ఏపీ అసెంబ్లీలో గందరగోళం.. టీడీపీ సభ్యులు సస్పెండ్
Andhra Pradesh Telugu | Suryaa Desk | Published : Wed, Sep 21, 2022, 12:37 PM
ఏపీ అసెంబ్లీ సమావేశాలు చివరి రోజు వాడీ వేడిగా మారాయి. ఎన్టీఆర్ హెల్త్ యూనివర్శిటీ పేరు మార్పు వ్యవహారంపై సభ దద్దరిల్లింది. వర్శిటీ పేరు మారుస్తూ ప్రభుత్వం తీసుకున్న నిర్ణయాన్ని వెనక్కు తీసుకోవాలంటూ టీడీపీ సభ్యులు నిరసనకు దిగారు. స్పీకర్ పోడియంను చుట్టుముట్టి పేపర్లు చించి స్పీకర్ పైకి విసిరారు. స్పీకర్ చైర్ దగ్గర దురుసుగా ప్రవర్తించారు. టీడీపీ ఎమ్మెల్యేల దెబ్బకు సభలో గందరగోళం కనిపించింది. టీడీపీ ఎమ్మెల్యేలకు కౌంటర్‌గా వైఎస్సార్‌సీపీ ఎమ్మెల్యేలు వెల్‌లోకి వెళ్లారు. వెంటనే స్పీకర్ సభను వాయిదా వేశారు.
కొద్దిసేపు విరామం తర్వాత సభ ప్రారంభమైంది. అయినా టీడీపీ ఎమ్మెల్యేల తీరు మారలేదు.. స్పీకర్ పోడియంను మళ్లీ చుట్టుముట్టారు. పేపర్లు చించి స్పీకర్‌పైకి పదే పదే విసిరికొట్టారు.. సభకు ఎమ్మెల్యేలు అడ్డుగా మారడంతో స్పీకర్ సస్పెండ్ చేశారు. అనంతరం కూడా సస్పెండ్ అయిన సభ్యులు సభలో ఉండటంతో మార్షల్స్‌ను పిలిచి బయటకు తీసుకెళ్లాలని స్పీకర్ కోరారు. అనంతరం టీడీపీ ఎమ్మెల్యేలు లాబీల్లో నిరసన చేశారు. ప్రభుత్వం తీసుకున్న నిర్ణయానికి వ్యతిరేకంగా నినాదాలు చేశారు.
|
|