లోకపావని అన్నపూర్ణ: ఆకలి తీర్చే అమ్మ.. సాక్షాత్తూ శివుడికే భిక్ష పెట్టిన వైనం

సృష్టిలోని సకల జీవరాశులకు ప్రాణాధారమైనది ఆహారం. ఆ ఆహారాన్ని ప్రసాదించే ఆదిశక్తి రూపమే అన్నపూర్ణ దేవి. పురాణాల ప్రకారం, ఒకానొక సమయంలో మహాశివుడు ఈ జగత్తు అంతా మాయ అని, ఆహారం కూడా కేవలం ఒక భ్రమ మాత్రమేనని వ్యాఖ్యానించారు. ప్రకృతి స్వరూపిణి అయిన పార్వతీ దేవికి ఈ మాటలు సమ్మతం కాలేదు. సృష్టిలో ఆహారానికి ఉన్న ప్రాముఖ్యతను నిరూపించాలని భావించిన అమ్మవారు, ఒక్కసారిగా లోకం నుండి అదృశ్యమై కాశీ క్షేత్రానికి చేరుకున్నారు.
అమ్మవారు అంతర్ధానం కావడంతో భూమండలమంతా ఆహారం కరువైపోయింది. వృక్షాలు ఫలించడం మానేశాయి, నదులు ఇంకిపోయాయి, సకల జీవరాశులు ఆకలితో అలమటించడం మొదలుపెట్టాయి. ఆఖరికి దేవతలు, మునులు కూడా ఆకలి బాధను భరించలేకపోయారు. ఆహారం అనేది కేవలం భ్రమ కాదని, అది జీవకోటికి ప్రాణవాయువుతో సమానమని గ్రహించిన పరమేశ్వరుడు, తన పొరపాటును తెలుసుకుని లోక కళ్యాణం కోసం కాశీ నగరానికి బయలుదేరారు.
కాశీలో వెలసిన పార్వతీ దేవి తన భక్తుల కోసం అన్నపూర్ణగా మారి స్వయంగా వంట చేసి వడ్డిస్తుండగా, పరమశివుడు ఒక సామాన్యుడిలా భిక్షా పాత్ర పట్టుకుని ఆమె ముందుకు వెళ్లారు. "బిక్షాందేహి" అంటూ జగన్మాతను వేడుకోగా, ఆ తల్లి చిరునవ్వుతో నాథుడికి అన్నం పెట్టింది. ఈ అద్భుత ఘట్టం ద్వారా ఆహారం అనేది ప్రకృతి ప్రసాదించిన పరమ పవిత్రమైన శక్తి అని లోకానికి చాటిచెప్పబడింది. అందుకే కాశీ క్షేత్రంలో అన్నపూర్ణ దేవి కొలువై ఉండి, తనను దర్శించుకునే వారికి ఎన్నటికీ అన్నం కొరత లేకుండా చూస్తుందని భక్తుల నమ్మకం.
అన్నదానం అనేది అన్ని దానాల కంటే మిన్న అని మన పెద్దలు చెబుతుంటారు. ఇతర దానాలు చేసేటప్పుడు గ్రహీత ఇంకా కావాలని కోరుకుంటారు, కానీ అన్నదానం చేసినప్పుడు మాత్రమే 'తృప్తిగా ఉంది' అనే మాట వినిపిస్తుంది. అందుకే ఆకలితో ఉన్నవారికి అన్నం పెట్టడం వల్ల అన్నపూర్ణ దేవి అనుగ్రహం లభిస్తుంది. ప్రతి ఇంట్లో అన్నాన్ని గౌరవించడం, వృథా చేయకుండా ఉండటం వల్ల ఆ తల్లి కటాక్షం కలిగి ఐశ్వర్యం, ఆరోగ్యం చేకూరుతాయని పురాణాలు స్పష్టం చేస్తున్నాయి.