తనని అడక్కుండా భార్య డిష్ వాషర్ కొందని ఇల్లంతా ధ్వంసం

భార్యాభర్తల మధ్య చిన్నపాటి గొడవలు రావడం సహజమే. అయితే భర్తకు నచ్చని పని భార్య, భార్యకు నచ్చని పని భర్త చేసినప్పుడు వారితో ఒకరోజో రెండు రోజులో మాట్లాడకుండా ఉంటారు. మళ్లీ గొడవను మర్చిపోయి.. కలిసుంటారు. కానీ మనం ఇప్పుడు చూడబోయే ఓ ఘటనలో మాత్రం భార్య చేసిన ఓ చిన్న తప్పుకు.. విపరీతమైన కోపం తెచ్చుకున్న భర్త ఎవరూ ఊహించని ఓ పని చేశాడు. ముఖ్యంగా తన సొంత ఇంటినే ధ్వంసం చేసుకున్నాడు. ఇందుకు సంబంధించిన వీడియో ప్రస్తుతం సోషల్ మీడియాలో తెగ వైరల్ అవుతోంది. చైనాలోని గ్వాంగ్‌డాంగ్ ప్రాంతంలో జరిగిన ఈ ఘటన.. కుటుంబాల్లో పెరుగుతున్న ఆర్థిక ఒత్తిళ్లు, గృహ హింసపై పెద్ద చర్చకు దారితీసింది.

అసలేం జరిగిందంటే..?

స్థానిక కథనాల ప్రకారం.. ఒక మహిళ తన ఇంట్లో పనులు సులభతరం చేసుకోవడానికి సుమారు 269 డాలర్లు (భారత కరెన్సీ ప్రకారం దాదాపు రూ. 25,000) ఖరీదు చేసే ఒక డిష్‌వాషర్‌ను ఆన్‌లైన్‌లో కొనుగోలు చేసింది. అయితే ఈ విషయం ఆమె భర్తకు తెలియదు. తీరా అది ఇంటికి వచ్చి, టెక్నీషియన్లు బిగిస్తున్న సమయంలో ఆమె భర్త ఇంటికి వచ్చాడు. తన అనుమతి లేకుండా అంత డబ్బు ఖర్చు చేసి ఆ యంత్రాన్ని ఎందుకు కొన్నావంటూ భార్యను నిలదీశాడు. వెంటనే ఆర్డర్ క్యాన్సిల్ చేసి వెనక్కి పంపాలని హుకూం జారీ చేశాడు.

  కానీ శీతాకాలంలో కుళాయి నీరు మరీ చల్లగా ఉండటం వల్ల చేతులతో గిన్నెలు కడగలేకపోతున్నానని, ఇంటి పనుల్లో భర్త సహకారం కూడా లేకపోవడంతోనే తాను డిష్‌వాషర్ కొన్నానని ఆమె వాదించింది. దీంతో కోపంతో ఊగిపోయిన భర్త ఒక్కసారిగా విచక్షణ కోల్పోయాడు. సోఫాలు, టీవీ, ఇతర ఫర్నిచర్‌ను పగులగొట్టి గదిని రణరంగంలా మార్చేశాడు. భర్త ప్రవర్తనతో భీతిల్లిన ఆ మహిళ ఏడుస్తూ బయటకు వెళ్లిపోయి.. ఆ రాత్రి ఒక హోటల్‌లో గడిపింది.

ఈ జంటలో భర్త ఇంటికి దూరంగా ఉంటూ నెలకు సుమారు 11,000 యువాన్లు (భారత కరెన్సీ ప్రకారం సుమారు రూ. 1.45 లక్షలు) సంపాదిస్తున్నాడు. భార్య ఇంట్లోనే ఉంటూ ఇద్దరు పిల్లలను చూసుకుంటోంది. గత ఏడాది కాలంగా ఆమెకు అనారోగ్య సమస్యలు రాగా.. వైద్యం కోసం భర్త బాగానే డబ్బులు ఖర్చు పెట్టాడు. అలాగే భార్యా, పిల్లల్ని చూసుకోవడం కోసం కొన్నాళ్లు ఆయన ఉద్యోగం కూడా మానేశాడు. ఈక్రమంలోనే అప్పులపాలయ్యాడు. ఇప్పుడిప్పుడే కాస్త అప్పులు తీరుస్తూ వస్తున్న అతడికి.. భార్య విచ్చలవిడిగా డబ్బు ఖర్చు చేయడం ఏమాత్రం నచ్చలేదు. అందువల్లే అతడు డిష్ వాషర్‌ను రిటర్న్ చేశాడని భార్యే స్వయంగా తెలిపింది.

అయితే మరుసటి రోజు అతను శాంతించి, తన ప్రవర్తనకు క్షమాపణలు కోరాడు. "మరోసారి చిన్న డిష్‌వాషర్ కొందాం" అంటూ భార్యకు సర్దిచెప్పాడు. అయితే ఈ ఘటనకు సంబంధించిన వీడియో వైరల్ కావడంతో నెటిజన్లు రెండు వర్గాలుగా విడిపోయారు. "ఇలాంటి హింసాత్మక ప్రవృత్తి ఉన్న వ్యక్తితో ఉండటం ప్రమాదం. వస్తువులు పగులగొట్టడం కూడా గృహ హింస కిందికే వస్తుంది. వెంటనే విడాకులు తీసుకో" అని కొందరు కామెంట్స్ చేశారు. మరికొందరేమో.. "ఒక్కడే సంపాదిస్తూ అప్పుల్లో ఉన్న వ్యక్తిపై భార్య అనవసర ఆర్థిక భారం వేయడం తప్పు. ఇద్దరూ మాట్లాడుకుని నిర్ణయం తీసుకోవాల్సింది" అని భర్తకు మద్దతుగా నిలిచారు. మరి ఈ వీడియో చూస్తే మీకేమనిపిస్తుందో కామెంట్ల రూపంలో వెల్లడించండి.