వరల్డ్ బ్యాంక్‌లో కెరియర్ ప్రారంభించాలనుకుంటున్నారా?.. అయితే దరఖాస్తు చేసుకోండిలా

ప్రపంచవ్యాప్తంగా ఉన్న ప్రతిభావంతులైన విద్యార్థుల కోసం వరల్డ్ బ్యాంక్ గ్రూప్ తన ప్రతిష్టాత్మక 'పయనీర్స్ ఇంటర్న్‌షిప్ ప్రోగ్రామ్ 2026' నోటిఫికేషన్‌ను విడుదల చేసింది. అంతర్జాతీయ అభివృద్ధి, ఆర్థిక వ్యవస్థ, సామాజిక మార్పులపై ఆసక్తి ఉన్న యువ వృత్తి నిపుణులకు ఈ ప్రోగ్రామ్ ఒక గొప్ప వేదికగా నిలవనుంది. ప్రపంచంలోనే అత్యంత ప్రభావవంతమైన ఈ ఆర్థిక సంస్థలో ప్రత్యక్షంగా పని చేయడం ద్వారా అంతర్జాతీయ స్థాయి నైపుణ్యాలను పెంపొందించుకోవచ్చు. మరి ఆసక్తి కలగ్గిన వారంతా వెంటనే దరఖాస్తు చేసుకోండి.

ఏమిటీ పయనీర్స్ ప్రోగ్రామ్?

ఈ ఇంటర్న్‌షిప్ ద్వారా ఎంపికైన అభ్యర్థులు కేవలం అకడమిక్ అంశాలకే పరిమితం కాకుండా నిజ జీవితంలో ఎదురయ్యే ప్రపంచ అభివృద్ధి సవాళ్లపై పని చేస్తారు. సీనియర్ నిపుణుల పర్యవేక్షణలో ప్రాజెక్టులలో పాల్గొనడం ద్వారా ప్రపంచ బ్యాంకు ఎలా పని చేస్తుందో లోతుగా తెలుసుకునే అవకాశం లభిస్తుంది. అయితే ఇందుకోసం జనవరి 19వ తేదీన దరఖాస్తుల ప్రారంభం కానున్నాయి. ఫిబ్రవరి 17వ తేదీ చివరి తేదీ. అలాగే మార్చిలో దీనికి సంబంధించిన ఇంటర్వ్యూల సమాచారం అందుతుంది. అయితే ఈ ప్రోగ్రామ్ ఏప్రిల్ నుంచి సెప్టెంబర్ మధ్యలో ప్రారంభం కానుంది.

 ఈ ప్రోగ్రామ్ రెండు విభాగాలుగా విభజించారు. అందులో ఒకటి డిగ్రీ చివరి సంవత్సరం చదువుతున్న విద్యార్థుల కోసం. రెండోది మాస్టర్స్ లేదా పీహెచ్‌డీ చేస్తున్న విద్యార్థులు కోసం. అయితే దీనికి ఎలాంటి అనుభవం లేకపోయినా పర్లేదు. అలాగే 6 ఏళ్ల వరకు వృత్తిపరమైన అనుభవం ఉన్నవారైనా సరే.. దరఖాస్తు చేసుకోవచ్చు. కాకపోతే కంప్యూటింగ్, టెక్నికల్ స్కిల్స్ ఉన్న వారికి ప్రాధాన్యత ఎక్కువగా ఉంటుంది.

ఎంపికైన వారు కేవలం ఫైనాన్స్ రంగమే కాకుండా.. ఎకనామిక్స్, ఇన్వెస్ట్‌మెంట్, సామాజిక శాస్త్రాలు, వ్యవసాయం, పర్యావరణం, ఇంజినీరింగ్, అర్బన్ ప్లానింగ్ వంటి విభాగాల్లో కూడా పని చేయవచ్చు. అలాగే అకౌంటింగ్, కమ్యూనికేషన్స్, ఐటీ, హ్యూమన్ రిసోర్సెస్ వంటి సపోర్ట్ ఫంక్షన్లలో కూడా అవకాశాలు ఉన్నాయి. అయితే ప్రపంచ బ్యాంకు నియమాల ప్రకారం ఇంటర్న్‌లకు గంటల ప్రాతిపదికన జీతం చెల్లిస్తారు. అయితే వసతి ఖర్చులను అభ్యర్థులే స్వయంగా భరించాల్సి ఉంటుంది. ఈ ఇంటర్న్‌షిప్ అవకాశాలు ప్రధానంగా వాషింగ్టన్ డీ.సీ. లోని ప్రధాన కార్యాలయంతో పాటు వివిధ దేశాల్లోని వరల్డ్ బ్యాంక్ కార్యాలయాల్లో ఉంటాయి.

ఆసక్తి గల విద్యార్థులు వరల్డ్ బ్యాంక్ అధికారిక వెబ్‌సైట్ ద్వారా ఆన్‌లైన్‌లో దరఖాస్తు చేసుకోవాలి. దరఖాస్తుతో పాటు రెజ్యూమ్, స్టేట్‌మెంట్ ఆఫ్ ఇంటరెస్ట్, ప్రస్తుతం చదువుతున్నట్లుగా అకడమిక్ సర్టిఫికేట్లు సమర్పించాల్సి ఉంటుంది. ఒకసారి సబ్మిట్ చేసిన తర్వాత అప్లికేషన్‌ను ఎడిట్ చేసే అవకాశం ఉండదు. కాబట్టి జాగ్రత్తగా అన్నీ చూసుకొని దరఖాస్తు చేసుకోవాలి. అయితే ఈ అవకాశాన్ని ఆసక్తి కల్గిన విద్యార్థులు అంతా వినియోగించుకోవాలని నిపుణులు సూచిస్తున్నారు. అంతర్జాతీయ స్థాయిలో గుర్తింపు పొందిన సంస్థలో పని చేయడం కెరీర్‌కు మైలురాయిగా మారుతుందని.. ఇలాంటి ఛాన్స్‌ను అస్సలే మిస్ చేసుకోవద్దని సూచిస్తున్నారు.