Gold, Silver: బంగారం, వెండి కొనడానికి ఇదే సరైన సమయమా? లేక ఇంకా వేచి చూడాలా?

Gold, Silver: దేశీయంగా, అంతర్జాతీయంగా బంగారం, వెండి ధరలు వరుసగా కొత్త గరిష్టాలను నమోదు చేస్తున్నాయి. ప్రపంచవ్యాప్తంగా కొనసాగుతున్న భౌగోళిక రాజకీయ ఉద్రిక్తతల నేపథ్యంలో, విలువైన లోహాల మెరుపు రోజురోజుకూ మరింత పెరుగుతోంది.ఈ పరిస్థితుల్లో ప్రతి పెట్టుబడిదారుడి, సామాన్యుడి మనస్సులో మెదులుతున్న ప్రధాన ప్రశ్న ఒక్కటే – ఇప్పుడే బంగారం, వెండి కొనాలా? లేక కొంతకాలం వేచి చూడాలా?ప్రస్తుతం హైదరాబాద్ మార్కెట్‌లో 10 గ్రాముల బంగారం ధర రూ.1,56,600కి చేరి సరికొత్త ఆల్‌టైమ్ హైని తాకింది. అదే సమయంలో వెండి ధరలు కూడా గత రికార్డులన్నింటిని బద్దలు కొట్టి కిలోకు రూ.3,45,000 స్థాయికి చేరుకున్నాయి.రాబడుల పరంగా చూస్తే బంగారం, వెండి పెట్టుబడిదారులను ఆశ్చర్యానికి గురిచేశాయి. గణాంకాల ప్రకారం, సరిగ్గా ఏడాది క్రితం 10 గ్రాముల బంగారం కొనుగోలు చేసిన వ్యక్తికి నేడు దాదాపు 80 శాతం లాభం లభించింది. బ్యాంక్ ఫిక్స్‌డ్ డిపాజిట్‌లో డబ్బు రెట్టింపు కావడానికి 7–8 సంవత్సరాలు పట్టే పరిస్థితిలో, బంగారం, వెండి కేవలం ఒకే సంవత్సరంలో అద్భుత రాబడులను అందించాయి. పెద్ద స్టాక్స్ కూడా ఇంత స్థాయి రాబడులు ఇవ్వలేకపోవడంతో పెట్టుబడిదారులు విలువైన లోహాల వైపు ఎక్కువగా మొగ్గు చూపుతున్నారు.
*ధరల పెరుగుదలకు కారణాలు ఏమిటి? బంగారం, వెండి ధరల భారీ పెరుగుదల వెనుక అనేక అంతర్జాతీయ అంశాలు ఉన్నాయని నిపుణులు చెబుతున్నారు. ముఖ్యంగా గ్రీన్‌ల్యాండ్ సంక్షోభంతో ముడిపడిన భౌగోళిక రాజకీయ ఉద్రిక్తతలు ప్రపంచవ్యాప్తంగా అనిశ్చితిని పెంచాయి. యుద్ధ భయాలు లేదా పెద్ద స్థాయి సంఘర్షణలు పెరిగిన ప్రతీసారి పెట్టుబడిదారులు స్టాక్ మార్కెట్ల వంటి రిస్క్ పెట్టుబడుల నుంచి బయటకు వచ్చి బంగారం వంటి సురక్షిత పెట్టుబడుల వైపు దృష్టి పెడతారు. దీనినే “సేఫ్ హెవెన్ డిమాండ్”గా పేర్కొంటారు.అదనంగా అమెరికన్ డాలర్ బలహీనత, జపాన్ ప్రభుత్వ బాండ్లలో క్షీణత కూడా బంగారం ధరలకు మద్దతు ఇస్తున్నాయి. కరెన్సీలు, బాండ్లు బలహీనపడినప్పుడు బంగారం మరింత సురక్షితమైన ఎంపికగా మారుతుంది. దీనికి తోడు పన్నులపై ఆందోళనలు, అమెరికా–యూరప్ మధ్య వాణిజ్య ఉద్రిక్తతలు కూడా మార్కెట్‌లో భయాన్ని పెంచుతున్నాయి. పెద్ద సంస్థాగత పెట్టుబడిదారులు రిస్క్ తీసుకోవడం కంటే బంగారంలో పెట్టుబడులను పెంచుకుంటున్నారు.
కొనాలా? లేక వేచి ఉండాలా? బంగారంతో పోలిస్తే వెండి ధరలు మరింత వేగంగా పెరుగుతున్నాయి. ఇందుకు ప్రధాన కారణం పెరుగుతున్న పారిశ్రామిక డిమాండ్. సౌర విద్యుత్ ప్లాంట్లు, ఎలక్ట్రిక్ వాహనాలు, ఏఐ సర్వర్లు వంటి ఆధునిక రంగాల్లో వెండి వినియోగం భారీగా పెరుగుతోంది. అయితే సరఫరా పరిమితంగా ఉండటంతో ధరలు వేగంగా ఎగబాకుతున్నాయి.ప్రపంచవ్యాప్తంగా ఉద్రిక్తతలు, అనిశ్చితి కొనసాగితే బంగారం, వెండి ధరల పెరుగుదల కొంతకాలం కొనసాగవచ్చని నిపుణులు అంచనా వేస్తున్నారు. వెండి ధరలు కిలోకు రూ.3.5 నుంచి రూ.4 లక్షల వరకు చేరవచ్చని, బంగారం ధరలు కూడా మరింత ఎగువ స్థాయిలను తాకవచ్చని మార్కెట్ వర్గాలు భావిస్తున్నాయి. అయితే పరిస్థితులు మెరుగుపడితే లేదా వడ్డీ రేట్లలో మార్పులు వస్తే ధరల్లో దిద్దుబాటు లేదా తగ్గుదల కూడా సంభవించే అవకాశం ఉందని హెచ్చరిస్తున్నారు.ఈ నేపథ్యంలో సాధారణ పెట్టుబడిదారులు తీసుకోవాల్సిన నిర్ణయం చాలా కీలకం. పెళ్లిళ్లు లేదా ఇతర అవసరాల కోసం బంగారం, వెండి కొనుగోలు చేయాల్సిన వారు తమ అవసరాలను బట్టి దశలవారీగా కొనుగోళ్లు చేయడం మంచిదని నిపుణులు సూచిస్తున్నారు. ఒకేసారి పెద్ద మొత్తంలో పెట్టుబడి పెట్టడం కంటే, ధరల హెచ్చుతగ్గుల ప్రభావాన్ని తగ్గించేలా నెమ్మదిగా, ఆలోచనాత్మకంగా పెట్టుబడి పెట్టడం ఉత్తమమని సలహా ఇస్తున్నారు.