బస్సు ఏర్పాటుచేసి మమ్మల్ని చదువుకొనే అవకాశం కల్పించండి...హైకోర్టు సీజేఐకు విద్యార్థుల లేఖ

తమ ప్రాంతానికి బస్సు ఏర్పాటు చేయించి తమను చదువుకొనే అవకాశం కల్పించాలని ఏపీ హైకోర్టు సీజే ప్రశాంత్ కుమార్ మిశ్రాకు అనంతపురం జిల్లాకు చెందిన స్కూల్ విద్యార్థులు లేఖ రాశారు. తమ స్కూల్‌ను మరో ప్రాంతానికి తరలించడంపై ఫిర్యాదు చేశారు. తమకు చదువును దూరం చెయ్యొద్దని కోరారు. తాము స్కూల్‌కు వెళ్లాలంటే సరైన బస్సు సౌకర్యం కూడా లేదని.. తమ సమస్యపై స్పందించి న్యాయం చేయాలని కోరారు. ఆంధ్రప్రదేశ్ ప్రధాన న్యాయమూర్తి , ప్రధాన న్యాయస్థానం, నేలపాడు అమరావతి- పిన్ 522 237 అడ్రస్‌కు లేఖ పంపించారు.

ఆ లేఖలోని సారాంశం ఇలావుంది....

‘గౌరవనీయులు హైకోర్టు ప్రధాన న్యాయమూర్తి దివ్య సన్నిధానానికి నమస్కరించి వ్రాయునది ఏమనగా?.. సార్! నేను అనంతపురం జిల్లా కుందుర్పి మండలం మాయదార్లపల్లి ప్రాథమికోన్నత పాఠశాలలో ఏడవ తరగతి చదువుతున్నాను. మా పాఠశాలలోని 6,7,8, తరగతులను బసాపురం ఉన్నత పాఠశాలలో విలీనం చేశారు. కాని మేము మా ఊరి నుండి 4 కిలోమీటర్ల కాలి నడకన నడిచి మా పాఠశాలకు వచ్చి.. తిరిగి 3 కిలో మీటర్లు నడిచి బసాపురం వెళ్లాలి. ఇలా 7 కిలో మీటర్లు నడవలేము.. ఇప్పటికే మా పాఠశాల మూతపడి 40 రోజులవుతోంది.. మధ్యాహ్న భోజనం కూడా జరగలేదు. మా పాఠశాల నాడు-నేడులో పూర్తి కాంబడి.. ఎంతో బాగా తయారు అయ్యింది. కావున తమరు పెద్ద మనసుతో మా పాఠశాలను విలీనం చేయకుండా చేస్తే మేమంతా బాగా చదువుకుంటాము. లేకుంటే మా తల్లిదండ్రుల మమ్మల్ని పనికి పంపుతారు. దయచేసి మా సమస్యను తీర్చండి సార్’అని కోరారు.

ఈ కారణంతోనే తమను ఇంట్లో పెద్దలు చదువును మాన్పించి.. పొలాల్లో పనులకు, పశువులు, గొర్రెలు మేపడానికి పంపిస్తారన్నారు. తమ సమస్యపై స్పందించి న్యాయం చేయాలని విద్యార్థులు కోరుతున్నారు. ఈ లేఖ వైరల్ అవుతుండగా.. ఈ లేఖపై సీజే ఎలా స్పందిస్తారన్నది చూడాలి. ఏపీ ప్రభుత్వం ఇటీవల స్కూళ్లను విలీనం చేస్తున్న సంగతి తెలిసిందే.. అయితే ఈ నిర్ణయంపై కొన్నిచోట్ల విద్యార్థుల నుంచి తీవ్ర వ్యతిరేకత వ్యక్తమవుతోంది.