ఎక్కువ సేపు వాసన రావాలంటే పెర్ఫ్యూమ్ ఎలా వాడాలి

మనం ఎంత ఖరీదైన దుస్తులు ధరించినా, ఎంత అందంగా తయారైనా.. మన శరీరం నుంచి వచ్చే సువాసన మన వ్యక్తిత్వాన్ని మరింత ఆకర్షణీయంగా మారుస్తుంది. ఇందుకోసం చాలామంది బాడీ స్ప్రేలు, పర్ఫ్యూమ్‌లు వాడుతుంటారు. అయితే బాడీ స్ప్రే వాడకంలో మెజారిటీ ప్రజలు తెలియకుండానే కొన్ని పెద్ద పొరపాట్లు చేస్తుంటారు. ఈ నేపథ్యంలో ప్రముఖ స్టైలిస్ట్ నేహా డి గుప్తా బాడీ స్ప్రేను సరైన పద్ధతిలో ఎలా వాడాలో సోషల్ మీడియా వేదికగా వివరించారు. మనం చేసే తప్పుల వల్ల సువాసన త్వరగా ఆవిరైపోవడమే కాకుండా ఇతరులకు ఇబ్బందిగా మారే అవకాశం ఉందని ఆమె హెచ్చరించారు.

బట్టలపై స్ప్రే చేయడం ఆపేయండి

చాలామంది చేసే అతిపెద్ద పొరపాటు బాడీ స్ప్రేను నేరుగా బట్టలపై కొట్టుకోవడం. ఇలా చేయడం వల్ల పర్ఫ్యూమ్‌లోని రసాయనాలు బట్టల రంగును దెబ్బతీసే అవకాశం ఉందని స్టైలిస్ట్ నేహా గుప్తా తెలిపారు. బాటిల్ నిండా సెంటు ఉంది కదా అని విచక్షణ లేకుండా ఒళ్లంతా పూసుకోవడం కూడా మంచి పద్ధతి కాదని చెప్పారు.

శరీరం మొత్తానికి స్ప్రే చేయడం వల్ల సువాసన మరీ గాఢంగా మారి చుట్టూ ఉన్నవారికి అసౌకర్యం కలిగిస్తుందన్నారు. సువాసన అనేది సున్నితంగా, ఆహ్లాదకరంగా ఉండాలి తప్ప ఇతరుల ముక్కు పుటాలను అదరగొట్టేలా ఉండకూడదన్నారు.

ఈ భాగాలపై అస్సలు స్ప్రే వద్దు

సాధారణంగా కొందరు చేతులపై, మెడపై లేదా గుండె భాగంపై నేరుగా స్ప్రే కొట్టుకుంటారని గుర్తు చేశారు. అయితే ఇవి సున్నితమైన భాగాలు కావడం వల్ల చర్మ సమస్యలు వచ్చే ప్రమాదం ఉంటుందన్నారు. బాడీ స్ప్రేను ఎక్కడ పడితే అక్కడ కొట్టడం వల్ల దాని ప్రభావం త్వరగా తగ్గిపోతుందన్నారు.

బాటిల్‌ను చర్మానికి చాలా దగ్గరగా ఉంచి కొట్టడం వల్ల కూడా చర్మంపై దద్దుర్లు రావచ్చని.. కాబట్టి పరిమళం ఎక్కువ కాలం నిలవాలంటే శరీరంలోని పల్స్ పాయింట్లపై సరైన రీతిలో అప్లై చేయడం నేర్చుకోవాలన్నారు.

రుద్దడం వల్ల పరిమళం దెబ్బతింటుంది

పెర్ఫ్యూమ్ వాడే వారిలో మరో వింత అలవాటు ఉంటుందని నేహా గుప్తా వివరించారు. ఒక చేతి మణికట్టుపై స్ప్రే కొట్టుకుని, దానిని రెండో చేత్తో గట్టిగా రుద్దుతుంటారన్నారు. ఇలా చేయడం వల్ల పెర్ఫ్యూమ్‌లోని మాలిక్యూల్స్ (అణువులు) విచ్ఛిన్నమై దాని అసలు సువాసన మారిపోతుందని నేహా డి గుప్తా వివరించారు.

వేడి పుట్టేలా రుద్దడం వల్ల పరిమళం త్వరగా ఆవిరైపోతుందన్నారు. ఇది చాలా మందికి తెలియని ఒక శాస్త్రీయ నిజం అని.. అందుకే స్ప్రే చేసిన తర్వాత చర్మంపై దాన్ని అలాగే వదిలేయాలి తప్ప ఎట్టి పరిస్థితుల్లోనూ రుద్దకూడదన్నారు.

మణికట్టు నుంచి చెవుల వరకు

బాడీ స్ప్రేను ఎలా వాడాలో నేహా గుప్తా ఒక అద్భుతమైన టెక్నిక్ చెప్పారు. ముందుగా స్ప్రే బాటిల్ తీసుకుని ఎడమ చేతి అరచేతి కింది భాగంలో (మణికట్టు వద్ద) కొద్దిగా స్ప్రే చేయాలన్నారు. ఆ తర్వాత కుడి చేతి మణికట్టును దానిపై జస్ట్ అలా ఆనించాలన్నారు (రుద్దకూడదు).

ఇప్పుడు ఆ రెండు చేతులను తీసుకెళ్లి చెవుల వెనుక భాగంలో, చెంపల వద్ద మెల్లగా అద్దాలన్నారు. ఇలా చేయడం వల్ల మన పైశరీరం మొత్తం రోజంతా సువాసనతో నిండి ఉంటుందన్నారు. శరీరం నుంచి వెలువడే వేడి వల్ల ఈ సువాసన మెల్లమెల్లగా విడుదలవుతూ మనల్ని తాజాగా ఉంచుతుందన్నారు.

గాఢత తక్కువగా.. హుందాతనం ఎక్కువగా

అతి ఎప్పుడూ ప్రమాదకరమే అని కూడా నేహా గుప్తా స్పష్టం చేశారు. మరీ ఎక్కువ మొత్తంలో సెంటు కొట్టుకోవడం వల్ల అది ఇతరులకు ఇబ్బందికరంగా మారుతుందని.. పది మందిలోకి వెళ్లినప్పుడు మన నుంచి వచ్చే సువాసన ఎదుటివారిని ఆహ్వానించేలా ఉండాలన్నారు.

ఎవరితోనైనా మాట్లాడేటప్పుడు లేదా పక్కన కూర్చున్నప్పుడు వారికి ఒక ఆహ్లాదకరమైన అనుభూతిని ఇవ్వాలన్నారు. అందుకే పరిమళాన్ని తక్కువ మొత్తంలో, సరైన ప్రదేశాలలో అప్లై చేయడం వల్ల మీ హుందాతనం మరింత పెరుగుతుందన్నారు. ఈ చిన్న చిట్కాల్ని పాటిస్తే మీ బాడీ స్ప్రే ఖచ్చితంగా ఎక్కువ సేపు నిలుస్తుందని పేర్కొన్నారు.