డబుల్ సూపర్ ఓవర్‌లో గెలుపు... కానీ ఇది మా ఆట కాదు: ఐడెన్ మార్క్రామ్

ఐసీసీ టీ20 ప్రపంచకప్ 2026లో భాగంగా అఫ్గానిస్థాన్‌తో ఉత్కంఠభరితంగా జరిగిన మ్యాచ్‌లో డబుల్ సూపర్ ఓవర్ ద్వారా విజయం సాధించినప్పటికీ, తమ ప్రదర్శనపై సౌతాఫ్రికా కెప్టెన్ ఎయిడెన్ మార్క్‌రమ్ అసంతృప్తి వ్యక్తం చేశాడు.తీవ్రమైన పోరులో గెలిచినందుకు ఆనందంగా ఉన్నప్పటికీ, జట్టు ఆటతీరు ఇంకా మెరుగుపడాల్సిన అవసరం ఉందని ఆయన స్పష్టం చేశాడు.గ్రూప్-డీలో భాగంగా అహ్మదాబాద్‌లో జరిగిన ఈ రెండో లీగ్ మ్యాచ్‌లో సౌతాఫ్రికా, అఫ్గానిస్థాన్‌పై డబుల్ సూపర్ ఓవర్‌లో విజయం సాధించింది. మ్యాచ్ అంతా ఉత్కంఠభరితంగా సాగి, నిర్ణీత ఓవర్లలో ఇరు జట్లు సమాన స్కోరు చేయడంతో ఫలితాన్ని సూపర్ ఓవర్ ద్వారా తేల్చాల్సి వచ్చింది. తొలి సూపర్ ఓవర్ కూడా టై కావడంతో రెండో సూపర్ ఓవర్ నిర్వహించగా, అందులో సౌతాఫ్రికా పైచేయి సాధించింది.ఈ విజయానంతరం మాట్లాడిన మార్క్‌రమ్, “ఒత్తిడిని అధిగమించి గెలవడం సంతోషమే. కానీ కొన్ని విభాగాల్లో మేము మా సామర్థ్యానికి తగ్గట్టు ఆడలేదు. ఈ టోర్నీలో ప్రతి జట్టు తీవ్ర ఒత్తిడిని సృష్టిస్తుంది. అలాంటి పరిస్థితుల్లో మనమే మనపై ఒత్తిడి తెచ్చుకుంటే పరిస్థితి మరింత క్లిష్టమవుతుంది. అయితే ఇంకా మెరుగుపడే అవకాశం ఉందనేది సానుకూల అంశం” అని పేర్కొన్నారు.సూపర్ ఓవర్‌లో సాధారణంగా ధైర్యంగా బౌలింగ్ చేసే ఆటగాడికే బంతిని అప్పగిస్తామని, ఈ మ్యాచ్‌లో లూంగి ఎంగిడి అద్భుతంగా రాణించాడని మార్క్‌రమ్ తెలిపారు. “అంతర్జాతీయ క్రికెట్‌లో చిన్న పొరపాటు కూడా మ్యాచ్ ఫలితాన్ని మార్చేస్తుంది. కేశవ్ మహారాజ్ చిన్న గ్రౌండ్‌లో స్పిన్నర్‌గా బౌలింగ్ చేయడం సవాలే అయినా, అతను పని పూర్తి చేస్తాడని మేం నమ్మాం” అని అన్నారు.బ్యాటింగ్‌లో కొన్ని పరుగులు తక్కువయ్యాయని భావించామని, అందుకే బౌలింగ్ మరియు ఫీల్డింగ్‌లో అత్యుత్తమ ప్రదర్శన ఇవ్వాలని జట్టుకు సూచించానని చెప్పారు. ఫీల్డింగ్ ద్వారా 10-15 పరుగులు ఆదా చేయగలిగితే మ్యాచ్‌ను గెలవొచ్చని భావించామని తెలిపారు. టీ20లో చిన్న చిన్న విషయాలే చివరికి పెద్ద తేడా చూపుతాయని ఆయన అభిప్రాయపడ్డారు.మా ఓపెనర్లు మంచి ఫామ్‌లో ఉన్నారని, కానీ మిడిల్ ఓవర్లలో వరుస వికెట్లు కోల్పోవడం ఆందోళన కలిగిస్తోందని చెప్పారు. గత రెండు మ్యాచ్‌ల్లో ఇదే సమస్య పునరావృతమైందని, దానిని అధిగమించాల్సిన అవసరం ఉందన్నారు. అయితే సూపర్ ఓవర్‌లో ఒత్తిడిని తట్టుకుని బ్యాటింగ్ చేసిన ఆటగాళ్ల ప్రదర్శన జట్టుకు విశ్వాసాన్ని నింపిందని పేర్కొన్నారు.ఈ మ్యాచ్‌లో ముందుగా బ్యాటింగ్ చేసిన సౌతాఫ్రికా 20 ఓవర్లలో 6 వికెట్లకు 187 పరుగులు చేసింది. ప్రత్యుత్తరంగా అఫ్గానిస్థాన్ 19.4 ఓవర్లలో 187 పరుగులకే ఆలౌటైంది. తొలి సూపర్ ఓవర్‌లో ఇరు జట్లు 17 పరుగులు చేయగా, రెండో సూపర్ ఓవర్‌లో సౌతాఫ్రికా 23 పరుగులు చేసింది. లక్ష్యంగా వచ్చిన 24 పరుగుల ఛేదనలో అఫ్గానిస్థాన్ 19 పరుగులకే పరిమితమైంది. చివరి బంతికి 5 పరుగులు అవసరమైన సమయంలో గుర్బాజ్ క్యాచ్ అవుట్ కావడంతో మ్యాచ్ సౌతాఫ్రికా వైపు మొగ్గుచూపింది.