అనితమ్మా.. అవమానిస్తున్నావ్.. హోం మంత్రిపై జేసీ ప్రభాకర్ రెడ్డి అసహనం

టీడీపీ ఫైర్ బ్రాండ్ లీడర్, తాడిపత్రి మున్సిపల్ ఛైర్మన్ జేసీ ప్రభాకర్ రెడ్డి మరోసారి వార్తల్లోకి ఎక్కారు. తన వ్యాఖ్యలు, చేష్టలతో వార్తలతో నిలిచే జేసీ ప్రభాకర్ రెడ్డి .. ఈ సారి సొంత పార్టీ నేతపైనే అసహనం వ్యక్తం చేశారు. ఏపీ హోం మంత్రి వంగలపూడి అనితపై జేసీ ప్రభాకర్ రెడ్డి అసంతృప్తి వ్యక్తం చేశారు. నేరుగా హోం మంత్రి అనిత టార్గెట్‌గా ప్రశ్నలు సంధించారు జేసీ. పార్టీ ప్రతిపక్షంలో ఉన్నప్పడు కష్టపడ్డామన్న జేసీ ప్రభాకర్ రెడ్డి.. ఇప్పుడు తమ గన్ లైసెన్సులను కూడా రెన్యువల్ చేయించుకోలేని పరిస్థితి అంటూ అసంతృప్తి వ్యక్తం చేశారు. తాను, తన కొడుకు గన్ లైసెన్స్ రెన్యువల్ కోసం హోం మంత్రి అనితకు ఎన్నో లేఖకు రాశామని.. కానీ పట్టించుకోవడం లేదన్నారు. హోం మంత్రి అనిత తనను, ఎమ్మెల్యేను అవమానిస్తు్న్నారని అన్నారు. తమ పరిస్థితే ఇలా ఉంటే కార్యకర్తల పరిస్థితి ఏమిటని జేసీ ప్రశ్నించారు.

" నేనే ఉదాహరణ. నాకు ఈ రోజు గన్‌మెన్లు లేరు. నేను హోం మంత్రికి చెప్తున్నా. మీకు ఎన్నిసార్లు లెటర్లు రాసినా పట్టించుకోలేదు. మీరు నన్ను అవమానిస్తు్న్నారు. ఎమ్మెల్యేను అవమానిస్తున్నారు. నా మాటలతో ఎవరైనా బాధపడొచ్చు. మాకు కూడా బాధలు ఉంటాయి. అనితమ్మా.. మరి నాది తప్పో, నీది తప్పో పోలీసుల తప్పో తెలీదు.. కానీ ఇది ఎమ్మెల్యేకు అవమానం. గన్ లైసెన్సులు కూడా రెన్యువల్ చేసుకోలేని పరిస్థితి. నా పరిస్థితే ఇలా ఉంటే కార్యకర్త పరిస్థితి ఏమిటి" అని జేసీ ప్రభాకర్ రెడ్డి అన్నారు.

 తాడిపత్రిలో హైటెన్షన్..

మరోవైపు అనంతపురం జిల్లా తాడిపత్రిలో ఉద్రిక్త వాతావరణం నెలకొంది. మాజీ ఎమ్మెల్యే కేతిరెడ్డి పెద్దారెడ్డి, జేసీ ప్రభాకర్ రెడ్డి మధ్య వైరం తారస్థాయికి చేరింది. ఇద్దరు నేతల సవాళ్లు, ప్రతిసవాళ్లతో తాడిపత్రిలో ఉద్రిక్త వాతావరణం నెలకొంది. దీంతో పోలీసులు ముందు జాగ్రత్త చర్యలు చేపట్టారు. ఎలాంటి అవాంఛనీయ ఘటనలు జరగకుండా పోలీసు బలగాలను మోహరించారు. భద్రతను కట్టుదిట్టం చేశారు.

మరోవైపు రాయలసీమ ప్రాజెక్టులపై దమ్ముంటే చర్చకు రావాలంటూ జేసీకి, పెద్దారెడ్డి సవాల్ చేసిన సంగతి తెలిసిందే. కర్నూలు కొండారెడ్డి బురుజు, అనంతపురం శ్రీకంఠం సర్కిల్ ఇలా రాయలసీమలో ఎక్కడైనా చర్చకు సిద్ధమంటూ కేతిరెడ్డి పెద్దారెడ్డి ఛాలెంజ్ చేశారు.పెద్దారెడ్డి సవాల్‌ను స్వీకరించిన జేసీ ప్రభాకర్ రెడ్డి.. చర్చకు తానూ సిద్ధమని, పెద్దారెడ్డి ఇంటికే వస్తానంటూ ప్రతి సవాల్ చేశారు. దీంతో పోలీసులు అప్రమత్తమై ఇరువర్గాల మధ్య ఎలాంటి ఘర్షణలు జరగకుండా భద్రతను కట్టుదిట్టం చేశారు.