ట్రైన్ ప్రయాణికులకు గుడ్ న్యూస్.. ఇక ఫుడ్ ప్యాకెట్ల ట్రాకింగ్ సిస్టమ్

రైలు ప్రయాణికుల సౌకర్యం, భద్రతను మరింత మెరుగుపర్చేందుకు Indian Railways కీలక నిర్ణయం తీసుకుంది. ఇకపై రైళ్లలో పనిచేసే క్యాటరింగ్ సిబ్బంది, వెండర్లకు QR కోడ్ ఆధారిత ఐడీ కార్డులు తప్పనిసరి చేయడం ద్వారా అనధికారిక విక్రయాలను అరికట్టడం, ప్రయాణికులకు నమ్మకమైన సేవలు అందించడం లక్ష్యంగా పెట్టుకుంది.కొత్త విధానం ప్రకారం ప్రతి అధికారిక వెండర్, హెల్పర్, క్యాటరింగ్ సిబ్బందికి QR కోడ్ ఉన్న గుర్తింపు కార్డు ఇవ్వబడుతుంది. ఈ కోడ్‌ను స్కాన్ చేస్తే వారి పేరు, ఆధార్ వివరాలు, మెడికల్ ఫిట్‌నెస్, పోలీస్ వెరిఫికేషన్ వంటి ముఖ్య సమాచారం వెంటనే అందుబాటులోకి వస్తుంది. దీంతో ప్రయాణికులు తమకు సేవలందిస్తున్న వ్యక్తి నిజంగా అధీకృతుడేనా కాదా అన్నది సులభంగా తెలుసుకోగలుగుతారు.ఇక ఆహార సరఫరాలో కూడా పారదర్శకత పెంచేందుకు ఫుడ్ ప్యాకెట్లపై QR కోడ్ అమలు చేయనున్నారు. ఈ కోడ్ ద్వారా ఆహారం ఏ కిచెన్‌లో తయారైంది, ఎప్పుడు సిద్ధం అయింది వంటి వివరాలు తెలుసుకునే అవకాశం ఉంటుంది. దీని వల్ల ఆహార నాణ్యతపై నమ్మకం పెరగడమే కాకుండా, సరఫరా వ్యవస్థలో పారదర్శకత కూడా మెరుగవుతుంది.అదేవిధంగా రైల్వే నిబంధనల ప్రకారం అనుమతి లేకుండా రైళ్లలో లేదా రైల్వే ప్రాంగణంలో వస్తువులు విక్రయించడం నేరంగా పరిగణించబడుతుంది. రైల్వే చట్టం 1989, సెక్షన్ 144 ప్రకారం ఇది శిక్షార్హం. ఈ నిబంధనలను కట్టుదిట్టంగా అమలు చేసేందుకు Railway Protection Force నిరంతరం తనిఖీలు నిర్వహిస్తోంది. QR కోడ్ విధానం ప్రవేశంతో ఈ పర్యవేక్షణ మరింత కఠినతరం కానుంది.రైళ్లలో అందించే ఆహార నాణ్యతపై కూడా ప్రత్యేక దృష్టి సారిస్తున్నారు. ఆధునిక సదుపాయాలతో కూడిన బేస్ కిచెన్ల నుంచి ఆహారం సరఫరా చేస్తూ, అక్కడ CCTV కెమెరాల ద్వారా నిరంతర నిఘా ఉంచుతున్నారు. వంటలో ఉపయోగించే ముడిసరుకులు నాణ్యమైనవిగా ఉండేలా చర్యలు తీసుకుంటున్నారు.ఆహార భద్రత కోసం Food Safety and Standards Authority of India (FSSAI) సర్టిఫికేషన్‌ను తప్పనిసరి చేశారు. రెగ్యులర్ శాంప్లింగ్, ఆకస్మిక తనిఖీలు, థర్డ్ పార్టీ ఆడిట్ల ద్వారా నాణ్యతను పర్యవేక్షిస్తున్నారు. అదేవిధంగా IRCTC సూపర్‌వైజర్లను నియమించి, క్యాటరింగ్ సిబ్బందికి సేవా ప్రమాణాలపై ప్రత్యేక శిక్షణ అందిస్తున్నారు.