టోర్నీలో ఆడాలా? వద్దా? అనేది ప్రభుత్వ నిర్ణయం,,,,,పాక్ సెలెక్షన్ కమిటీ సభ్యుడు ఆకిబ్ జావెద్

టీ20 వరల్డ్‌కప్ 2026 కోసం పాకిస్తాన్ జట్టును ప్రకటించింది. స్క్వాడ్‌ను ప్రకటించినప్పటికీ ఆ జట్టు టోర్నీలో పాల్గొంటుందా లేదా అన్న విషయంలో ఇప్పటికీ స్పష్టత లేదు. స్క్వాడ్ అనౌన్స్‌మెంట్‌తో కథ ముగిసిపోయినట్టు అనిపించినా, పాకిస్తాన్ క్రికెట్ బోర్డు హై పెర్ఫార్మెన్స్ డైరెక్టర్‌, జాతీయ సెలెక్షన్ కమిటీ సభ్యుడు ఆకిబ్ జావెద్ చేసిన వ్యాఖ్యలు గందరగోళానికి గురి చేశాయి. సెలెక్టర్ల పని జట్టును ఎంపిక చేయడమే తప్ప, వరల్డ్‌కప్‌లో ఆడాలా వద్దా అన్న తుది నిర్ణయం తమ చేతుల్లో లేదని ఆయన తేల్చి చెప్పారు.

  “మేము సెలెక్టర్లమే. మా పని జట్టును ఎంపిక చేయడం మాత్రమే. గడువుకు దగ్గరగా జట్టును ప్రకటించాం. కానీ వరల్డ్‌కప్‌లో పాల్గొనాలా వద్దా అన్నది ప్రభుత్వం తీసుకునే నిర్ణయం. ఆ విషయంలో నేను ఏమీ చెప్పలేను. మా ఛైర్మన్ కూడా ఇదే చెప్పారు. కాబట్టి ప్రభుత్వ నిర్ణయాన్ని ఎదురుచూస్తున్నాం” అని ఆకిబ్ జావెద్ స్పష్టం చేశారు.

డెడ్‌లైన్‌కు దగ్గరగా జట్టును ప్రకటించడం వెనుక సాధారణంగా ఫిట్‌నెస్ లేదా ఫామ్ అంశాలు ఉంటాయి. కానీ ఈసారి పరిస్థితి భిన్నంగా ఉంది. జట్టు సిద్ధంగా ఉన్నప్పటికీ, టోర్నమెంట్‌కు వెళ్లే అనుమతి ఇంకా ఖరారు కాలేదు. ఇది ఆటగాళ్లకూ అయోమయ పరిస్థితినే సృష్టిస్తోంది. వరల్డ్‌కప్ జట్టులో చోటు దక్కడం అంటే సాధారణంగా స్పష్టత, నమ్మకం కలగాలి. కానీ ఈసారి రాజకీయ, పరిపాలనా అంశాలు ఆటపై ప్రభావం చూపుతున్నాయి.

పీసీబీ మాత్రం తమ వంతు పని పూర్తి చేసినట్టు చెబుతోంది. జట్టు ఎంపిక చేసి ప్రకటించింది. ఇక మిగిలింది ప్రభుత్వం తీసుకునే నిర్ణయమే. ఆ నిర్ణయం వచ్చే వరకు పాకిస్తాన్ వరల్డ్‌కప్ ప్రయాణం స్పష్టత లేకుండా కొనసాగుతోంది. ఏ దిశలో వస్తుందో అన్నదే ఇప్పుడు కీలకం.

టీ20 వరల్డ్‌కప్‌కు పాకిస్తాన్ స్క్వాడ్ ఇదే

సల్మాన్ అలీ (కెప్టెన్), అబ్రార్ అహ్మద్, బాబర్ ఆజామ్, ఫహీమ్ అష్రఫ్, ఫఖర్ జమాన్, ఖ్వాజా మహ్మద్ నఫే, నవాజ్, సల్మాన్ మీర్జా, నసీమ్, సాహిబ్‌జాదా ఫర్హాన్, సైమ్ అయూబ్, షాహీన్, షాదాబ్, ఉస్మాన్ ఖాన్, ఉస్మాన్ తారిక్.