ఉచిత హామీలకు నిధులు ఎక్కడ్నించి తెస్తారన్నది చెప్పాలి..రాజకీయ పార్టీలకు ఈసీ సూచన
national | Suryaa Desk | Published : Wed, Oct 05, 2022, 05:44 PM
ఉచితాలకు అయ్యే ఖర్చును, అందుకు అవసరమయ్యే నిధులు ఎక్కడ్నించి తెస్తారన్న విషయాలను కూడా రాజకీయ పార్టీలు ప్రజలకు వివరించాలని ఈసీ స్పష్టం చేసింది. తద్వారా, ఉచితాలను ఆయా పార్టీలు నెరవేర్చగలవా, లేదా? అనే అంశంపై ఓటర్లకు ఓ అభిప్రాయం ఏర్పడుతుందని పేర్కొంది. దేశంలో ఎన్నికలు అనగానే, రాజకీయ పార్టీలు అడ్డుఅదుపులేని రీతిలో ఉచితాలు ప్రకటిస్తూ ఓటర్లను ఆకర్షించేందుకు ప్రయత్నిస్తుంటాయి. ఈ ఉచితాలకు అడ్డుకట్ట వేయాలన్న చర్చ ఎప్పటినుంచో ఉంది. ప్రభుత్వ రంగ బ్యాంకు ఎస్ బీఐ కూడా ఉచితాలపై ఆందోళన వ్యక్తం చేస్తూ, వీటిపై పరిమితి విధించాలని ఓ నివేదిక వెలువరించింది. కేంద్ర ఎన్నికల సంఘం కూడా ఇదే అంశంపై స్పందించింది.
అయితే, ఈ ఉచితాలు, లేదా సంక్షేమ పథకాలకు చట్టబద్ధ నిర్వచనం అంటూ ఏదీ లేదన్నది వాస్తవం అని ఈసీ అభిప్రాయపడింది. సుప్రీంకోర్టులో ఈ ఉచితాలపై విచారణ జరుగుతున్నప్పటికీ తగిన స్పష్టత లేదని పేర్కొంది. ఈ క్రమంలో, రాజకీయ పార్టీలే తాము ఫలానా పథకం ఏ కారణంతో ఇస్తున్నారో, వాటికి నిధులు ఎక్కడ్నించి తీసుకువస్తారో కూడా చెప్పాలని ఎన్నికల సంఘం కోరింది. కాగా, ఇలాంటి హామీలు ఇవ్వకుండా రాజకీయ పార్టీలను అడ్డుకోలేమని, అందుకే ఆయా ఉచితాలకు సంబంధించిన వివరాలను తెలుసుకోవడం తమ హక్కుగా ఓటర్లు భావించాలని సూచించింది.
|
|