ఎనిమిది మందిని వివాహమండిన హిజ్రా...కోట్లు కాజేసింది
national | Suryaa Desk | Published : Wed, Sep 21, 2022, 11:18 PM
పెళ్లిళ్ల పేరుతో ఇప్పటి వరకు పురుషులు మోసం చేసిన ఘటనలు చూశాం...ఇటీవల కాలంలో మహిళలను కూడా చూస్తున్నాం...తాజాగా ఓ హిజ్రా ఏకంగా ఎనిమిది పెళ్లిళ్లు చేసుకొని పలువురిని మోసగించింది. తమిళనాడుకు చెందిన ఓ హిజ్రా ఐఏఎస్‌నని నమ్మిస్తూ 8 మందిని పెళ్లాడి ఆపై కోట్లలో నగదు, నగలు కాజేసి పరారైంది. ఆమె చేతిలో మోసపోయిన బాధితులు పోలీసులకు ఫిర్యాదు చేయడంతో విషయం వెలుగులోకి వచ్చింది. పూర్తి వివరాల్లోకి వెళ్తే.. తిరుచ్చికి చెందిన బబితా రోజ్ అనే ట్రాన్స్‌జెండర్ తాను ఐఏఎస్ అధికారినంటూ ప్రచారం చేసుకుంది. గొప్పగొప్ప వాళ్లతో తనకు పరిచయాలు ఉన్నాయని చెప్పుకుంది.
ఈ క్రమంలో ప్రేమిస్తున్నానంటూ 15 మందిని నమ్మించింది. ఆపై తిరుచ్చి, కడలూరు, కళ్లకుర్చి, కోయంబత్తూర్, మడత్తుకుళం, తిరుప్పూర్, విరుదునగర్, రాజపాళయం, నాగర్‌కోయిల్ తదితర ప్రాంతాలకు చెందిన 8 మందిని వివాహం చేసుకుంది. వీరిలో పలువురు పారిశ్రామికవేత్తలు, పోలీసు అధికారులు కూడా ఉండడం గమనార్హం. పెళ్లి చేసుకున్నాక నగదు, బంగారు ఆభరణాలు, కాజేసి పరారయ్యేది. ఆమె చేతిలో మోసపోయిన బాధితులు తాజాగా తిరుచ్చి ఎస్పీ సుజిత్‌కుమార్‌కు ఫిర్యాదు చేశారు. హిజ్రా బబితా రోజ్‌ను అరెస్ట్ చేసి చర్యలు తీసుకోవాలని కోరారు. కేసు నమోదు చేసుకున్న పోలీసులు బబిత కోసం గాలిస్తున్నారు.
|
|