అమెరికా పర్యటనకు షీ జిన్పింగ్
వైట్హౌస్ బాల్రూమ్పై ట్రంప్ ఆసక్తికర వ్యాఖ్యలు
చైనా అధ్యక్షుడు షీ జిన్పింగ్ రాబోయే రెండు వారాల్లో అమెరికాలో పర్యటించనున్నట్లు అమెరికా అధ్యక్షుడు డోనాల్డ్ ట్రంప్ వెల్లడించారు. అయితే ఈ పర్యటనకు సంబంధించిన ఖచ్చితమైన తేదీలు, భేటీ వేదిక మరియు చర్చించబోయే అంశాల వివరాలను ఆయన ఇంకా స్పష్టం చేయలేదు.
దక్షిణ కరోలినాలోని మిర్టిల్ బీచ్లో నిర్వహించిన రిపబ్లికన్ ప్రచార సభలో ట్రంప్ ఈ విషయాన్ని ప్రస్తావించారు. వైట్హౌస్లో నిర్మించతలపెట్టిన కొత్త బాల్రూమ్ ప్రాజెక్టు గురించి మాట్లాడుతున్న సమయంలో ఆయన షీ పర్యటన అంశాన్ని తీసుకువచ్చారు.
ప్రస్తుతం వైట్హౌస్లోని ఈస్ట్ రూమ్లో కేవలం 88 మందికి మాత్రమే స్థలం సరిపోతుందని, విదేశీ ప్రతినిధులు పెద్ద సంఖ్యలో వచ్చినప్పుడు ఇబ్బందులు ఎదురవుతున్నాయని ట్రంప్ పేర్కొన్నారు. షీ జిన్పింగ్ పర్యటన నాటికే కొత్త బాల్రూమ్ నిర్మాణం పూర్తయి ఉంటే బాగుండేదని అభిప్రాయపడ్డారు.
వైట్హౌస్ కొత్త నిర్మాణ ప్రాజెక్టుకు అమెరికా సుప్రీంకోర్టు ఆమోదం తెలిపినట్లు చెప్పారు. ఈ కొత్త సముదాయంలో డ్రోన్లు, క్షిపణి దాడుల నుంచి రక్షణ కల్పించే ప్రత్యేక సైనిక భద్రతా వ్యవస్థలతో పాటు బుల్లెట్ప్రూఫ్ గ్లాస్ను అమర్చనున్నట్లు వివరించారు.
చైనాతో పాటు ఇతర దేశాలపై విధిస్తున్న సుంకాల (టారిఫ్ల) విధానాన్ని ట్రంప్ మరోసారి సమర్థించుకున్నారు. ఈ నిర్ణయాల వల్ల విదేశీ కంపెనీలు అమెరికాలోనే పరిశ్రమలు స్థాపించేందుకు ముందుకు వస్తున్నాయని, దేశంలో కొత్త కర్మాగారాల నిర్మాణం వేగవంతమై పెట్టుబడులు భారీగా పెరుగుతున్నాయని ధీమా వ్యక్తం చేశారు.
అమెరికా-చైనా మధ్య వాణిజ్య, సాంకేతిక రంగాలలో ఉద్రిక్తతలు కొనసాగుతున్న తరుణంలో ఈ పర్యటన ప్రాధాన్యత సంతరించుకుంది.