రంగ బ్యాంకు.. హెచ్‌డీఎఫ్‌సీ బ్యాంకులో చూస్తే 14.50 శాతంగా వడ్డీ రేటు ఉండగా.. ప్రాసెసింగ్ రుసుములు 2.50 శాతంగా ఉన్నాయి. ఐసీఐసీఐ బ్యాంకులో ద్విచక్ర వాహన రుణాలపై వడ్డీ రేటు 10.25 శాతంగా ఉంది. ఇక్కడ 4 శాతం వరకు ప్రాసెసింగ్ ఫీజు వసూలు చేస్తోంది.

యాక్సిస్ బ్యాంకులో వడ్డీ రేటు 10.50 శాతంగా ఉంది. 0.50 శాతం నుంచి ప్రాసెసింగ్ రుసుముల్ని వసూలు చేస్తున్నాయి. ఐడీఎఫ్‌సీ ఫస్ట్ బ్యాంకులో కాస్త తక్కువగా 8.50 శాతం వడ్డీ రేటు నుంచే ప్రారంభమవుతున్నాయి. ఇక్కడ ప్రాసెసింగ్ ఫీజు మాత్రం గరిష్ఠంగా 5 శాతం వరకు ఉంది. ఇతర రుణ సంస్థల విషయానికి వస్తే టాటా క్యాపిటల్ సంస్థలో 12.50 శాతంగా వడ్డీ రేటు ఉంది. 4 శాతం వరకు ప్రాసింగ్ ఫీజు వేస్తోంది. హీరో ఫిన్‌కార్ప్ వడ్డీ రేటు 14 శాతంగా ఉంది.